ಕುಡಿವ ನೀರಿನ ಘಟಕ ಸ್ತಬ್ಧ

ಬಸವನಬಾಗೇವಾಡಿ: ತಾಲೂಕಿನ ಅಂಬಳನೂರ ಗ್ರಾಮದ ಮಾರುತಿ ದೇವಾಲಯ ಬಳಿಯ ಶುದ್ಧ ಕುಡಿವ ನೀರಿನ ಘಟಕ 9-10 ತಿಂಗಳಿಂದ ಬಂದ್‌ ಬಿದ್ದಿದೆ. ಇದರಿಂದ ಕುಡಿವ ನೀರಿಗೆ ಗ್ರಾಮಸ್ಥರು ತೊಂದರೆ ಪಡುತ್ತಿದ್ದಾರೆ.

ಘಟಕಕ್ಕೆ ನೀರಿನ ಹಾಗೂ ವಿದ್ಯುತ್‌ ಸಂಪರ್ಕದ ವ್ಯವಸ್ಥೆ ಇದೆ. ಆದರೆ, ನೀರು ಶುದ್ಧೀಕರಿಸುವ ಯಂತ್ರ ದುರಸ್ತಿ ಇರುವುದರಿಂದ ನೀರು ತಲುಪುತ್ತಿಲ್ಲ. ಈ ಬಗ್ಗೆ ಗ್ರಾಪಂ ಸದಸ್ಯ ಯಮನಪ್ಪ ಚಲವಾದಿ, ಶುದ್ಧ ನೀರು ಘಟಕ ದುರಸ್ತಿ ಮಾಡಿ ಜನರಿಗೆ ಒಳಿತು ಮಾಡಿ ಎಂದು ಅಧಿಕಾರಿಗಳಿಗೆ ಹೇಳಿದ್ದರೂ ಪ್ರಯೋಜನಕ್ಕೆ ಬರುತ್ತಿಲ್ಲ. ಕೆಆರ್‌ಐಡಿಎಲ್‌ ಅಧಿಕಾರಿಗಳು ಇಂದು ಬರುತ್ತೇವೆ, ಆಮೇಲೆ ಬರುತ್ತೇವೆ ಎಂದು ಹೇಳುತ್ತಲೇ ಹೊರಟಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ. ಆದಷ್ಟು ಬೇಗ ನೀರಿನ ಘಟಕ ಸರಿಪಡಿಸಿ ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.