ಉಂಚಳ್ಳಿ ಸಮೀಪ ಸ್ಪ್ಯಾಬ್‌ಡ್ರೇನ್‌-ರಸ್ತೆ ಮಧ್ಯೆ ತಗ್ಗು....

ಶಿರಸಿ : ಈ ರಸ್ತೆ ನೋಡಿದರೆ ಎಂಥವರಿಗಾದರೂ ಒಮ್ಮೆ ವೇಗವಾಗಿ ಸಾಗೋಣ ಎಂದೆನಿಸದೇ ಇರದು..ಆದರೆ ಹಾಗೇ ಸಾಗುವಾಗ ಒಂದೆರಡು ಕಡೆ ವಾಹನಗಳು ಹೈಜಂಪ್‌ ಆಗುವಂತಹ ಸ್ಥಿತಿಯಿದೆ...

ಕನ್ನಡದ ಪ್ರಥಮ ರಾಜಧಾನಿ ಬನವಾಸಿಗೆ ಸಾಗುವ ರಾಜ್ಯ ಹೆದ್ದಾರಿಯನ್ನು ಕಳೆದ ಎರಡು ವರ್ಷದ ಅವಧಿಯಲ್ಲಿ ಉತ್ತಮವಾಗಿ ರೂಪಿಸಲಾಗಿದೆ. ಆದರೆ ಉಂಚಳ್ಳಿ ಸಮೀಪ ಈ ರಸ್ತೆಗೆ ಅಡ್ಡಲಾಗಿ ನೀರು ಹರಿಯುವುದಕ್ಕೆ ನಿರ್ಮಿಸಲಾದ ಸ್ಪ್ಯಾಬ್‌ ಡ್ರೇನ್‌ ಹಾಗೂ ಡಾಂಬರ್‌ ರಸ್ತೆಯ ಮಧ್ಯೆ ತಗ್ಗು ನಿರ್ಮಾಣವಾಗಿದೆ. ವಾಹನಗಳು ವೇಗವಾಗಿ ಬಂದಾಗ ಒಮ್ಮೆಲೆ ಇದು ಗೊತ್ತಾಗದೇ ಹೈಜಂಪ್‌ ಆಗಿ ಒಮ್ಮೆ ಸಂಕಟಪಡುವಂತಹ ಸ್ಥಿತಿ ನಿರ್ಮಾಣವಾಗುತ್ತಿದೆ.

ಸುಮಾರು 22ಕೋಟಿ ರೂ.ಗಿಂತ ಹೆಚ್ಚಿನ ವೆಚ್ಚದಲ್ಲಿ ಲೊಕೋಪಯೋಗಿ ಇಲಾಖೆ ಈ ರಸ್ತೆಯನ್ನು ರೂಪಿಸಿದೆ. ಉತ್ತಮವಾಗಿ ಮಾಡಲಾದ ರಸ್ತೆಯಲ್ಲಿ ಹೀಗೊಂದು ಸಮಸ್ಯೆ ಇರುವುದು ಕಪ್ಪುಚುಕ್ಕೆಯಂತಾಗಿದೆ.

ನಗರದಿಂದ 25ಕಿಮೀ ದೂರದಲ್ಲಿರುವ ಬನವಾಸಿ ಪ್ರವಾಸಿ ತಾಣವೂ ಹೌದು. ಇಲ್ಲಿನ ಮಧುಕೇಶ್ವರ ದೇವಸ್ಥಾನ, ವರದಾ ನದಿಯನ್ನು ನೋಡಲು ನಾಡಿನ ವಿವಿಧೆಡೆಯಿಂದ ಜನ ಆಗಮಿಸುತ್ತಲೇ ಇರುತ್ತಾರೆ. ಬಹುತೇಕರು ಈ ಮಾರ್ಗವನ್ನೇ ಅವಲಂಭಿಸುತ್ತಾರೆ. ಹಾಗೇ ಸೊರಬ, ಶಿವಮೊಗ್ಗದ ಕಡೆಯಿಂದಲೂ ಶಿರಸಿ ಕಡೆಗೆ ಬರುವವರು ಇಲ್ಲಿಂದಲೇ ಬರುವುದುಂಟು. ಹಿಂದೆಲ್ಲ ಇದ್ದ ರಸ್ತೆಗಿಂತ ಈಗ ಉತ್ತಮವಾಗಿದ್ದರೂ ಇಂತಹ ಸಣ್ಣಪುಟ್ಟ ಸಮಸ್ಯೆಗಳು ಕಿರಿಕಿರಿಯುಂಟು ಮಾಡುತ್ತಿವೆ.

ಸಣ್ಣ ತಗ್ಗಿನಂತೆ ಕಂಡರೂ...

ರಸ್ತೆ ಹಾಗೂ ಸ್ಪ್ಯಾಬ್‌ ಡ್ರೇನ್‌ ಮಧ್ಯೆ ನೋಡಲು ಸಣ್ಣದಾದ ತಗ್ಗಿನಂತೆ ಕಂಡರೂ ಅದು ಸಮಸ್ಯೆಯನ್ನು ಸೃಷ್ಟಿಸುತ್ತಿದೆ. ಸೊಂಯ್‌ ಎಂದು ಬೈಕ್‌, ಕಾರುಗಳನ್ನು ಓಡಿಸುವವರು, ಅದರಲ್ಲೂ ರಾತ್ರಿಯ ಸಮಯದಲ್ಲೆಲ್ಲಾ ಒಮ್ಮೆಲೆ ಗೊತ್ತಾಗದೇ ಜಂಪ್‌ ಆಗಿ ವಾಹನದ ನಿಯಂತ್ರಣ ತಪ್ಪುವ ಸಂಕಟ ಎದುರಾಗುತ್ತದೆ. ಒಮ್ಮೆಲೆ ಎದುರಾಗುವ ಸಮಸ್ಯೆಯಿಂದ ಚಾಲಕರು ಹೌಹಾರುವಂತಾಗುತ್ತದಲ್ಲದೇ ಕುಳಿತವರು ಮೇಲ್ಭಾಗಕ್ಕೆ ಹಾರಿ ತಲೆ ಜಜ್ಜಿಕೊಳ್ಳುವಂತಾಗುತ್ತದೆ. ಮಳೆಗಾಲದ ಅವಧಿಯಿಂದ ಇರುವ ಸಮಸ್ಯೆಯನ್ನು ಕೂಡಲೇ ಪರಿಹರಿಸಬೇಕು ಎಂದು ವಾಹನ ಸವಾರರು ಆಗ್ರಹಿಸಿದ್ದಾರೆ.