ಮಾದರಿ ವಿಧಾನಸಭೆ ಮಾಡುವ ಜವಾಬ್ದಾರಿ: ಸ್ವೀಕರ್ ವಿಶ್ವೇಶ್ವರ ಹೆಗಡೆ

ಶಿರಸಿ: ಕರ್ನಾಟಕ ವಿಧಾನಸಭಾಧ್ಯಕ್ಷನಾಗಿ ಸದನವನ್ನು ಅಚ್ಚುಕಟ್ಟಾಗಿ ಮುನ್ನಡೆಸಿ, ದೇಶ ಮಟ್ಟದಲ್ಲಿ ಮಾದರಿ ವಿಧಾನಸಭೆ ಮಾಡಲು ಎಲ್ಲಾ ಪ್ರಯತ್ನ ಮಾಡುವುದಾಗಿ ನೂತನ ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ತಿಳಿಸಿದ್ದಾರೆ.

ವಿಧಾನಸಭಾ ಅಧ್ಯಕ್ಷರಾಗಿ ಆಯ್ಕೆಯಾದ ಮೇಲೆ ಮೊದಲ ಬಾರಿಗೆ ನಗರದಲ್ಲಿ ಸ್ವಂತ ಕಚೇರಿಗೆ ಭೇಟಿ ನೀಡಿ, ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಸದನದಲ್ಲಿ ಹಿರಿಯರು ಇದ್ದಾರೆ. ಅನುಭವಿಗಳ ದೊಡ್ಡ ತಂಡವಿದೆ. ಎಲ್ಲರ ಸಲಹೆ ಪಡೆದು ನಾಡಿನ ಜನತೆಯ ಧ್ವನಿಗೆ ಧ್ವನಿ ಆಗುವ ರೀತಿಯಲ್ಲಿ ಸದನವನ್ನು ಮುನ್ನಡೆಸಿಕೊಂಡು ಹೋಗಲು ಪ್ರಯತ್ನಿಸುತ್ತೇನೆ ಎಂದರು.

‌ವರಿಷ್ಠರು ಹಿರಿಯರಿಂದ ಸಭಾಧ್ಯಕ್ಷ ಸ್ಥಾನ ದೊರೆತಿದೆ. ಹಾಗೆಯೇ ಸದನದ ಎಲ್ಲಾ ಸದಸ್ಯರು ಸೇರಿ ಸರ್ವಾನುಮತದಿಂದ ಸಭಾಧ್ಯಕ್ಷರನ್ನಾಗಿ ಆಯ್ಕೆ ಮಾಡಿದ್ದಾರೆ. ಇದಕ್ಕಾಗಿ ನನ್ನ ಕ್ಷೇತ್ರದ ಜನರನ್ನು ಅಭಿನಂದಿಸುತ್ತೇನೆ . ಇಲ್ಲಿ ಆಯ್ಕೆಯಾದ ಪರಿಣಾಮ ಈ ಸ್ಥಾನ ದೊರಕಿದೆ ಎಂದ ಅವರು, ಸದನ ಜನರ ಸಮಸ್ಯೆಗೆ ಉತ್ತರ ದೊರಕಿಸುವ ವೇದಿಕೆ ಆಗಬೇಕು. ಕರ್ನಾಟಕದ ಜನತೆಯ ಒಳಿತಿಗಾಗಿ ಚರ್ಚಿಸುವ ವೇದಿಕೆ ಮಾಡುವ ಜವಾಬ್ದಾರಿ ನಿರ್ವಹಿಸುತ್ತೇನೆ ಎಂದರು.

ಸದನದಲ್ಲಿ ಸಾಕಷ್ಟು ಸಮಾಲೋಚನೆ ಮಾಡಿ ನಿರ್ಣಯ ತೆಗೆದುಕೊಳ್ಳುತ್ತೇನೆ. ಸರ್ಕಾರದ ಜೊತೆ ಮಾತನಾಡಿ ಸದನ ಹೆಚ್ಚು ದಿನ ನಡೆಯುವಂತೆ ನೋಡಿಕೊಳ್ಳುತ್ತೇನೆ. ಹೆಚ್ಚೆಚ್ಚು ಜನರ ಸಮಸ್ಯೆ ಬಗೆಹರಿಸಲು ಆದ್ಯತೆ ನೀಡುತ್ತೇನೆ ಎಂದರು.