ದೇಶದ ಪ್ರಧಾನಿಯಾದರೂ ಅಪ್ಪಾ, ಅಣ್ಣಾ ಅನ್ನುತ್ತೇನೆ: ರಮೇಶ ಜಿಗಜಿಣಗಿ

ವಿಜಯಪುರ: ನನ್ನನ್ನು ದೇಶದ ಪ್ರಧಾನಿ ಮಾಡಿದರೂ ಅಪ್ಪಾ, ಅಣ್ಣಾ ಅನ್ನೋದನ್ನ ಬಿಡಲ್ಲ. ಪ್ರತಿಯೊಬ್ನರಿಗೂ ಗೌರವ ಕೊಡೋದು ನನ್ನ ಸಂಸ್ಕೃತಿ ಎಂದು ಕೇಂದ್ರ ಸಚಿವ ರಮೇಶ ಜಿಗಜಿಣಗಿ ತಿಳಿಸಿದರು.

ನಗರದ ವನಶ್ರೀ ಮಂಗಲ ಕಾರ್ಯಾಲಯದಲ್ಲಿ ಶನಿವಾರ ನಡೆದ ಬಿಜೆಪಿ ಜಿಲ್ಲಾಧ್ಯಕ್ಷರ ಪದಗ್ರಹಣ ಹಾಗೂ ಕಾರ್ಯಕರ್ತ ಸಭೆಯಲ್ಲಿ ಮಾತನಾಡಿದ ಅವರು, ನಾನೊಬ್ಬ ಬಿಜೆಪಿ ಪಕ್ಷದ ಸಾಮಾನ್ಯ ಕಾರ್ಯಕರ್ತ ಎಂದು ಇಂದಿಗೂ ಮನಸ್ಸಿನಲ್ಲಿಟ್ಟುಕೊಂಡಿದ್ದೇನೆ ಎಂದರು.

ಯಾರೂ ಸಾಧಿಸಲಾರದನ್ನು ಸಾಧಿಸಬೇಕೆಂಬ ಹಠ ನನ್ನಲ್ಲಿದೆ. ನನ್ನ ನರನಾಡಿ ಪಕ್ಷದ ಕಾರ್ಯಕರ್ತರು. ನನ್ನ ರಾಜಕಾರಣದ ಸಾಧನೆಗೆ ಪಕ್ಷದ ಕಾರ್ಯಕರ್ತರೇ ಕಾರಣ ಎಂದು ರಮೇಶ ಜಿಗಜಿಣಗಿ ತಿಳಿಸಿದರು.

ನನ್ನ ಜೊತೆ ನೀವಿರುವ ತನಕ ನನ್ನ ರಾಜಕಾರಣ ಇರುತ್ತದೆ. ಮೋದಿ ಸರಕಾರದಲ್ಲಿ ಮಂತ್ರಿಯಾಗಿ ಕೆಲಸ ಮಾಡಲು ನೀವೇ ಕಾರಣ. ನೀವೇ ಸೋಲಿಸಿದ್ದರೆ ನಾನೇನು ಮಂತ್ರಿಯಾಗುತ್ತಿರಲಿಲ್ಲ. ಈ ಹಿಂದೆ ಸಂಸದರಾಗಿದ್ದವರು ಜಿಲ್ಲೆಗೆ ನನಗಿಂತ ಹೆಚ್ಚು ಅನುದಾನ, ಯೋಜನೆ ತಂದಿದ್ದರೆ ಇಂದೇ ರಾಜೀನಾಮೆ ನೀಡುತ್ತೇನೆ ಎಂದು ಜಿಗಜಿಣಗಿ ಸವಾಲು ಹಾಕಿದರು.