ಎಸಿಬಿ ಬಲೆಗೆ ಕಂದಾಯ ನಿರೀಕ್ಷಕ

ವಿಜಯಪುರ: ಸರಕಾರದಿಂದ ಮಂಜೂರಾಗಿದ್ದ ಪರಿಹಾರ ಧನ ನೀಡಲು 4 ಸಾವಿರ ರೂ. ಲಂಚ ಸ್ವೀಕರಿಸುತ್ತಿದ್ದ ಇಂಡಿ ಕೆಬಿಜೆನ್ನೆಲ್‌ನ ಭೂ ಸ್ವಾಧೀನ ಕಚೇರಿಯ ಕಂದಾಯ ನಿರೀಕ್ಷಕ ಎಸಿಬಿ ಪೊಲೀಸರ ಬಲೆಗೆ ಬಿದ್ದಿದ್ದಾರೆ.

ಇಂಡಿ ಪಟ್ಟಣದಲ್ಲಿರುವ ವಿಶೇಷ ಭೂಸ್ವಾಧೀನ ಕಚೇರಿಯ ಬಸವರಾಜ ತೇಲಿ ಎಸಿಬಿ ಬಲೆಗೆ ಬಿದ್ದ ಕಂದಾಯ ನಿರೀಕ್ಷಕ. ಸಿಂದಗಿ ತಾಲೂಕಿನ ವರ್ಕಾನಳ್ಳಿ ಗ್ರಾಮದ ಮಹಾಂತೇಶ ಅಗಸರ ಎಂಬುವರ ಜಮೀನಿನಲ್ಲಿಕೆನಾಲ್‌ ನಿರ್ಮಾಣಕ್ಕೆ ಸರಕಾರ ಭೂಸ್ವಾಧೀನ ಮಾಡಿಕೊಂಡಿತ್ತು. ಇದಕ್ಕೆ ಸರಕಾರ ಮಹಾಂತೇಶ ಅಗಸರ ಅವರ ಒಂದೂವರೆ ಎಕರೆ ಜಮೀನಿಗೆ ಪರಿಹಾರವಾಗಿ 2.85 ಲಕ್ಷ ರೂ. ಮಂಜೂರು ಮಾಡಿತ್ತು.

ಮಂಜೂರಾಗಿದ್ದ ಹಣವನ್ನು ರೈತ ಮಹಾಂತೇಶ ಅಗಸರ ಅವರಿಗೆ ನೀಡಲು ಕಂದಾಯ ನಿರೀಕ್ಷಕ ಬಸವರಾಜ ತೇಲಿ 4 ಸಾವಿರ ರೂ. ಲಂಚದ ಬೇಡಿಕೆಯಿಟ್ಟು, ಆ ಮೊತ್ತವನ್ನು ಸ್ವೀಕರಿಸುತ್ತಿದ್ದ ವೇಳೆ ಎಸಿಬಿ ಪೊಲೀಸರು ಬೀಸಿದ ಬಲೆಗೆ ಬಸವರಾಜ ತೇಲಿ ಬಿದ್ದಿದ್ದಾರೆ. ಆರೋಪಿ ತೇಲಿ ಅವರನ್ನು ಎಸಿಬಿ ಪೊಲೀಸರು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.

ದಾಳಿಯಲ್ಲಿಎಸಿಬಿ ಡಿವೈಎಸ್ಪಿ ವೇಣುಗೋಪಾಲ, ಸಿಪಿಐಗಳಾದ ಶಿವಶಂಕರ ಗಣಾಚಾರಿ, ಸಚಿನ್‌ ಚಲವಾದಿ ಹಾಗೂ ಮೂವರು ಸಿಬ್ಬಂದಿ ಪಾಲ್ಗೊಂಡಿದ್ದರು.