ವಿಜಯಪುರ: ಅಕ್ರಮ ಕಂಟ್ರಿ ಪಿಸ್ತೂಲ್ ಹೊಂದಿದ್ದ ಮೂವರ ಬಂಧನ!

ವಿಜಯಪುರ: ಮರಳು ಮಾಫಿಯಾಕ್ಕೆ ಅಡ್ಡಿಪಡಿಸುವವರನ್ನು ಹೆದರಿಸಲು ಅಕ್ರಮ ಕಂಟ್ರಿ ಪಿಸ್ತೂಲ್ ಹೊಂದಿದ್ದ ಮೂವರು ಅಂತಾರಾಜ್ಯ ಆರೋಪಿಗಳನ್ನು ಝಳಕಿ ಠಾಣೆ ಪೊಲೀಸರು ಬಂಧಿಸಿ, ಅವರಿಂದ 1 ಕಂಟ್ರಿ ಪಿಸ್ತೂಲ್ ಹಾಗೂ ಜೀವಂತ ಗುಂಡು ವಶಪಡಿಸಿಕೊಂಡಿದ್ದಾರೆ.

ಸೊಲ್ಲಾಪುರ ಜಿಲ್ಲೆ ಅಕ್ಕಲಕೋಟ ತಾಲೂಕಿನ ಗುಡ್ಡೇವಾಡಿಯ ಸಂತೋಷ ಕಾಶೀನಾಥ ವಿಜಾಪುರೆ, ಪ್ರಶಾಂತ ಬಾಬುರಾವ ಮೊಗಳೆ ಹಾಗೂ ಕಲ್ಲಕರಜೋಳ ಗ್ರಾಮದ ಚಿದಾನಂದ ಬಿರಾಜದಾರ ಬಂಧಿತ ಆರೋಪಿಗಳು.

ಈ ಮೂವರು ಮಹಾರಾಷ್ಟ್ರದಲ್ಲಿ ರಾತ್ರಿ ವೇಳೆ ಮರಳು ಮಾಫಿಯಾ ದಂಧೆ ನಡೆಸುತ್ತಿದ್ದರು. ಆ ವೇಳೆಯಲ್ಲಿ ಉಸುಕು ಸಂಗ್ರಹಿಸುವಾಗ ಯಾರಾದರೂ ತಂಟೆಗೆ ಬಂದರೆ, ಅವರನ್ನು ಹೆದರಿಸುವ ಸಲುವಾಗಿ ಆರೋಪಿಗಳಾದ ಚಿದಾನಂದ ಬಿರಾಜದಾರ ಹಾಗೂ ಪ್ರಶಾಂತ ಬಾಬುರಾವ ಮೊಗಳೆ ಎಂಬುವರು ಅನಧಿಕೃತ ಕಂಟ್ರಿ ಪಿಸ್ತೂಲ್ ಹಾಗೂ ಜೀವಂತ ಗುಂಡುಗಳನ್ನು ಖರೀದಿಸಿದ್ದರು.

ಎಲಿಯಾ-ಕಿನೋಚ್-12 ಎಂದು ಲೇಬಲ್ ಹೊಂದಿರುವ ಜೀವಂತ ಗುಂಡು ಹಾಗೂ ಕಂಟ್ರಿ ಪಿಸ್ತೂಲ್‌ನ್ನು ಇನ್ನೊಬ್ಬ ಆರೋಪಿ ಸಂತೋಷ ವಿಜಾಪುರೆ ಬಳಿ ಬಚ್ಚಿಟ್ಟಿದ್ದರು. ಹಲಸಂಗಿ ಮತ್ತು ಭತಗುಣಕಿ ಮಧ್ಯೆದಲ್ಲಿರುವ ಧಾಬಾದಲ್ಲಿ ಮೂವರು ಆರೋಪಿಗಳು ಕುಳಿತಿದ್ದಾರೆ ಎಂಬ ಖಚಿತ ಮಾಹಿತಿ ಆಧರಿಸಿ, ಝಳಕಿ ಠಾಣೆ ಪೊಲೀಸರು ಮೂವರನ್ನು ಬಂಧಿಸಿದ್ದಾಗಿ ಎಸ್ಪಿ ಅನುಪಮ ಅಗರವಾಲ ತಿಳಿಸಿದ್ದಾರೆ.

ಆರೋಪಿಗಳ ವಿರುದ್ಧ ಝಳಕಿ ಠಾಣೆಯಲ್ಲಿ ಕಲಂ: 25(1) (ಎ),29 (ಎ)*(ಬಿ). ಐ.ಎ.ಆ್ಯಕ್ಟ್‌ನಡಿ ಪ್ರಕರಣ ದಾಖಲಾಗಿದೆ.