ಟಿಕೆಟ್‌ ಆಕಾಂಕ್ಷಿಗಳ ರಾಜಧಾನಿ ಸುತ್ತಾಟ

ಶಿರಸಿ : ಸಾರ್ವತ್ರಿಕ ಚುನಾವಣೆಯ ಟಿಕೆಟ್‌ ಆಕಾಂಕ್ಷೆಗಳು ಕ್ಷೇತ್ರದಲ್ಲಿ ಸುತ್ತಾಡಿಕೊಂಡು ಇರುವ ಕಾಲ ಇದಲ್ಲ. ಅಂತೆಯೇ ಅನೇಕ ಆಕಾಂಕ್ಷಿಗಳು ರಾಜಧಾನಿಯಲ್ಲಿ ಸುತ್ತಾಟ ನಡೆಸುತ್ತಿದ್ದಾರೆ.

ರಾಜ್ಯದ ರಾಜಧಾನಿ ಮಾತ್ರವಲ್ಲ. ಕೆಲವು ಆಕಾಂಕ್ಷಿಗಳು ರಾಷ್ಟ್ರದ ರಾಜಧಾನಿಗೂ ಮಹದಾಸೆಯಿಂದ ಹೋಗಿಬರುತ್ತಿದ್ದಾರೆ.

ರಾಷ್ಟ್ರಮಟ್ಟದ ಹೈಕಮಾಂಡ್‌ ಹಿಡಿತ ಹೆಚ್ಚಾಗಿರುವ ಕಾಂಗ್ರೆಸ್‌ ಪಕ್ಷ ದಲ್ಲಿ ಹೀಗೆ ದೆಹಲಿಯ ಕದ ತಟ್ಟಿದವರಿದ್ದಾರೆ.

ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷ ಭೀಮಣ್ಣ ನಾಯ್ಕ ಶಿರಸಿ ಸಿದ್ದಾಪುರ ಕ್ಷೇತ್ರದ ಟಿಕೆಟ್‌ ಆಕಾಂಕ್ಷಿಯಾಗಿ ಮೊನ್ನೆಯಷ್ಟೇ ದೆಹಲಿಗೆ ಭೇಟಿ ನೀಡಿದ್ದಾರೆ.

ಇದೇ ಕ್ಷೇತ್ರಕ್ಕೆ ಕಾಂಗ್ರೆಸ್‌ ಟಿಕೆಟ್‌ ಆಕಾಂಕ್ಷಿ ನಿವೇದಿತ್‌ ಅಳ್ವಾ ಮತ್ತು ಕುಮಟಾ ಕ್ಷೇತ್ರದ ಆಕಾಂಕ್ಷಿ ಆರ್‌.ಎಚ್‌ . ನಾಯ್ಕ ಅವರೂ ಸಹ ದೆಹಲಿಯಲ್ಲಿ ಹೈಕಮಾಂಡ್‌ ಭೇಟಿಯಾಗಿರುವ ಬಗ್ಗೆ ಪಕ್ಷ ದ ಮೂಲ ತಿಳಿಸುತ್ತದೆ.

ಇನ್ನೊಂದೆಡೆ, ರಾಜಧಾನಿ ಬೆಂಗಳೂರನ್ನು ಸಂಪರ್ಕ ಮಾಡುತ್ತಿರುವ ಟಿಕೆಟ್‌ ಆಕಾಂಕ್ಷಿಗಳ ಪಟ್ಟಿ ಇನ್ನೂ ಉದ್ದವಿದೆ.

ಪಕ್ಷ ದ ನಿಯಮಾವಳಿಯಂತೆ ಆಕಾಂಕ್ಷಿಗಳು ಬೆಂಗಳೂರಿಗೆ ಹೋಗಿಯೇ ಟಿಕೆಟಿಗೆ ಅರ್ಜಿ ಸಲ್ಲಿಸಬೇಕಾಗಿದೆ. ಅಂತೆಯೇ, ಈಗಾಗಲೇ ,20 ರಷ್ಟು ಆಕಾಂಕ್ಷಿಗಳು ರಾಜಧಾನಿಗೆ ತೆರಳಿ ಅರ್ಜಿ ಕೊಟ್ಟು ಬಂದಿದ್ದಾರೆ.

ಇವರಲ್ಲಿ ಆರು ಕ್ಷೇತ್ರಗಳ ಪೈಕಿ ಮೂರ್ನಾಲ್ಕು ಕ್ಷೇತ್ರಕ್ಕೆ ಮಾತ್ರ ಕೆಲವರಷ್ಟೇ ತೀವ್ರ ಪ್ರಯತ್ನ ನಡೆಸುವವರಿದ್ದು ಮತ್ತೆ ಮತ್ತೆ ಬೆಂಗಳೂರು ಸುತ್ತಾಟ ಮಾಡಬೇಕಾಗಿದೆ.

ಬಿಜೆಪಿಯಲ್ಲೂ ಸುತ್ತಾಟ : ಕಾಂಗ್ರೆಸ್‌ ಪಕ್ಷ ಕ್ಕೆ ಹೋಲಿಸಿದ ಬಿಜೆಪಿಯಲ್ಲಿ ಹೀಗೆ ರಾಜಧಾನಿ ಗೆ ಎಡತಾಕುವವರ ಸಂಖ್ಯೆ ಕಡಿಮೆ ಎನ್ನಬಹುದು. ಅದಕ್ಕೆ ಬಿಜೆಪಿ ವರಿಷ್ಟರು ಹೆಚ್ಚು ಬೆಲೆ ಕೊಡುವುದಿಲ್ಲ ಎನ್ನುವದೂ ಇದಕ್ಕೆ ಕಾರಣ ಎಂಬ ಮಾತುಗಳು ಕೇಳಿ ಬರುತ್ತಿವೆ. ಜತೆಗೆ ರಾಜಧಾನಿಗೆ ಹೋಗಿ ಅರ್ಜಿ ಸಲ್ಲಿಸಬೇಕಾದ ನಿಯಮಾವಳಿಯೂ ಬಿಜೆಪಿ ಯಲ್ಲಿ ಇಲ್ಲವೆನ್ನುತ್ತಾರೆ ಪಕ್ಷದ ಮುಖಂಡರು. ಅದರೂ ಇತ್ತೀಚಿಗೆ ಪಕ್ಷ ಸೇರಿ ಆಕಾಂಕ್ಷಿಯಾದವರು ತಮ್ಮ ರೂಢಿಯಂತೆ ಬೆಂಗಳೂರು ಭೇಟಿ ಮಾಡುತ್ತಿದ್ದಾರೆಂದು ಗೊತ್ತಾಗಿದೆ.