ಶಿವದೇವಾಲಯಗಳಲ್ಲಿ ಶಿವರಾತ್ರಿ ಸಂಭ್ರಮ

ಯಲ್ಲಾಪುರ : ಪರಶಿವನ ಆರಾಧನೆಯ ಪರ್ವಕಾಲವಾದ ಮಹಾಶಿವರಾತ್ರಿಯನ್ನು ಸೋಮವಾರ ತಾಲೂಕಿನಲ್ಲಿ ಶ್ರದ್ಧಾ ಭಕ್ತಿಯಿಂದ ಆಚರಿಸಲಾಯಿತು. ತಾಲೂಕಿನ ವಿವಿಧ ಭಾಗಗಳಲ್ಲಿರುವ ಶಿವದೇವಾಲಯಗಳಿಗೆ ಭಕ್ತರು ತೆರಳಿ ಪೂಜೆ, ಸೇವೆ ಸಲ್ಲಿಸಿದರು.

ತಾಲೂಕಿನ ನಂದೊಳ್ಳಿಯ ರಾಮಲಿಂಗೇಶ್ವರ ದೇವಾಲಯ, ಪಟ್ಟಣದ ಈಶ್ವರ ದೇವಸ್ಥಾನ, ಮೊಗದ್ದೆ ಈಶ್ವರ ದೇವಾಲಯ, ರಾಮನಕೊಪ್ಪದಲ್ಲಿರುವ ರಾಮಲಿಂಗೇಶ್ವರ ದೇವಾಲಯ, ಇಡಗುಂದಿ ರಾಮಲಿಂಗೇಶ್ವರ ದೇವಾಲಯ, ಕುಂದರಗಿಯ ಉಮಾಮಹೇಶ್ವರ ದೇವಸ್ಥಾನ ,ತುಂಬೇಬೀಡಿನ ಸದಾಶಿವ ದೇವಸ್ಥಾನ ಮುಂತಾದ ಶಿವಾಲಯಗಳಲ್ಲಿ ಹೆಚ್ಚಿನ ಸಂಖ್ಯೆಯ ಭಕ್ತರು ಆಗಮಿಸಿ ಶಿವನ ಪೂಜೆ ನೆರವೇರಿಸಿದರು. ಎಲ್ಲ ಶಿವದೇವಾಲಯಗಳಲ್ಲಿ ಬೆಳಗ್ಗೆ ಐದು ಗಂಟೆಯಿಂದಲೇ ಭಕ್ತರು ಸರತಿ ಸಾಲಿನಲ್ಲಿ ನಿಂತು ಪೂಜೆ ಸಲ್ಲಿಸಿದರು.

ಹಲವು ದೇವಾಲಯಗಳಲ್ಲಿ ಶಿವರಾತ್ರಿಯ ಪ್ರಯುಕ್ತ ಸೋಮವಾರ ರಾತ್ರಿ ಯಕ್ಷ ಗಾನ,ತಾಳಮದ್ದಳೆ, ಶಿವಸ್ತ್ರೋತ್ರ ಪಠಣ ಸೇರಿದಂತೆ ನಾನಾ ಸಾಂಸ್ಕೃತಿಕ ಕಾರ್ಯಕ್ರಮಗಳು ಆಯೋಜನೆಗೊಂಡಿದ್ದವು.