ಕೊನೆಗೂ ಶುರುವಾಯಿತು ರಸ್ತೆ ಡಾಂಬರಿಕರಣ

ಕುಮಟಾ : ಜನರ ಪ್ರತಿಭಟನೆ ಹಾಗೂ ಆಕ್ರೋಶಕ್ಕೆ ಕರಗಿದ ಅಧಿಕಾರಿಗಳು ಕೊನೆಗೂ ಹೆರವಟ್ಟಾ ರಸ್ತೆಗೆ ಡಾಂಬರಿಕರಣದ ಭಾಗ್ಯ ನೀಡಿದ್ದಾರೆ.

ಕಳೆದ 3 ವರ್ಷಗಳಿಂದ ಹಾಳಾದ ರಸ್ತೆಯಲ್ಲಿ ಜನರ ಓಡಾಟ ದುಸ್ತರವಾಗಿತ್ತು. ರೋಸಿ ಹೋದ ಜನತೆ ರಸ್ತೆ ದುರಸ್ತಿ ಕಾಮಗಾರಿಗೆ ಆಗಾಗ ಪ್ರತಿಭಟನೆ ನಡೆಸುತ್ತಿದ್ದರು. ಕಳೆದ ಗುರುವಾರ ಮಾಡು ಇಲ್ಲವೆ ಮಡಿ ಹೋರಾಟಕ್ಕೆ ಇಳಿದ ಅಕ್ಕ ಪಕ್ಕದ ಊರುಗಳ ಹಾಗೂ ಸ್ಥಳೀಯರು ಸಹಸ್ರಾರು ಸಂಖ್ಯೆಯಲ್ಲಿ ಪ್ರತಿಭಟನೆ ನಡೆಸಿ ರಸ್ತೆ ತಡೆ ನಡೆಸಿದ್ದರು. ಜನರ ಭಾರಿ ಪ್ರತಿಭಟನೆಗೆ ಬೆಚ್ಚಿಬಿದ್ದ ಅಧಿಕಾರಿಗಳು ಮರುದಿನವೇ ಕಾಮಗಾರಿ ನಡೆಸುವದಾಗಿ ಭರವಸೆ ನೀಡಿದ್ದರು.

ಶನಿವಾರ ರಸ್ತೆಗೆ ಡಾಂಬರೀಕರಣದ ಭಾಗ್ಯ ದೊರೆಯಿತು. ಇದರಿಂದ ಕಂಗೆಟ್ಟಿದ ಜನರು ಸಮಾಧಾನದ ನಿಟ್ಟುಸಿರು ಬಿಟ್ಟಿದ್ದಾರೆ. ಎಂದೋ ನಡೆಯಬೇಕಾದ ಕಾಮಗಾರಿ 3 ವರ್ಷ ವಿಳಂಬವಾಗಿ ನಡೆಯುತ್ತಿರುವದು ಅಧಿಕಾರಿಗಳ ಬೇಜವಾಬ್ದಾರಿ ಧೋರಣೆಗೆ ಹಿಡಿದ ಕೈಗನ್ನಡಿಯಾಗಿದೆ. ನಿತ್ಯ ಈ ರಸ್ತೆಯಿಂದ ಓಡಾಡುವ ಜನ ಅಧಿಕಾರಿಗಳಿಗೆ ಶಾಪ ಇಡುವದನ್ನು ಮರೆಯುತ್ತಿರಲಿಲ್ಲ. ಆದರೆ ರಸ್ತೆ ಕಾಮಗಾರಿ ಪ್ರಾರಂಭಗೊಂಡಿರುವದರಿಂದ ಹಲವಾರು ಜನರ ಮೊಗದಲ್ಲಿ ಮಂದಹಾಸ ಕಂಡು ಬಂದಿತು.