ಚಡಚಣ ಠಾಣೆ ಸಿಬ್ಬಂದಿ ಕೊರತೆ ನೀಗುವುದೇ?

ಮನೋಜ ಕಟಗೇರಿ, ಚಡಚಣ

ಭೀಮಾತೀರದ ಚಡಚಣ ಸಹೋದರರ ಎನ್‌ಕೌಂಟರ್‌ ಹಾಗೂ ನಿಗೂಢ ಕೊಲೆ ಪ್ರಕರಣದಿಂದ ರಾಜ್ಯದಲ್ಲಿಯೇ ಸಾಕಷ್ಟು ಸುದ್ದಿ ಮಾಡಿರುವ ಚಡಚಣ ಠಾಣೆಯ ಸಿಬ್ಬಂದಿ ಕೊರತೆ ಇನ್ನಾದರೂ ನೀಗುವುದೇ? ಎಂಬುದು ಇಲ್ಲಿನ ಜನರಿಂದ ಕೇಳಿಬರುತ್ತಿರುವ ಮಾತು.

ಗಡಿಭಾಗ, ಹಂತಕರ ಚಟುವಟಿಕೆ, ಟ್ರಾಫಿಕ್‌ ಸಮಸ್ಯೆಯಿಂದ ಇದ್ದ ಸಿಬ್ಬಂದಿ ಸರಿಯಾಗಿ ಕೆಲಸ ಮಾಡಲು ಆಗುತ್ತಿಲ್ಲ. ಈಗ ಜಿಲ್ಲೆಯವರೇ ಗೃಹ ಮಂತ್ರಿಗಳಾಗಿರುವುದರಿಂದ ಇಲ್ಲಿನ ಠಾಣೆಗೆ ಹೆಚ್ಚಿನ ಸಿಬ್ಬಂದಿ ದೊರೆಯುತ್ತದೆ ಎಂಬ ಆಶಾಭಾವನೆ ಇಲ್ಲಿನ ಜನರಲ್ಲಿ ಮೂಡಿದೆ.

ಈಗಾಗಲೇ ಚಟಚಣ ಖ್ಯಾತಿಗಿಂತ ಕುಖ್ಯಾತಿಗೆ ಹೆಚ್ಚು ಹೆಸರು ಮಾಡಿದೆ. ಜತೆಗೆ ತಾಲೂಕು ಕೇಂದ್ರ ಕೂಡ. ಇಲ್ಲಿನ ಠಾಣೆಗೆ ಒಟ್ಟು 34 ಹುದ್ದೆಗಳಿದ್ದು, ಅದರಲ್ಲಿ 13 ಹುದ್ದೆಗಳು ಖಾಲಿ ಇವೆ. 2 ಎಎಸ್‌ಐ, 2 ಎಚ್‌ಸಿ ಹಾಗೂ 9 ಪೇದೆಗಳ ಅವಶ್ಯಕತೆ ಇದೆ. ಹೀಗಾಗಿ ಇಲ್ಲಿಗೆ ಗೃಹ ಸಚಿವರು ಹೆಚ್ಚಿನ ಸಿಬ್ಬಂದಿ ಕೊಟ್ಟು ಇಲ್ಲಿ ನಡೆಯುವ ಅಪರಾಧ ಚಟುವಟಿಕೆಗಳಿಗೆ ಬ್ರೇಕ್‌ ಹಾಕಲು ಮುಂದಾಗುತ್ತಾರಾ ಎಂಬುದು ಎಲ್ಲರ ಮುಂದಿರುವ ಪ್ರಶ್ನೆಯಾಗಿದೆ.