ಹದ ಮಳೆ ಕೃಷಿಗೆ ಕಳೆ

ಯಲ್ಲಾಪುರ : ಕಳೆದ ಕೆಲ ದಿನಗಳಿಂದ ತಾಲೂಕಿನಲ್ಲಿ ಸ್ವಲ್ಪ ಇಳಿಮುಖವಾಗಿದ್ದ ಮಳೆ ಈಗ ಎರಡು ದಿನಗಳಿಂದ ಮತ್ತೆ ಜೋರಾಗಿದೆ. ಹದ ಮಳೆ ಸುರಿಯುತ್ತಿರುವುದರಿಂದ ಕೃಷಿಕರು ಭತ್ತದ ನಾಟಿ ಕಾರ್ಯಕ್ಕೆ ಚಾಲನೆ ನೀಡಿದ್ದಾರೆ.

ತಾಲೂಕಿನಲ್ಲಿಸುಮಾರು 4250 ಹೆಕ್ಟೇರ್‌ ಭತ್ತ ಬೆಳೆಯುವ ಪ್ರದೇಶವಿದ್ದು, ಈ ಬಾರಿಯ ಮುಂಗಾರು ಸರಿಯಾದ ಸಮಯಕ್ಕೆ ಶುರುವಾದ ಕಾರಣ ಬೀಜ ಬಿತ್ತನೆ ಕಾರ್ಯವು ಯಾವುದೇ ಅಡ್ಡಿ,ಆತಂಕ ಇಲ್ಲದೇ ನಡೆದ ಪರಿಣಾಮ ಪ್ರಸಕ್ತ ಭತ್ತದ ಸಸಿಗಳು ನಾಟಿ ಮಾಡುವ ಹಂತಕ್ಕೆ ಬಂದಿದ್ದು, ರೈತರು ನಾಟಿ ಕಾರ್ಯದ ಭರಾಟೆಯಲ್ಲಿದ್ದಾರೆ. ಈ ವರ್ಷ ಅಪರೂಪಕ್ಕೆ ಎಂಬಂತೆ ಪ್ರಾರಂಭದಿಂದಲೇ ಭತ್ತದ ಬೀಜ ಭಿತ್ತನೆ ಕಾರ್ಯಕ್ಕೆ ಹಾಗೂ ಸಸಿ ನಾಟಿ ಕಾರ್ಯಕ್ಕೆ ಉತ್ತಮ ವಾತಾವರಣ ನಿರ್ಮಾಣವಾಗಿದೆ. ಹೀಗಾಗಿ ರೈತರ ಮೊಗದಲ್ಲಿಮಂದಹಾಸ ಮೂಡಿದೆ.

ಕಾರ್ಮಿಕರ ಕೊರತೆ : ಪ್ರಸಕ್ತ ಹಂಗಾಮಿನಲ್ಲಿಭತ್ತದ ನಾಟಿ ಕಾರ್ಯ ಜೋರಾಗಿ ನಡೆಯುತ್ತಿದ್ದರೂ,ಕೆಲವೆಡೆ ಈ ಕಾರ್ಯ ಸ್ವಲ್ಪ ವಿಳಂಬವಾಗುತ್ತಿದೆ. ಗ್ರಾಮೀಣ ಭಗದಲ್ಲಿ ಕೃಷಿ ಕಾರ್ಮಿಕರ ಕೊರತೆ ಹೆಚ್ಚಾಗಿ ಕಂಡುಬಂದಿದ್ದು, ನಾಟಿ ಕಾರ್ಯಕ್ಕೆ ತುಸು ಅಡಚಣೆ ಉಂಟುಮಾಡಿದೆ. ಕೃಷಿ ಕಾರ್ಮಿಕರ ಕೊರತೆ ನೀಗಿಸಲು ಕೆಲವೆಡೆ ಯಾಂತ್ರೀಕೃತ ನಾಟಿ ಕಾರ್ಯ ಕೈಗೊಂಡಿದ್ದು, ಇದು ಕೆಲ ಮಟ್ಟಿನಲ್ಲಿಉಪಯುಕ್ತವಾಗಿದೆ. ಯಾಂತ್ರೀಕೃತ ನಾಟಿಗೆ ಕೆಲವು ರೈತರು ಅನಾಸಕ್ತಿ ತೋರುತ್ತಿದ್ದು, ಸಾಂಪ್ರದಾಯಿಕ ನಾಟಿಯತ್ತಲೇ ಹೆಚ್ಚು ಒಲವು ತೋರುತ್ತಿರುವುದು ಕಂಡುಬರುತ್ತಿದೆ.