ಸಿಂದಗಿಯಲ್ಲಿ ಮತ್ತೆ ಡೆಂಗೆ ಪತ್ತೆ

ಸಿಂದಗಿ: ಪಟ್ಟಣದ ವಿದ್ಯಾನಗರದಲ್ಲಿ ಶುದ್ಧ ಕುಡಿಯುವ ನೀರಿನ ಸಂಗ್ರಹಗಾರದ ಪಕ್ಕ ಹಾಗೂ ಹಿಂದುಗಡೆ ವಾಸಿಸುತ್ತಿರುವ 9 ತಿಂಗಳು ಮಗು ಸಹಿತ ಮೂರು ಜನರಿಗೆ ಶಂಕಿತ ಡೆಂಗೆ ಕಂಡುಬಂದಿದೆ.

ಈ ಹಿಂದೆ ಪಟ್ಟಣದ ಮಲ್ಲೇದ ಗಲ್ಲಿಯಲ್ಲಿ ಒಂದು ಹಾಗೂ ಕುರಿ ಓಣಿಯಲ್ಲಿ ಒಂದು ಪ್ರಕರಣ ಕಂಡುಬಂದಿತ್ತು. ವಿದ್ಯಾನಗರದ ನಿವಾಸಿ ಪ್ರಿಯಾಂಕಾ ಸಿಂದಗೇರಿ (23), ಪ್ರಸಾದ ಸಿಂದಗೇರಿ (15), ಸೃಷ್ಟಿ ದಶವಂತ (9 ತಿಂಗಳು) ಡೆಂಗೆ ಜ್ವರದಿಮದ ಬಳಲುತ್ತಿದ್ದು, ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ದಿನೇದಿನೆ ಪಟ್ಟಣದಲ್ಲಿ ಡೆಂಗೆ ಭೀತಿ ಹೆಚ್ಚುತ್ತಲಿದ್ದು, ಸಂಬಂಧಿಸಿದ ಅಧಿಕಾರಿಗಳು ಮಾತ್ರ ತಲೆ ಕೆಡಿಸಿಕೊಳ್ಳುತ್ತಿಲ್ಲ ಎಂಬ ಆರೋಪ ಕೇಳಿಬರುತ್ತಿದೆ. ಇನ್ನೊಂದೆಡೆ ಸ್ವಚ್ಛತೆಗಾಗಿ ಹಲವಾರು ಸಲ ಮನವಿ ಮಾಡಿದರೂ ಸಹ ಪುರಸಭೆ ಸಿಬ್ಬಂದಿ ಕ್ಯಾರೆ ಎನ್ನುತ್ತಿಲ್ಲ ಎಂದು ಸ್ಥಳೀಯರು ದೂರಿದ್ದಾರೆ.

ಸಾರ್ವಜನಿಕರು ಜಾಗೃತಿಯನ್ನು ಅರಿತು ದಿನ ಬಳಕೆ ನೀರಿನ ತೊಟ್ಟಿ ಸೇರಿದಂತೆ ಮನೆ ಮೂಲೆ, ಟೆರಸ್‌ ಮೇಲೆ ನೀರು ಸಂಗ್ರಹಗೊಳ್ಳುವುದನ್ನು ತಡೆಯಬೇಕು. ಡೆಂಗೆ ರೋಗದ ಮಾಹಿತಿ ಇದ್ದರೆ ಕೂಡಲೇ ನಮಗೆ ತಿಳಿಸಬೇಕು.
ಡಾ.ರಾಮಕೃಷ್ಣ ಇಂಗಳೆ, ತಾಲೂಕು ವೈದ್ಯಾಧಿಕಾರಿ.