ನೀರು ಪೂರೈಕೆ ಸಿಬ್ಬಂದಿ ಪ್ರತಿಭಟನೆ ಮುಕ್ತಾಯ

ಜೋಯಿಡಾ : ತಾಲೂಕಿನ ರಾಮನಗರದಲ್ಲಿ ನೀರು ಪೂರೈಸುವ ಸಿಬ್ಬಂದಿ ವಿವಿಧ ಬೇಡಿಕೆ ಈಡೇರಿಕೆಗೆ ಒತ್ತಾಯಿಸಿ ಆರಂಭಿಸಿದ್ದ ಪ್ರತಿಭಟನೆಯನ್ನು ಕೊನೆಗೊಳಿಸಿದ್ದಾರೆ.

ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳ ಜತೆ ಚರ್ಚಿಸಿ ಪ್ರತಿಭಟನೆಯನ್ನು ಮುಕ್ತಾಯಗೊಳಿಸಿದ್ದಾರೆ. ಮೂಲಕ ಕೊನೆಗೊಂಡಿದೆ.

ಕಳೆದ ಒಂದು ವಾರದಿಂದ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ನೀರು ಬಿಡುವ ಸಿಬ್ಬಂದಿ ಸಮರ್ಪಕ ವೇತನ ಮತ್ತು ವಿವಿಧ ಬೇಡಿಕೆಗೆ ಆಗ್ರಹಿಸಿ ನೀರು ಪೂರೈಸದೇ ಪ್ರತಿಭಟಿಸುತ್ತಿದ್ದರು. ರಾಮನಗರ ಗ್ರಾಮ ಪಂಚಾಯಿತಿಯಲ್ಲಿ ತುರ್ತು ಸಭೆ ನಡೆಸಿದ ಅಧಿಕಾರಿಗಳು ಮತ್ತು ಜನಪ್ರತಿನಿಧಿಗಳು ಪ್ರತಿಭಟನಾ ನಿರತ ಸಿಬ್ಬಂದಿಗಳನ್ನು ಸಮಾಧಾನ ಪಡಿಸಿ ಅವರನ್ನು ಕಾಯಂ ಗೊಳಿಸುವ ಬಗ್ಗೆ ಸರಕಾರ ಮಟ್ಟದಲ್ಲಿ ಪ್ರಯತ್ನಿಸುತ್ತೇವೆ, ತಿಂಗಳಿಗೆ 6 ಸಾವಿರ ಹಾಗೂ ಬಾಕಿ ನೀಡಬೇಕಿರುವ ನಾಲ್ಕು ತಿಂಗಳ ಸಂಬಳವನ್ನು 5 ಸಾವಿರ ರೂ. ನೀಡುವುದಾಗಿ ಭರವಸೆ ನೀಡಿದ ಮೇಲೆ ಸಿಬ್ಬಂದಿ ಪ್ರತಿಭಟನೆ ಕೈ ಬಿಟ್ಟರು.

ಜಿ.ಪಂ. ಸದಸ್ಯ ಸಂಜಯ ಹಣಬರ, ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆಯ ಅಭಿಯಂತರ ತಾನಾಜಿ ವಾಡಿಕರ, ರಾಮನಗರ ಗ್ರಾ.ಪಂ. ಅಧ್ಯಕ್ಷ ವಿನೋದ ದೇಸಾಯಿ, ರಾಮನಗರ ತಾ.ಪಂ. ಸದಸ್ಯ ಶರತ್‌ಚಂದ್ರ ಗುರ್ಜರ, ಗ್ರಾ.ಪಂ. ಉಪಾಧ್ಯಕ್ಷೆ ರೇವತಿ ಬಾಮೈಕರ, ಗ್ರಾ.ಪಂ. ಸದಸ್ಯರಾದ ಶಿವಾಜಿ ಗೋಸಾವಿ, ರಾಜೇಶ ಕೊರಡಕರ, ಮಂಗಲಾ ದೇಸಾಯಿ ಮುಂತಾದವರು ಇದ್ದರು.