ಮುಂಡಗೋಡದಲ್ಲಿ ಬೀದಿ ನಾಯಿ ಕಾಟ

ಮುಂಡಗೋಡ : ಪಟ್ಟಣದಲ್ಲಿ ಬೀದಿ ನಾಯಿಗಳ ಕಾಟ ಹೆಚ್ಚಾಗಿದ್ದು, ಇದರಿಂದ ಪಾದಚಾರಿಗಳು ತೀವ್ರ ತೊಂದರೆ ಅನುಭವಿಸುವಂತಾಗಿದೆ.

ಪಟ್ಟಣದ ಪ್ರಮುಖ ಬಡಾವಣೆ ಸೇರಿದಂತೆ ಎಲ್ಲ ಬಡಾವಣೆಗಳಲ್ಲಿಯೂ ಎಲ್ಲಿ ನೋಡಿದರೂ 4-5 ನಾಯಿಗಳ ತಂಡ ಕಂಡು ಬರುತ್ತಿದೆ. ಇದರಿಂದಾಗಿ ಪಾದಚಾರಿಗಳು ನಾಯಿಗಳಿಗೆ ಹೆದರುತ್ತಾ ಓಡಾಡಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಎರಡು ವರ್ಷಗಳ ಹಿಂದೆ ಪಟ್ಟಣ ಪಂಚಾಯಿತಿಯವರು ಬೀದಿನಾಯಿಗಳನ್ನು ಹಿಡಿದು ಬೇರೆಡೆ ಬಿಟ್ಟಿದ್ದರು. ಇದರಿಂದ ನಾಯಿಗಳ ಕಾಟ ಕಡಿಮೆಯಾಗಿತ್ತು. ಇದೀಗ ಮತ್ತೆ ಬೀದಿ ನಾಯಿಗಳು ಹೆಚ್ಚಾಗಿರುವುದು ಜನರಲ್ಲಿ ಭಯದ ವಾತಾವರಣ ಮೂಡಿಸಿದೆ.

ಅಲ್ಲದೇ ನಾಯಿಗಳಿಗೆ ಇದೀಗ ವಂಶಾಭಿವೃದ್ಧಿ ಮಾಡುವ ಸಮಯವಾಗಿದೆ. ಇದರಿಂದಾಗಿ ನಾಯಿಗಳು ಹೆಚ್ಚಾಗಿ ರಸ್ತೆಯ ಮೇಲೆ ಹಿಂಡು ಹಿಂಡಾಗಿ ಓಡಾಡುತ್ತಿವೆ.

ಬಸ್‌ ನಿಲ್ದಾಣದಲ್ಲಿ ಮಲಗುವ ನಾಯಿಗಳು : ಪಟ್ಟಣದ ಬನ್ನಿಕಟ್ಟದಲ್ಲಿರುವ ಬಸ್‌ ನಿಲ್ದಾಣದಲ್ಲಿ ಸಂಜೆಯಾಗುತ್ತಿದ್ದಂತೆ ಹತ್ತಾರು ನಾಯಿಗಳು ಜಮಾಗೊಳ್ಳುತ್ತವೆ. ಅಲ್ಲದೆ ಮಳೆ ಸುರಿಯುವುದರಿಂದ ರಾತ್ರಿ ವೇಳೆ ನಾಯಿಗಳು ಈ ಬಸ್‌ನಿಲ್ದಾಣದಲ್ಲಿಯೇ ಮಲಗುತ್ತಿವೆ. ಈ ಬಸ್‌ ನಿಲ್ದಾಣ ಸದ್ಯ ಹಗಲು ಹೊತ್ತಿನಲ್ಲಿ ಸಾರ್ವಜನಿಕರಿಗೆ ಬಳಕೆಯಾದರೆ ರಾತ್ರಿ ವೇಳೆ ನಾಯಿಗಳಿಗೆ ಬಳಕೆಯಾಗುತ್ತಿದೆ.

ಪತ್ರ ಬರೆದ ಪ.ಪಂ. : ಬೀದಿ ನಾಯಿಗಳು ಹೆಚ್ಚಾಗಿರುವ ಕಾರಣ ಅವುಗಳನ್ನು ನಿಯಂತ್ರಿಸಲು ಪಟ್ಟಣ ಪಂಚಾಯಿತಿಯವರು ಸಹಾಯಕ ಪಶು ನಿರ್ದೇಶಕರಿಗೆ ಪತ್ರ ಬರೆದಿದ್ದಾರೆ.

ಶಾಲಾ ವಿದ್ಯಾರ್ಥಿಗಳು ಫುಟ್‌ಪಾತ್‌ ಮೇಲೆ ಓಡಾಡಲು ಭಯ ಪಡುವಂತಾಗಿದೆ ಪಟ್ಟಣದ ಯಾವ ರಸ್ತೆಯಲ್ಲಿ ಹೋದರೂ ನಾಯಿಗಳು ಕಂಡು ಬರುತ್ತಿವೆ. ಸಾರ್ವಜನಿಕರಿಗೆ ನಾಯಿ ಕಚ್ಚಿ ಗಾಯಗೊಳಿಸುವ ಮುನ್ನ ಪಟ್ಟಣ ಪಂಚಾಯಿತಿಯವರು ಈ ನಾಯಿಗಳನ್ನು ಹಿಡಿಸಿ ಬೇರೆಡೆ ಸಾಗಿಸುವ ಕೆಲಸ ಮಾಡುವುದು ಅವಶ್ಯ ಎಂಬ ಮಾತು ಸಾರ್ವಜನಿಕರಿಂದ ಕೇಳಿ ಬರುತ್ತಿದೆ.