ಎಪಿಎಂಸಿ ಕಾಯ್ದೆ ತಿದ್ದುಪಡಿಗೆ ವಿರೋಧ

ವಿಜಯಪುರ : ಕೇಂದ್ರ ಸರಕಾರ ಎಪಿಎಂಸಿ ಕಾಯ್ದೆ 2017ಕ್ಕೆ ತಿದ್ದುಪಡಿ ಮಾಡಿದ್ದನ್ನು ರದ್ದುಪಡಿಸಿ ಸುಗ್ರೀವಾಜ್ಞೆ ಹಿಂಪಡೆಯಬೇಕು ಎಂದು ಆಗ್ರಹಿಸಿ ಅಖಂಡ ಕರ್ನಾಟಕ ರೈತ ಸಂಘ ಹಾಗೂ ಕರ್ನಾಟಕ ಪ್ರಾಂತ ರೈತ ಸಂಘದ ಪದಾಧಿಕಾರಿಗಳು ಜಿಲ್ಲಾಡಳಿತಕ್ಕೆ ಮನವಿ ಸಲ್ಲಿಸಿದರು.

ಪ್ರಾಂತ ರೈತ ಸಂಘದ ರಾಜ್ಯ ಉಪಾಧ್ಯಕ್ಷ ಭೀಮಶಿ ಕಲಾದಗಿ ಹಾಗೂ ಅಖಂಡ ಕರ್ನಾಟಕ ರೈತ ಸಂಘದ ರಾಜ್ಯ ಕಾರ್ಯದರ್ಶಿ ಅರವಿಂದ ಕುಲಕರ್ಣಿ ಮಾತನಾಡಿ, ರೈತರು ಬೆಳೆದ ಎಲ್ಲಬೆಳೆಗಳನ್ನು ಬಹು ರಾಷ್ಟಿ್ರಯ ಕಂಪನಿಗಳು ನೇರವಾಗಿ ಖರೀದಿಸುತ್ತವೆ. ಇದರಿಂದ ರೈತರು, ಹಮಾಲರು, ಅಡತಿ ಅಂಗಡಿಯವರು, ಗುಮಾಸ್ತರಿಗೆ ತೀವ್ರ ಪೆಟ್ಟು ಬೀಳಲಿದೆ. ರಾಜ್ಯ ಸರಕಾರಕ್ಕೆ ಶೇ.1.50ರಷ್ಟು ಬರುವ 600 ಕೋಟಿ ಸೇಸ್‌ ಆದಾಯವಲ್ಲದೇ ಸಾವಿರಾರು ಕೋಟಿ ಜಿಎಸ್‌ಟಿ ಸಹ ಸರಕಾರದ ಬೊಕ್ಕಸಕ್ಕೆ ಹಾನಿಯಾಗುತ್ತದೆ. ಆದ್ದರಿಂದ ರೈತ ವಿರೋಧಿ ತಿದ್ದುಪಡಿ ಕಾಯ್ದೆಯನ್ನು ರದ್ದುಪಡಿಸಿ ಸುಗ್ರೀವಾಜ್ಞೆ ಹಿಂಪಡೆಯಬೇಕು. ಇಲ್ಲವಾದಲ್ಲಿರಾಜ್ಯದ ರೈತ ಪರ ಎಲ್ಲಸಂಘಟನೆಗಳು ಜಂಟಿಯಾಗಿ ಉಗ್ರ ಹೋರಾಟ ಕೈಗೊಳ್ಳಬೇಕಾಗುತ್ತದೆ ಎಂದರು.

ಜಿಲ್ಲಾಸಂಘಟನಾ ಕಾರ್ಯದರ್ಶಿ ಸದಾಶಿವ ಬರಟಗಿ, ಭೀಮಣ್ಣ ಪೂಜಾರಿ, ಹೊನಕೇರಪ್ಪ ತೆಲಗಿ, ಚಂದ್ರಾಮ ತೆಗ್ಗಿ, ಧರೆಪ್ಪ ಅವಟಿ, ಯಶವಂತ ರಣಧೀರೆ ಇತರರಿದ್ದರು.