ವಿಜಯಪುರ: ವಾಟ್ಸಾಪ್ ಗ್ರೂಪ್‍ ನಲ್ಲಿ ಕಾಂಗ್ರೆಸ್ ಮಾಜಿ ಅಧ್ಯಕ್ಷನ ಮೊಬೈಲ್‌ನಿಂದ ಅಶ್ಲೀಲ ಫೋಟೋ ಪೋಸ್ಟ್

ವಿಜಯಪುರ: ವಿಜಯಪುರ ಡಿಸಿಸಿ (ಪ್ರೆಸ್) ಗ್ರೂಪ್‍ನಲ್ಲಿರುವ ಕಾಂಗ್ರೆಸ್ ಮಾಜಿ ಜಿಲ್ಲಾಧ್ಯಕ್ಷ ರವಿಗೌಡ ಪಾಟೀಲ ಮೊಬೈಲ್‍ನಿಂದ ಅಶ್ಲೀಲ ಫೋಟೋ ಅಪ್‍ಲೋಡ್ ಆಗಿ ಆವಾಂತರ ಸೃಷ್ಟಿಯಾಗಿದ್ದು, ಬಳಿಕ ವಿಷಯ ಗೊತ್ತಾಗುತ್ತಿದ್ದಂತೆಯೇ ರವಿಗೌಡ ಪಾಟೀಲ ಸಾರ್ವಜನಿಕ ಕ್ಷಮೆ ಕೇಳುವ ಮೂಲಕ ಪ್ರಕರಣಕ್ಕೆ ಇತಿಶ್ರೀ ಹೇಳಿದ್ದಾರೆ.

ಮಾಜಿ ಜಿಲ್ಲಾಧ್ಯಕ್ಷ ರವಿಗೌಡ ಅವರ ಮೊಬೈಲ್ ನಂಬರಿನಿಂದ ಶನಿವಾರ ರಾತ್ರಿ ವಿಜಯಪುರ ಡಿಸಿಸಿ ಪ್ರೆಸ್ ಗ್ರುಪ್‍ನಲ್ಲಿ ಅಶ್ಲೀಲ ಪೋಸ್ಟ್ ಹರಿಬಿಡಲಾಗಿತ್ತು. ಇದನ್ನು ಕಂಡ ತಕ್ಷಣ ಕೆಲ ಸದಸ್ಯರು ಆಕ್ಷೇಪಿಸಿದ್ದಾರೆ. ಆದರೆ ರವಿಗೌಡ ಪ್ರತಿಕ್ರಿಯಿಸಿಲ್ಲ. ನಂತರ ಕೆಲ ಜನರು ಗ್ರುಪ್‍ನಿಂದ ಹೊರಬಂದಿದ್ದಾರೆ. ನಂತರ ವಿಷಯ ತಿಳಿದ ಜಿಲ್ಲಾ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ವಸಂತ ಹೊನಮೋಡೆ, ರವಿಗೌಡ ಪಾಟೀಲ ಅವರನ್ನು ಗ್ರುಪ್‍ನಿಂದ ಹೊರ ಹಾಕಿ, ವಿಷಯ ತಿಳಿಸಿದ್ದಾರೆ. ಆಗ ಪೋಸ್ಟ್ ಡಿಲೀಟ್ ಮಾಡಿದ್ದಾರೆ.

ಕ್ಷಮೆ ಕೋರಿದ ರವಿಗೌಡ : ಭಾನುವಾರ ಬೆಳಗ್ಗೆ ಘಟನೆಯ ಕುರಿತು ರವಿಗೌಡ ಪಾಟೀಲ ಕ್ಷಮೆ ಕೋರಿದ್ದಾರೆ. ನಿನ್ನೆ ರಾತ್ರಿ ಮನೆಯಲ್ಲಿ ಮುಖ ತೊಳೆಯಲು ಹೋಗಿದ್ದ ವೇಳೆ, ಮೂರ್ನಾಲ್ಕು ವರ್ಷದ ಮಕ್ಕಳು ಮೊಬೈಲ್‍ನಲ್ಲಿ ಆಟವಾಡಿದ್ದಾರೆ. ಆ ವೇಳೆ ಅವರಿಗೆ ಗೊತ್ತಾಗದೇ ಈ ರೀತಿ ಆಗಿರಬಹುದು. ರಾತ್ರಿ ಪಕ್ಷ ಪ್ರಧಾನ ಕಾರ್ಯದರ್ಶಿ ಕರೆ ಮಾಡಿ ಹೇಳಿದಾಗಲೇ ನನಗೆ ವಿಷಯ ಗೊತ್ತಾಗಿದೆ. ನಾನು ವಾಟ್ಸಾಪ್ ನಿರ್ವಹಣೆ ಹಾಗೂ ಅದರ ಬಗ್ಗೆ ಅಷ್ಟೊಂದು ಜ್ಞಾನ ನನಗಿಲ್ಲ. ಅಚಾತುರ್ಯದಿಂದ ನಡೆದ ಘಟನೆಗೆ ವಿಷಾದಿಸುವುದಾಗಿ ತಿಳಿಸಿದ್ದಾರೆ