ಯೋಧ ನದಿ ಪಾಲು

ವಿಜಯಪುರ: ವಾಹನ ನದಿಗೆ ಬಿದ್ದ ಹಿನ್ನೆಲೆಯಲ್ಲಿ ಜಿಲ್ಲೆಯ ಕೊಲ್ಹಾರ ತಾಲೂಕಿನ ರೋಣಿಹಾಳದ ಯೋಧನೊಬ್ಬ ಅಕಾಲಿಕವಾಗಿ ಮೃತಪಟ್ಟಿದ್ದಾನೆ.

ಪರಶುರಾಮ ಖ್ಯಾತನ್ನವರ(33) ಮೃತಪಟ್ಟ ಯೋಧ. ಅರುಣಾಚಲ ಪ್ರದೇಶ ಹಾಗೂ ಆಸ್ಸಾಂ ರಾಜ್ಯಗಳ ಗಡಿ ಭಾಗದಲ್ಲಿ ರಾತ್ರಿ ಗಸ್ತು ತಿರುಗುತ್ತಿದ್ದ ವೇಳೆ ಸೇನಾ ವಾಹನ ತೀನ್‌ಸುಖಿಯಾ ಎಂಬಲ್ಲಿ ಚಿಪ್ಕೋ ನದಿಗೆ ಬಿದ್ದು ಮೂವರು ಮೃತಪಟ್ಟಿದ್ದು, ಅದರಲ್ಲಿ ಪರಶುರಾಮವೊಬ್ಬರು ಸೇರಿದ್ದಾರೆ.

2003ರಲ್ಲಿ ಮದ್ರಾಸ್‌ ರೆಜಿಮೆಂಟ್‌ನ ಮೂಲಕ ದೇಶ ಸೇವೆಗೆ ನಿಯೋಜನೆಗೊಂಡಿದ್ದ ಪರಶುರಾಮ, ಆಸ್ಸಾಂ ಆರ್ಮಿಯಲ್ಲಿ 14 ವರ್ಷಗಳಿಂದ ಸೇವೆ ಸಲ್ಲಿಸುತ್ತಿದ್ದರು. ಫೆ. 9 ರಂದು ಕೊಲ್ಹಾರ ಪಟ್ಟಣದಲ್ಲಿ ನಿರ್ಮಿಸಿದ ನೂತನ ಗೃಹ ಪ್ರವೇಶ ಕಾರ್ಯಕ್ರಮ ಮುಗಿಸಿಕೊಂಡು ಸೇವೆಗೆ ತೆರಳಿದ್ದರು.

ಮೃತ ಯೋಧನಿಗೆ ಪತ್ನಿ, ಪುತ್ರಿ, ಪುತ್ರ, ತಂದೆ, ತಾಯಿ ಹಾಗೂ ಸಹೋದರ, ಸಹೋದರಿಯರು ಇದ್ದಾರೆ. ಸುದ್ದಿ ತಿಳಿದು ಯೋಧನ ಮನೆಯಲ್ಲಿ ಸಂಬಂಧಿಕರ ಆಕ್ರಂದನ ಮುಗಿಲು ಮುಟ್ಟಿದೆ. ಸೇನೆಯ ಮೇಜರ್‌ ಕರ್ನಲ್‌ ಕರಿಯಪ್ಪ ಯೋಧನ ಸಾವಿನ ಸುದ್ದಿ ಖಚಿತಪಡಿಸಿದ್ದಾರೆ. ಮೃತ ಯೋಧನ ಪಾರ್ಥಿವ ಶರೀರ ವಿಜಯಪುರಕ್ಕೆ ಏ.24 ರಂದು ಬರುವ ನಿರೀಕ್ಷೆ ಇದೆ ಎಂದು ಎಸ್ಪಿ ಪ್ರಕಾಶ ನಿಕ್ಕಂ ವಿಜಯ ಕರ್ನಾಟಕಕ್ಕೆ ತಿಳಿಸಿದ್ದಾರೆ.