ನಿತ್ಯ ಯೋಗದಿಂದ ಸದೃಢ ಆರೋಗ್ಯ

ಯಲ್ಲಾಪುರ : ಪಟ್ಟಣದ ತಟಗಾರ ರಸ್ತೆಯಲ್ಲಿರುವ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿಶನಿವಾರ ಯೋಗ ಸಪ್ತಾಹ ದಿನಾಚರಣೆ ಹಮ್ಮಿಕೊಳ್ಳಲಾಗಿತ್ತು.

ಕಾರ್ಯಕ್ರಮದಲ್ಲಿಉಪನ್ಯಾಸಕರಾಗಿ ಆಗಮಿಸಿದ್ದ ಪತಂಜಲಿ ಯೋಗ ಸಮಿತಿಯ ಜಿಲ್ಲಾಯೋಗ ವಿಸ್ತಾರಕ ಸಂತೋಷ್‌ ಗುಡಿಗಾರ್‌ ಮಕ್ಕಳನ್ನು ಉದ್ದೇಶಿಸಿ ಮಾತನಾಡಿ, ಜೇನುಹುಳುಗಳು ಹೂವಿನ ಮಕರಂದವನ್ನು ಮಾತ್ರ ಹೀರಿ ಹೂವಿನ ಗಿಡವನ್ನು ಹಾಳುಮಾಡದೆ ಜೇನುತುಪ್ಪವನ್ನು ತಯಾರಿಸಿ ಪರರ ಉಪಯೋಗಕ್ಕೆ ಸಿಗುವಂತೆ ಮಾಡುತ್ತವೆ. ಮನುಷ್ಯರಾದ ನಾವು ಸಹ ಇದೇ ರೀತಿ ಪರರಿಗೆ ಸಹಾಯಕರಾಗಿ ಬದುಕಬೇಕು ಎಂದರು.

ವೃಕ್ಷಕ್ಕೆ ನೀರನ್ನು ಎರೆಯುವ ಮೂಲಕ ಪ್ರಾಂಶುಪಾಲ ಸಂಜಯ ನಾಯಕ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ಆರೋಗ್ಯದಿಂದ ಇರಬೇಕಾದರೆ ನಾವೆಲ್ಲರೂ ಯೋಗವನ್ನು ನಮ್ಮ ನಿತ್ಯ ಜೀವನದಲ್ಲಿಅಳವಡಿಸಿಕೊಳ್ಳಬೇಕು ಎಂದರು. ಪ್ರಭಾರಿ ನಿಲಯ ಪಾಲಕ ಶಿವರಾಂ ಭಾಗವತ್‌, ಶಿಕ್ಷಕರಾದ ಶಂಕರಾನಂದ, ಮನೋಹರ್‌ ಎಲ್‌.ನಾಯಕ್‌, ಶಾಲಾ ಸಂಸತ್ತಿನ ಪ್ರತಿನಿಧಿ ದೀಕ್ಷಿತ್‌ ನಾಯ್ಕ, ಸ್ನೇಹ ರಾಥೋಡ್‌, ಶಾಲಾಮಕ್ಕಳು ಉಪಸ್ಧಿತರಿದ್ದರು. ರೇಣುಕಾ ಸಂಗಡಿಗರು ಪ್ರಾರ್ಥನಾ ಗೀತೆ ಹಾಡಿದರು.