ಇಂದು ಗಾಯನ ವಾದನ

ಶಿರಸಿ: ನಿನಾದ ಸಂಗೀತ ಸಭಾವು ಜು.21ರಂದು ಗುರುಪೂರ್ಣಿಮೆ ಸಂಗೀತ ಕಾರ್ಯಕ್ರಮವನ್ನು ನಗರದ ಸಾಮ್ರಾಟ್‌ ವಿನಾಯಕ ಹಾಲ್‌ನಲ್ಲಿ ಏರ್ಪಡಿಸಿದೆ. ಬೆಳಗ್ಗೆ 10ಕ್ಕೆ ಸಂಗೀತ ಶಾಲೆಯ ವಿದ್ಯಾರ್ಥಿಗಳಿಂದ ಸಂಗೀತ ಕಾರ್ಯಕ್ರಮ ನಡೆಯಲಿದೆ. ಸಂಜೆ 4ಕ್ಕೆ ನಡೆಯುವ ಸಭಾ ಕಾರ್ಯಕ್ರಮದಲ್ಲಿ ಹೆಸರಾಂತ ಸಂಗೀತ ಕಲಾವಿದ ಪೂರ್ಣಿಮಾ ಭಟ್ಟ ಕುಲಕರ್ಣಿ ಅವರನ್ನು ಸನ್ಮಾನಿಸಲಾಗುತ್ತಿದೆ.

ಹಿರಿಯ ಸಂಗೀತ ಕಲಾವಿದ ಪಂಡಿತ ಎಂ.ಪಿ.ಹೆಗಡೆ ಪಡಿಗೆರೆ ಅಧ್ಯಕ್ಷ ತೆ ವಹಿಸುವರು. ಸಾಮಾಜಿಕ ಕಾರ್ಯಕರ್ತ ವೆಂಕಟೇಶ ಹೆಗಡೆ ಹೊಸಬಾಳೆ, ಡಿಐಜಿ ಆರ್‌.ದಿಲೀಪ್‌ ಭಾಗವಹಿಸುವರು. ನಂತರ ನಡೆಯುವ ಸಂಗೀತ ಕಾರ್ಯಕ್ರಮದಲ್ಲಿ ಗಾಯಕರಾದ ಪೂರ್ಣಿಮಾ ಭಟ್ಟ ಕುಲಕರ್ಣಿ, ಬಕುಲಾ ಹೆಗಡೆ ಗಾಯನ ಸಾದರ ಪಡಿಸುವರು. ಗೋಪಾಲಕೃಷ್ಣ ಹೆಗಡೆ ಕಲಬಾಗ, ಗಜಾನನ ಹೆಗಡೆ ಗಿಳಿಗುಂಡಿ ತಬಲಾ ಸಾಥ್‌ ನೀಡುವರು. ಭರತ ಹೆಗಡೆ ಹೆಬ್ಬಲಸು ಸಂವಾದಿನಿ ಸಾಥ್‌ ನೀಡುವರು. ಇದೇ ಸಂದರ್ಭದಲ್ಲಿ ಐಪಿಎಸ್‌ ಅಧಿಕಾರಿ ಆರ್‌.ದಿಲೀಪ ಮೃದಂಗ ಹಾಗೂ ಲಕ್ಷ್ಮೀಶರಾವ್‌ ಕಲ್ಗುಂಡಿಕೊಪ್ಪ ಅವರಿಂದ ತಬಲಾ ಜುಗಲಬಂದಿ ಆಯೋಜಿಸಲಾಗಿದೆ.