ಕಾಲು ಜಾರಿ ಬಿದ್ದು ಸಾವು

ಹೊನ್ನಾವರ (ಉತ್ತರ ಕನ್ನಡ) : ತಾಲೂಕಿನ ಹಾಡಗೇರಿಯಲ್ಲಿ ನೆರೆ ಹಾವಳಿಯಿಂದ ಕೊಚ್ಚಿ ಹೋಗಿದ್ದ ಮನೆ ಎದುರಿನ ಅಡಕೆ ಮರದ ಬುಡಗಳಿಗೆ ದಿಬ್ಬದ ಮಣ್ಣು ಅಗೆದು ತಂದು ಹಾಕುತ್ತಿದ್ದ ಮಹಿಳೆ ಕಾಲು ಜಾರಿ ಬಿದ್ದು ಗುರುವಾರ ಮೃತಪಟ್ಟಿದ್ದಾರೆ.

ಸೀತು ಅನಂತ ನಾಯ್ಕ (52) ಎಂಬುವರೇ ಮೃತರು. ಕಳೆದ ವಾರ ಗುಂಡಬಾಳ ನದಿಯ ಪ್ರವಾಹದಲ್ಲಿ ಇವರ ಮನೆಯಲ್ಲಿ ನೀರು ತುಂಬಿದ್ದರಿಂದ ಹತ್ತಿರದ ಸರಕಾರಿ ಶಾಲೆಯಲ್ಲಿ ತೆರೆದ ಕಾಳಜಿ ಕೇಂದ್ರದಲ್ಲಿ ತಮ್ಮ ಕುಟುಂಬದೊಂದಿಗೆ ಆಶ್ರಯ ಪಡೆದಿದ್ದರು. ಈಗ ನೆರೆ ಇಳಿದಿದ್ದರಿಂದ ಮನೆಗೆ ಮರಳಿದ್ದರು. ಹೊನ್ನಾವರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.