ದರೋಡೆಕೋರ ಪೊಲೀಸರಿಗೆ ಜೈಲು

ವಿಜಯಪುರ: ವ್ಯಾಪಾರಸ್ಥನ ಮೇಲೆ ಹಲ್ಲೆ ಮಾಡಿ ಆತನಿಂದ ಹಣ ದೋಚಿ ಪರಾರಿಯಾದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿಗಳಿಗೆ 5 ವರ್ಷ ಜೈಲು ಶಿಕ್ಷೆ ಹಾಗೂ ತಲಾ 50 ಸಾವಿರ ರೂ. ದಂಡ ವಿಧಿಸಿ ನ್ಯಾಯಾಲಯ ತೀರ್ಪು ನೀಡಿದೆ.

ಈ ಪ್ರಕರಣದಲ್ಲಿ ದರೋಡೆಕೋರರು ಪೊಲೀಸರೇ ಆಗಿರುವುದು ವಿಶೇಷ. ವಿಜಯಪುರದ ಬಾಬು ರಜಾಕಸಾಬ ಪಟೇಲ್‌, ಮಹಾದೇವ ಅಮೋಗಿ ಟಕ್ಕೆ ಹಾಗೂ ಜಗದೀಶ ಶಿಕ್ಷೆಗೆ ಒಳಗಾದ ಆರೋಪಿಗಳು. ಬಾಬು ರಜಾಕಸಾಬ ಹಾಗೂ ಜಗದೀಶ ಐಆರ್‌ಬಿ ಪೇದೆಗಳಾಗಿದ್ದಾರೆ.

ಹಣದ ಆಸೆಗಾಗಿ 2014ರ ಜು.28ರಂದು ಸಿಂದಗಿ ತಾಲೂಕಿನ ಗಬಸಾವಳಗಿ ಬಳಿ ಕಾರಿನಲ್ಲಿ ಬರುತ್ತಿದ್ದ ವಿಜಯಪುರದ ವಜ್ರಹನುಮಾನ ನಗರದ ನಿವಾಸಿ ಸ್ವೀಟ್‌ ಮಾರ್ಟ್‌ ವ್ಯಾಪಾರಸ್ಥ ದಿನಕರನ್‌ ಆಶೀರ್ವಾದಂ ನಾಡರ್‌ ಎಂಬುವವರ ಮೇಲೆ ಹಲ್ಲೆ ನಡೆಸಿ 1.20 ಲಕ್ಷ ರೂ.ದೋಚಿ ಪರಾರಿಯಾಗಿದ್ದರು.