ಯಾರು ಅನರ್ಹ ತೀರ್ಪು ಡಿ.9ಕ್ಕೆ

ಮುಂಡಗೋಡ : ನಾನು ಅನರ್ಹನೇ.. ರಮೇಶ ಕುಮಾರ ಅನರ್ಹರೇ.. ಎನ್ನುವುದು ಡಿಸೆಂಬರ್‌ 9ರಂದು ಜನತಾ ನ್ಯಾಯಾಲಯದಲ್ಲಿತೀರ್ಪು ಬರುತ್ತದೆ ಎಂದು ಬಿಜೆಪಿ ಅಭ್ಯರ್ಥಿ ಶಿವರಾಮ ಹೆಬ್ಬಾರ ಅವರು ವಾಗ್ದಾಳಿ ನಡೆಸಿದರು.

ಅವರು ಶನಿವಾರ ಇಂದೂರ ಜಿ.ಪಂ. ಕ್ಷೇತ್ರದ ವಿವಿಧ ಪಂಚಾಯಿತಿ ವ್ಯಾಪ್ತಿಯಲ್ಲಿಚುನಾವಣಾ ಪ್ರಚಾರ ನಡೆಸಿ ನಂತರ ಇಂದೂರಿನಲ್ಲಿಮಾತನಾಡಿದರು.

ನಾನು ಒಬ್ಬನೇ ಬಂದಿಲ್ಲ, ನನ್ನ ಸಂಸಾರ ದೊಡ್ಡದು. ಜಿ.ಪಂ., ತಾ.ಪಂ., ನಗರಸಭೆ, ಎಪಿಎಂಸಿ ಸೇರಿದಂತೆ ವಿವಿಧ ಸಂಸ್ಥೆಗಳ ನೂರಾರು ಜನಪ್ರತಿನಿಧಿಗಳು, ಸಾವಿರಾರು ಕಾರ್ಯಕರ್ತರು, ಬೆಂಬಲಿಗರೊಂದಿಗೆ ಬಿಜೆಪಿ ಸೇರಿದ್ದೇನೆ. ಅವರು ಎಲ್ಲರೂ ಒಟ್ಟಾಗಿ ಚುನಾವಣೆ ಎದುರಿಸಬೇಕೆಂದು ಮನವಿ ಮಾಡಿದರು ಎಂದರು.

ಬಿಜೆಪಿ ಮತ್ತು ನನ್ನ ಬೆಂಬಲಿಗರ ಮಧ್ಯ ಇರುವ ಅಸಮಾಧಾನ 80 ಪ್ರತಿಶತ ಸಮಾನ ಆಗಿದೆ. ಮುಂದೆ ಎಲ್ಲವೂ ಸರಿ ಆಗುತ್ತದೆ. ಹಿಂದೆ ಬಿಜೆಪಿಯಿಂದ ವಿ.ಎಸ್‌.ಪಾಟೀಲರನ್ನು ಗೆಲ್ಲಿಸಿದ್ದರೆ 105 ಶಾಸಕರು ಆಗುತ್ತಿದ್ದರು. ನನ್ನನ್ನು ಗೆಲ್ಲಿಸಿದ್ದಕ್ಕೆ ಬಿಜೆಪಿ ಸರಕಾರ ಬಂತು, ಈಗ ಮತ್ತೆ ಗೆಲ್ಲಿಸಿದರೆ ಸರಕಾರ ಉಳಿಯುತ್ತದೆ ಎಂದರು. ರಾಜೀನಾಮೆ ಕೊಡಲು ಗುಂಡಿಗೆ ಬೇಕು ಒಂದು ಉದ್ದೇಶಕ್ಕೆ ಕೊಟ್ಟಿದ್ದೇನೆ ಎಂದರು.

ನಾನು ರಾಜೀನಾಮೆ ಕೊಟ್ಟರೆ ಪಾಪ, ನಮ್ಮ ನಾಯಕರಾದ ದೇಶಪಾಂಡೆ ಅವರು ಕೊಟ್ಟರೆ ಪುಣ್ಯವೇ ? ಎಂದು ಗೇಲಿ ಮಾಡಿದರು. ಸಭೆಯಲ್ಲಿಹೆಬ್ಬಾರ ಬೆಂಬಲಿಗರು, ಬಿಜೆಪಿ ಪ್ರಮುಖರು ಇದ್ದರು.