ವಿಜಯಪುರ: ಸರಕಾರಿ ಶಾಲೆಗಳು ಸಂಪೂರ್ಣ ಡಿಜಿಟಲ್‌

ವಿಜಯಪುರ: ವಿಜಯಪುರ ನಗರದ ಸರಕಾರಿ ಶಾಲೆಗಳನ್ನು ಸಂಪೂರ್ಣ ಡಿಜಿಟಲ್‌ ಕ್ಲಾಸ್‌ಗಳನ್ನಾಗಿ ಮಾಡಲಾಗುವುದು ಎಂದು ನಗರ ಶಾಸಕ ಬಸನಗೌಡ ಪಾಟೀಲ ಯತ್ನಾಳರ ಪುತ್ರ ರಾಮನಗೌಡ ಪಾಟೀಲ ಯತ್ನಾಳ ಹೇಳಿದರು.

ನಗರ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಅವರು ಭವಾನಿ ನಗರದ ಸರಕಾರಿ ಪ್ರೌಢ ಶಾಲೆ ಕೆ.ಬಿ.ಎಸ್‌ ನಂ-57ರ ಪಂಚಾಯತರಾಜ್‌ ಎಂಜಿನಿಯರಿಂಗ್‌ ಇಲಾಖೆಯಿಂದ ಮಂಜೂರಿ ಮಾಡಿದ 10.60 ಲಕ್ಷ ರೂ.ಗಳ ವೆಚ್ಚದ ಕೊಠಡಿಗಳ ದುರಸ್ತಿ ನಿರ್ಮಾಣ, ಸಿದ್ಧಸಿರಿ ಸೌಹಾರ್ದ ಸಹಕಾರಿಯಿಂದ ಶುದ್ಧ ಕುಡಿಯವ ನೀರಿನ ಘಟಕ ಮತ್ತು ಬೂಥನಾಳ ತಾಂಡೆ ಸರಕಾರಿ ಪ್ರೌಢ ಶಾಲೆ ಕೆ.ಬಿ.ಎಸ್‌ ನಂ-51ರ ಕೊಠಡಿಗಳ ದುರಸ್ತಿ ಕಾಮಗಾರಿಗೆ ಭೂಮಿ ಪೂಜೆ ನೆರವೇರಿಸಿ ಅವರು ಮಾತನಾಡಿದರು.

ಸರಕಾರಿ ಶಾಲೆಯಲ್ಲಿ ಓದುವಂತಹ ವಿದ್ಯಾರ್ಥಿಗಳಿಗೆ ಅನುಕೂಲ ಕಲ್ಪಿಸುವ ಗುರಿ ಇಟ್ಟುಕೊಳ್ಳಲಾಗಿದೆ. ಈಗಾಗಲೇ ಒಂದು ಮಾಡೆಲ್‌ ಶಾಲೆ ತೆಗೆದುಕೊಳ್ಳಲಾಗಿದ್ದು ಅದರ ಡಿಪಿಆರ್‌ ತಯಾರಿಸಿ ಅದರಂತೆ ನಗರದ ಎಲ್ಲಸರಕಾರಿ ಶಾಲೆಗಳನ್ನು ಮುಂದಿನ ದಿನಗಳಲ್ಲಿ ಡಿಜಿಟಲ್‌ ಕ್ಲಾಸ್‌ ಮಾಡುವಂತಹ ಕನಸು ಹೊಂದಲಾಗಿದೆ ಎಂದು ಹೇಳಿದರು.

ಶಾಸಕರ ಪ್ರದೇಶಾಭಿವೃದ್ಧಿ ನಿಧಿಯಿಂದ ಹೆಚ್ಚಿನ ರೀತಿಯಲ್ಲಿ ಶಾಲೆಯನ್ನು ಅಭಿವೃದ್ಧಿ ಪಡಿಸುವ ಕಾಮಗಾರಿಗಳನ್ನು ಕೈಗೆತ್ತಿಕೊಳ್ಳಲಾಗುವುದು ಎಂದು ರಾಮನಗೌಡ ಪಾಟೀಲ ಯತ್ನಾಳ ಹೇಳಿದರು.