ಜಲದಲ್ಲಿ ಮಹಿಳೆಯರ ಲೀಲಾಜಾಲ ಯೋಗ

ಗುಲಾಬಚಂದ ಆರ್‌.ಜಾಧವ, ಆಲಮಟ್ಟಿ ( ವಿಜಯಪುರ)

ಯೋಗ ಮಾಡಲು ಬಹುತೇಕರು ನೆಲವನ್ನೇ ಆಯ್ದುಕೊಳ್ಳುತ್ತಾರೆ. ಆದರೆ ಈ ಗಟ್ಟಿಗಿತ್ತಿ ಮಹಿಳೆಯರು ಜಲಾಶಯದ ನೀರಿನಲ್ಲೇ ಆಸನಗಳನ್ನು ಮಾಡುವ ಮೂಲಕ ವಿಶ್ವ ಯೋಗ ದಿನವನ್ನು ವಿಶಿಷ್ಟವಾಗಿ ಆಚರಿಸಿದರು.

ಆಲಮಟ್ಟಿಯ ಲಾಲ್‌ಬಹುದ್ದೂರ್‌ ಜಲಾಶಯದ ಹಿನ್ನೀರಿನಲ್ಲಿ ಶುಕ್ರವಾರ ಬೆಳಗ್ಗೆ ಇಂತಹದೊಂದು ಅಪರೂಪದ ದೃಶ್ಯ ನೋಡುಗರಲ್ಲಿ ಅಚ್ಚರಿ ಮೂಡಿಸಿತು.

ಆಲಮಟ್ಟಿಯ ಎಂಎಚ್‌ಎಂ ಪ್ರೌಢಶಾಲೆಯ ದೈಹಿಕ ಶಿಕ್ಷ ಣ ಶಿಕ್ಷ ಕ, ಯೋಗ ಗುರು ಗಂಗಾಧರ ಹಿರೇಮಠ ಮಾರ್ಗದರ್ಶನಲ್ಲಿ ಅದೇ ಊರಿನ ಹತ್ತಕ್ಕೂ ಹೆಚ್ಚು ಮಹಿಳೆಯರು ಹಿನ್ನೀರಿಗೆ ಧುಮುಕಿ ಯೋಗ ಸಾಹಸ ನಡೆಸಿದರು.

ಈ ನಾರಿಯರು ಲೀಲಾಜಾಲವಾಗಿ ನೀರಿನಮೇಲೆ ಶವಾಸನದ ಮೂಲಕ ಧ್ಯಾನಾಸಕ್ತರಾಗಿದ್ದು ನೋಡುಗರ ಗಮನಸೆಳೆಯಿತು. ಒಂದು ಗಂಟೆಗೂ ಹೆಚ್ಚುಕಾಲ ಯಾವುದೇ ಭಯ, ಅಡೆತಡೆಗಳಿಲ್ಲದೇ ಆನಂದದಿಂದ ನೀರಿನ ಮೇಲೆ ಯೋಗ ವಿದ್ಯೆ ಪ್ರದರ್ಶಿಸಿದ್ದು ಗಂಡಸರಿಗೂ ಹುಬ್ಬೇರಿಸುವಂತೆ ಮಾಡಿತ್ತು.

ಕಳೆದ ನಾಲ್ಕೈದು ವರ್ಷದಿಂದ ಈ ಮಹಿಳೆಯರು ನೀರಿನಲ್ಲಿ ಈಜುವ ಕಲೆ ನಿರಾಯಾಸಕವಾಗಿ ಕರಗತ ಮಾಡಿಕೊಂಡಿದ್ದಾರೆ. ಯೋಗ ಗುರುವಿನ ಮಾರ್ಗದರ್ಶನಲ್ಲಿ ನಿತ್ಯವೂ ನೀರಿಗಿಳಿದು ಯೋಗದ ಕಸರತ್ತು ಮಾಡುವ ಪರಿಪಾಠ ಬೆಳೆಸಿಕೊಂಡಿದ್ದಾರೆ. ಹೀಗಾಗಿ ಯೋಗ ದಿನ ಪ್ರಾಣಾಯಾಮ, ಶವಾಸನವನ್ನು ಸಲೀಸಾಗಿ ನೀರಿನಲ್ಲಿ ಪ್ರದರ್ಶಿಸಿದರು. ಈ ಅಪರೂಪದ ಯೋಗ ವಿದ್ಯೆಯನ್ನು ವೈದ್ಯೆ ಡಾ.ಸುಮಿತ್ರಾ ರೇವಡಿ, ಗೃಹಿಣಿಯರಾದ ಗೀತಾ, ಯಮುನಾ ಪೂಜಾರಿ, ಕೋಮಲಾ ಬಡಿಗೇರ, ಶಾಂತಾ ಪತ್ತಾರ ಜತೆಗೆ ಹಲವು ಮಹಿಳೆಯರು ಕರಗತ ಮಾಡಿಕೊಂಡಿದ್ದರ ಫಲವಾಗಿ ಜಲಯೋಗ ಪ್ರದರ್ಶನ ಮಾಡಿದರು. ಇವರ ಜತೆಗೆ ಬಸವರಾಜ ಮಹೇಂದ್ರಕರ ಕೂಡ ನೀರಿಗೆ ಇಳಿದು ಸಾಥ್‌ ನೀಡಿದರು.

ಆಸನಗಳಲ್ಲೇ ಕಠಿಣ ಆಸನ ಎಂದು ಹೇಳಲಾಗುವ ಶವಾಸನ ನೀರಿನ ಮೇಲೆ ಹಾಕುವುದು ಅಷ್ಟೊಂದು ಸರಳವಲ್ಲ. ಗಟ್ಟಿ ಮನಸ್ಸು , ಧೈರ್ಯದೊಂದಿಗೆ ನೀರಿಗಿಳಿದರೆ ಈ ವಿದ್ಯೆ ಕರಗತ ಎನ್ನುತ್ತಾರೆ ಯೋಗ ಗುರು ಗಂಗಾಧರ ಹಿರೇಮಠ.

--------

ನೀರಿನ ಮೇಲೆ ಶವಾಸನದ ಕಸರತ್ತು ಮಾಡುವುದರಿಂದ ಶರೀರ ಹಗುರವಾಗಿ ಏಕಾಗ್ರತೆಯಿಂದ ಧ್ಯಾನದೆಡೆಗೆ ಕೊಂಡೊಯ್ಯುತ್ತದೆ. ಮಾನಸಿಕ ಸಮಸ್ಯೆ ತೊಳಲಾಟ ನಿವಾರಣೆಗೆ ಇದು ಸಹಕಾರಿಯಾಗಿದೆ.

-ಡಾ.ಸುಮತ್ರಾರೇವಡಿ, ವೈದ್ಯೆ ಆಲಮಟ್ಟಿ