ಚಿರತೆ ಎರಗಿ ಗಾಯ

ಅಂಕೋಲಾ : ಆಹಾರ ಹುಡುಕುತ್ತ ನಾಡಿಗೆ ಬಂದ ಚಿರತೆಯೊಂದು ವ್ಯಕ್ತಿಯೊಬ್ಬನ ಮೇಲೆ ಎರಗಿ ಕಚ್ಚಿ ಗಾಯಗೊಳಿಸಿದ ಘಟನೆ ತಾಲೂಕಿನ ಅಚವೆ ಗ್ರಾಮದ ಕಂಚನಕೇರಿಯಲ್ಲಿ ಗುರುವಾರ ನಡೆದಿದೆ.

ಶಂಕರ ರಾಮಾ ಗೌಡ ಗಾಯಗೊಂಡವರು. ಅವರನ್ನು ಇಲ್ಲಿನ ಸಾರ್ವಜನಿಕ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಶಂಕರ ಗೌಡ ಅವರ ಮನೆಯ ಕೋಳಿಯ ಗೂಡಿಗೆ ನುಗ್ಗಿದ್ದ ಚಿರತೆಯನ್ನು ಓಡಿಸಲು ಹೋದಾಗ ಚಿರತೆ ದಾಳಿ ಮಾಡಿದೆ. ಶಂಕರ ಅವರ ಸಹೋದರ ಹೊನ್ನಾ ರಾಮಾ ಗೌಡ ಅವರು ಮನೆಯಲ್ಲಿ ಸಾಕಿದ್ದ ನಾಯಿಗಳ ಜತೆ ಸೇರಿ ಚಿರತೆಯನ್ನು ಹೆದರಿಸಿ ಓಡಿಸಿದ್ದಾರೆ.

ಅಂಕೋಲಾದ ಸಹಾಯಕ ಅರಣ್ಯ ಸಂರಕ್ಷ ಣಾಧಿಕಾರಿ ನಂಜುಂಡಪ್ಪ, ಉಪ ವಲಯ ಅರಣ್ಯಾಧಿಕಾರಿ ಸುರೇಶ ನಾಯ್ಕ, ಆಸ್ಪತ್ರೆಗೆ ಭೇಟಿ ನೀಡಿ ಗಾಯಾಳು ಶಂಕರ ಗೌಡ ಅವರನ್ನು ಸಂತೈಸಿದರು.

ನಂತರ ಎಸಿಎಫ್‌ ನಂಜುಂಡಪ್ಪ ಮಾತನಾಡಿ, ಶಂಕರ ಗೌಡ ಅವರು ಸಂಪೂರ್ಣ ಚೇತರಿಸಿಕೊಳ್ಳುವವರೆಗೂ ಆಸ್ಪತ್ರೆಯ ಹಾಗೂ ಇತರೆ ವೆಚ್ಚಗಳನ್ನು ಇಲಾಖೆಯಿಂದ ನೀಡಲಾಗುವುದು, ಈ ಬಗ್ಗೆ ಪಂಚನಾಮೆ ದಾಖಲಿಸಿ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದರು.