ರೋಹಿಣಿ ಮಳೆ ತಂದ ಹರ್ಷ

ವಿಜಯಪುರ: ಜಿಲ್ಲೆಯಾದ್ಯಂತ ಭಾನುವಾರ ಹದವಾಗಿ ಸುರಿದ ರೋಹಿಣಿ ಮಳೆ ಸೋಮವಾರವೂ ಅನೇಕ ಕಡೆಗಳಲ್ಲಿಸುರಿದು ಬಿಸಿಲಿನಿಂದ ಬಸವಳಿಗೆ ಜನತೆಗೆ ತಂಪೆರದರೆ, ರೈತರಲ್ಲಿಮುಂಗಾರು ಬಿತ್ತನೆ ಕೈಗೊಳ್ಳುವ ಖುಷಿ ತಂದಿದೆ.

ಸೋಮವಾರ ಮಧ್ಯಾಹ್ನದ ನಂತರ ಬಿಸಿಲು ಪ್ರಮಾಣ ಕಡಿಮೆಯಾಗಿ ಮೋಡ ಕವಿದ ವಾತಾವರಣ ಇತ್ತು. ಸಂಜೆ 6ರ ವೇಳೆ ವಿಜಯಪುರ ಹಾಗೂ ಸುತ್ತಲಿನ ಪ್ರದೇಶದಲ್ಲಿ ಸಾಧಾರಣ ಮಳೆ ಸುರಿಯಿತು. ನಿಡಗುಂದಿ ಭಾಗದಲ್ಲೂಮಳೆಯಾಗಿದೆ.

ಬಸವನಬಾಗೇವಾಡಿ ಭಾಗದಲ್ಲೂ ಸಂಜೆ ಮೋಡ ಕವಿದ ವಾತಾವರಣ ಇದ್ದು , ಮಳೆಯಾಗುವ ಸೂಚನೆ ಇತ್ತು.

ಬಿತ್ತನೆ ಆರಂಭಕ್ಕೆ ಕ್ಷಣಗಣನೆ: ಮೇ ತಿಂಗಳ 3ನೇ ವಾರದಲ್ಲಿಜಿಲ್ಲೆಯಾದ್ಯಂತ 2-3 ಬಾರಿ ಕೃತಿಕಾ ಮಳೆಯಾಗಿದ್ದರಿಂದ ರೈತರು ಮುಂಗಾರು ಬಿತ್ತೆನೆಗೆ ಜಮೀನು ಹದಗೊಳಿಸಿ, ಮಳೆಗಾಗಿ ಕಾಯುತ್ತಿದ್ದರು. ಆದರೀಗ ರೋಹಿಣಿ ಮಳೆ ಭಾನುವಾರ ಹಾಗೂ ಸೋಮವಾರ ಜಿಲ್ಲೆಯಾದ್ಯಂತ ಸುರಿದಿದೆ.

ಜಿಲ್ಲೆಯಾದ್ಯಂತ 10 ಮಿಮೀ ಮಳೆ : ಭಾನುವಾರ ಜಿಲ್ಲೆಯಾದ್ಯಂತ ಸರಾಸರಿ 10 ಮಿಮೀ ಮಳೆಯಾಗಿದೆ. ಸೋಮವಾರ ಸಂಜೆ ಕೂಡ ಎಲ್ಲೆಡೆ ಚದುರಿದ ಮಳೆಯಾಗಿದೆ.

ಜನವರಿಯಿಂದ ಮೇ ತನಕ 172 ಮಿಮೀ ಮಳೆಯಾಗಬೇಕಿದ್ದು , ಈವರೆಗೆ 96 ಮಿಮೀ ಮಳೆಯಾಗಿದೆ. ಮೇ ತಿಂಗಳಲ್ಲಿ 36 ಮಿಮೀ ಮಳೆಯಾಗಿದೆ ಎಂದು ಕೃಷಿ ಇಲಾಖಾಧಿಕಾರಿಗಳು ತಿಳಿಸಿದರು.

ಮುಂಗಾರು ಪ್ರವೇಶ ಹಾಗೂ ನಿಸರ್ಗ ಚಂಡಮಾರುತ ಪರಿಣಾಮ ಮಳೆಯಾಗುತ್ತಿದೆ. ಇನ್ನೂ 4 ದಿನ ಜಿಲ್ಲೆಯಲ್ಲಿಮಳೆಯಾಗುವ ಸಾಧ್ಯತೆ ಬಗ್ಗೆ ಹವಾಮಾನ ಇಲಾಖೆ ವರದಿಯಲ್ಲಿದೆ. ಉತ್ತಮ ಮಳೆಯ ನಿರೀಕ್ಷೆಯಿದೆ ಎಂದು ಜಂಟಿ ಕೃಷಿ ನಿರ್ದೇಶಕ ಶಿವಕುಮಾರ್‌ ತಿಳಿಸಿದರು.

ರೈತ ಸಂಪರ್ಕ ಕೇಂದ್ರಗಳಲ್ಲಿಮೊದಲಿಗೆ ಹೆಸರು ಮತ್ತು ತೊಗರಿ ಬಿತ್ತನೆ ಬೀಜ ವಿತರಣೆ ಕ್ರಮ ಕೈಗೊಳ್ಳಲಾಗಿದೆ. 2 ದಿನಗಳಲ್ಲಿಜಿಲ್ಲೆಯಾದ್ಯಂತ ಪೂರ್ಣ ಪ್ರಮಾಣದಲ್ಲಿಬಿತ್ತನೆ ಬೀಜ, ಗೊಬ್ಬರ ವಿತರಣೆ ಆರಂಭವಾಗಲಿದೆ ಎಂದರು.

ಜಿಲ್ಲೆಯಲ್ಲಿ ಮುಂಗಾರು ಪೂರ್ವ ಮಳೆಯಾಗುವುದು ಕಡಿಮೆ. ಜೂ.7ರ ನಂತರ ಮುಂಗಾರು ಮಳೆಯಾಗುವುದು ವಾಡಿಕೆ. ಆದರೆ ಈ ವರ್ಷ ಕೃತಿಕಾ ಹಾಗೂ ರೋಹಿಣಿ ಮಳೆಯಾಗಿದ್ದರಿಂದ ಬಿತ್ತನೆಯ ಖಾತ್ರಿ ಮೂಡಿಸಿದೆ. ಸಾಕಷ್ಟು ರೈತರು ಈಗಾಗಲೇ ಭೂಮಿ ಹದಗೊಳಿಸಿದ್ದು , ಮೊದಲಿಗೆ ಕಡಿಮೆ ಅವಧಿಯ ಹೆಸರು ಬಿತ್ತನೆ ಕೈಗೊಳ್ಳಲಿದ್ದಾರೆ.

ಜಿಲ್ಲೆಯಲ್ಲಿ4.84 ಲಕ್ಷ ಹೆಕ್ಟೇರ್‌ ಮುಂಗಾರು ಬಿತ್ತನೆ ಗುರಿ ಇದ್ದು , 2.80 ಲಕ್ಷ ಹೆಕ್ಟೇರ್‌ ತೊಗರಿ, 30 ಸಾವಿರ ಹೆಕ್ಟೇರ್‌ ಮೆಕ್ಕೆಜೋಳ, ಉಳಿದಂತೆ ಸಜ್ಜೆ, ಹೆಸರು, ಸೂರ್ಯಕಾಂತಿ ಬಿತ್ತನೆಯಾಗಲಿದೆ.