ತಳಪಾಯ ಕಿತ್ತು ಹಾಕಿದರು..

ಸಿದ್ದಾಪುರ : ಕಟ್ಟುತ್ತಿರುವ ಮನೆ ಅರಣ್ಯ ಭೂಮಿಯಲ್ಲಿದೆ ಎಂದು ಅರಣ್ಯಾಧಿಕಾರಿಗಳು ಮನೆಯ ತಳಪಾಯವನ್ನು ಕಿತ್ತುಹಾಕಿರುವ ಅಮಾನವಿಯ ಘಟನೆ ಶುಕ್ರವಾರ ತಾಲೂಕಿನ ಬಿಳಗಿ ಸಮೀಪದ ಕಳೂರು ಮುಂಡಿಗೆಮನೆಯಲ್ಲಿನಡೆದಿದೆ.

ಕಳೂರಿನ ಪುಟ್ಟಾ ಗಿರಿಯಾ ನಾಯ್ಕ ಎನ್ನುವವರು ಮನೆಗಾಗಿ ಜಿಪಿಎಸ್‌ ಆದ ಜಮೀನು ಹೊಳೆಯ ಸಮೀಪವಿದೆ. ಅತಿವೃಷ್ಟಿಯ ಸಂದರ್ಭದಲ್ಲಿಮನೆ ಮುಳುಗಡೆಯಾಗಬಹುದು ಎಂಬ ಭಯದಿಂದ ಜಿಪಿಎಸ್‌ ಆದ ಜಾಗದಿಂದ ಕೆಲವೇ ಅಂತರದಲ್ಲಿರುವ ಅರಣ್ಯ ಭೂಮಿಯಲ್ಲಿಮನೆಕಟ್ಟುತ್ತಿದ್ದರು. ಕಳೆದ ಒಂದು ವಾರದಿಂದ ಅರಣ್ಯ ಅಧಿಕಾರಿಗಳು ಭೇಟಿ ನೀಡಿ ಮನೆಯನ್ನು ಕೆಡವುತ್ತೇವೆ ಎಂದು ಹೆದರಿಸುತ್ತಿದ್ದರು. ಶುಕ್ರವಾರ ಪುನಃ ಬಂದ ಅರಣ್ಯ ಅಧಿಕಾರಿಗಳು ತಳಪಾಯವನ್ನು ಕಿತ್ತು ಹೋಗಿದ್ದಾರೆ ಎಂದು ಪುಟ್ಟಾ ನಾಯ್ಕ ಆರೋಪಿಸಿದ್ದಾರೆ. '' ಅತಿವೃಷ್ಟಿಯಾದರೆ ತೊಂದರೆಯಾಗುತ್ತದೆ. ಆದ್ದರಿಂದ ಮನೆಯನ್ನು ಇಲ್ಲಿಕಟ್ಟಿಕೊಳ್ಳುತ್ತೇನೆ. ಜಿಪಿಎಸ್‌ ಆದ ಜಾಗವನ್ನು ಅರಣ್ಯ ಇಲಾಖೆಗೆ ಹಸ್ತಾಂತರಿಸುತ್ತೇನೆ. ಮನೆಕಟ್ಟಲು ಅವಕಾಶ ನೀಡಿ. ಸ್ಪೀಕರ್‌ ಕಾಗೇರಿ ಅಧಿವೇಶನದಲ್ಲಿದ್ದಾರೆ. ಅವರು ಬರುವವರೆಗೆ ಯಾವುದೇ ಕ್ರಮ ತೆಗೆದುಕೊಳ್ಳಬೇಡಿ ಎಂದು ಹೇಳಿದರೂ ಅರಣ್ಯ ಅಧಿಕಾರಿಗಳು ನನ್ನ ಮಾತಿಗೆ ಕವಡೆ ಕಿಮ್ಮತ್ತನ್ನು ನೀಡಿಲ್ಲ'' ಎಂದು ಪುಟ್ಟಾ ನಾಯ್ಕ ಆರೋಪಿಸಿದ್ದಾರೆ.