ದುರಸ್ತಿ ಕಾಣದ ಕಾಚನಬಟ್ಟಿ- ಡೊಂಗ್ರಿ ರಸ್ತೆ

ಅಂಕೋಲಾ : ಗ್ರಾಮೀಣ ಪ್ರದೇಶಗಳ ಅಭಿವೃದ್ಧಿಯ ಕನಸು ಕನಸಾಗಿಯೇ ಉಳಿದಿದೆ. ತಾಲೂಕಿನ ಕಾಚನಬಟ್ಟಿ- ಡೊಂಗ್ರಿ ರಸ್ತೆ ಸಂಪೂರ್ಣ ಹದಗೆಟ್ಟಿದ್ದು, ಪ್ರಯಾಣಿಕರು ಈ ಮಾರ್ಗದಲ್ಲಿಸಾಗುವಾಗ ಹೈರಾಣಾಗುತ್ತಿದ್ದಾರೆ.

ಹಿಲ್ಲೂರು, ಹೊಸಕಂಬಿ ಮಾರ್ಗವಾಗಿ ಕಾಚನಬಟ್ಟಿ ಮೂಲಕ ಡೊಂಗ್ರಿ ಸೇರಿದಂತೆ ಅನೇಕ ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸುವ ರಸ್ತೆ ಅನಾದಿ ಕಾಲದಿಂದಲೂ ಇದ್ದು, ಈ ರಸ್ತೆ 10 ವರ್ಷಗಳ ಹಿಂದೆ ಡಾಂಬರೀಕರಣವಾಗಿ ಜನರಿಗೆ ಅನುಕೂಲವಾಗಿತ್ತು.

ಆದರೆ ಹಾಕಿದ ಡಾಂಬರು ರಸ್ತೆಯಲ್ಲಿಮಾಯವಾಗಿ ಶಿವನ ಪಾದ ಸೇರಿದೆ. ಡಾಂಬರು ಬಳಸದೇ ಜಲ್ಲಿಕಲ್ಲುಗಳಿಂದ ರಸ್ತೆಯನ್ನು ನಿರ್ಮಿಸಿರುವಂತೆ ಜಲ್ಲಿಗಳೇ ರಸ್ತೆಯಲ್ಲಿಕಂಡು ಬರುತ್ತಿವೆ. ತಮ್ಮೂರಿಗೆ ಬೇಗ ಹೋಗಿ ತಲುಪಬೇಕೆಂದು ವಾಹನಗಳನ್ನು ವೇಗವಾಗಿ ಚಲಿಸಿದರೆ ಟಾಯರ್‌ಗಳಿಗೆ ಕಲ್ಲುಬಡಿದು ಅರ್ಧದಲ್ಲಿಯೇ ಠಿಕಾಣಿ ಹೂಡಬೇಕಾದ ದುಸ್ಥಿತಿ ಎದುರಾಗುತ್ತದೆ. ಬೈಕ್‌ ಸವಾರರಂತೂ ಸಿಡಿಯುವ ಕಲ್ಲುಗಳ ಹೊಡೆತಕ್ಕೆ ಕಾಲಿಗೆ ಗಾಯ ಮಾಡಿಕೊಂಡ ಘಟನೆಗಳೂ ಇವೆ. ಇನ್ನಾದರೂ ಸಂಬಂಧಪಟ್ಟವರು ಈ ರಸ್ತೆ ಅಭಿವೃದ್ಧಿಗೆ ಮುಂದಾಗಲಿ.