ಕರುವಿನ ಮೇಲೆ ಹುಲಿ ದಾಳಿ

ಶಿರಸಿ: ತಾಲೂಕಿನ ಮತ್ತಿಘಟ್ಟಾ ಮುಂಡಗನಮನೆ ಗ್ರಾಮದ ಸಣ್ಣಜೋಗಿನಕೇರಿ ಗ್ರಾಮದಲ್ಲಿ ಆಕಳ ಕುರುವಿನ ಮೇಲೆ ಹುಲಿ ದಾಳಿ ಮಾಡಿ ಗಾಯಗೊಳಿಸಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಕಳೆದ ತಿಂಗಳಿನಿಂದ ಈ ಭಾಗದ ಹಸೆಮನೆ, ದೇವನಮನೆ ಮುಂತಾದ ಭಾಗದಲ್ಲಿ ಆರೇಳು ಹಸುಗಳು ಹುಲಿಯ ದಾಳಿಗೆ ಬಲಿಯಾಗಿದ್ದು ಆತಂಕ ಸೃಷ್ಟಿಸಿದೆ. ಇದೀಗ ಇಲ್ಲಿನ ಸಣ್ಣಜೋಗಿನಕೇರಿ ಬಳಿ ಸೋಮವಾರ ಕೊಟ್ಟಿಗೆಯಂಚಿನಲ್ಲೇ ಕರುವನ್ನು ತಿನ್ನುವ ಪ್ರಯತ್ನ ನಡೆದಿತ್ತು. ಆದರೆ ಕರುವಿನ ಕೂಗಾಟ ಕೇಳಿ ಜನರು ಬೊಬ್ಬೆ ಹಾಕಿದ್ದರಿಂದ ಹುಲಿ ಬಿಟ್ಟು ಓಡಿ ಹೋಗಿದೆ ಎಂದು ಇಲ್ಲಿನ ರಾಮ ಉಮಾಮಹೇಶ್ವರ ಹೆಗಡೆ ತಿಳಿಸಿದ್ದಾರೆ.

ಅರಣ್ಯಾಧಿಕಾರಿಗಳು ಸ್ಥಳಕ್ಕೆ ಬಂದು ಪರಿಶೀಲಿಸಿದ್ದಾರೆ. ಕರುವಿಗೆ ಪಶುವೈದ್ಯರಿಂದ ಚಿಕಿತ್ಸೆ ನೀಡಲಾಗಿದೆ. ಕೆಲವರು ವಾಹನದಲ್ಲಿ ತೆರಳುವಾಗ ಎರಡು ಹುಲಿ ಓಡಾಡುತ್ತಿದ್ದುದನ್ನು ಕಂಡಿರುವ ಬಗ್ಗೆ ಹೇಳಿದ್ದಾರೆ. ಈ ಭಾಗಗಳಲ್ಲಿ ಜನರು ಓಡಾಡುವುದಕ್ಕೆ ಭಯ ಹೆಚ್ಚುವಂತಾಗಿದೆ ಎಂದು ಅವರು ತಿಳಿಸಿದ್ದಾರೆ.