ಜಾಲತಾಣಗಳಲ್ಲಿ ಹಕ್ಕು ಚಲಾಯಿಸಿದವರ ಜೋಶ್‌!

ಇಮಾಂಬಿ ನದಾಫ್‌, ವಿಜಯಪುರ

Vijaya Karnataka Web

ಹಕ್ಕು ಚಲಾಯಿಸಿ, ಎಂಪಿಗೆ, ಪಿಎಂಗೆ ಪ್ರಗತಿ ಬಗ್ಗೆ ಪ್ರಶ್ನೆ ಮಾಡುವ ನೈತಿಕತೆ ವೃದ್ಧಿಸಿಕೊಂಡೆ... ನಾನು ಮಾಡದ ಕೆಲಸ ನನ್ನ ಬೆರಳಿನ ತುದಿ ಮೂಲಕ ಮಾಡಿಸಿ, ದೇಶದ ಭದ್ರ ಭವಿಷ್ಯ ಬರದೆ... ನೀವು ನಮ್ಮಂತೆ ಮತ ಹಾಕಿ, ಮತದಾನದ ಪೋಟೊ ಪೋಸ್ಟ್‌ ಮಾಡಿ, ಜನರಿಂದ ಲೈಕ್‌, ಕಮೆಂಟ್‌ ಪಡೆಯಿರಿ.

ಹೀಗೆ ಸಾಮಾಜಿಕ ಜಾಲ ತಾಣಗಳಲ್ಲಿ ಮತದಾರರು ಮತ ಹಾಕಿ, ತಮ್ಮ ಪೋಟೊಗಳನ್ನು ಟ್ಯಾಗ್‌, ಪೋಸ್ಟ್‌ ಮಾಡುವ ಜತೆಗೆ ಮತ್ತಷ್ಟು ಜನರು ಹಕ್ಕು ಚಲಾಯಿಸುವಂತೆ ಪ್ರೇರಣೆ ನೀಡಿದರು.

ಫೇಸ್‌ಬುಕ್‌, ಟ್ವೀಟರ್‌, ವಾಟ್ಸ್‌ಆ್ಯಪ್‌, ಇನ್ಸಾಟಾ ಗ್ರಾಮ್‌ ಸ್ಟೇಟಸ್‌ಗಳಲ್ಲಿ ಗಣ್ಯರು, ಸಾಮಾನ್ಯ ಜನರು ಮತದಾನದ ಮಾಡಿದ ತಮ್ಮ ಪೋಟೊ ಹಾಗೂ ಅನಿಸಿಕೆ ಬರೆದು ಮತ್ತೊಬ್ಬರಿಗೆ ಟ್ಯಾಗ್‌, ಪೋಸ್ಟ್‌ ಮಾಡುವ ಮೂಲಕ ಅವರಿಗೂ ಮತ ಹಾಕುವಂತೆ ಪ್ರೇರಣೆ ನೀಡಿದ್ದಾರೆ. ಪೋಸ್ಟ್‌ ಮಾಡಿದ ಚಿತ್ರಗಳಿಗೆ ಸಿಕ್ಕಾಪಟ್ಟೆ ಲೈಕ್‌, ಕಮೆಂಟ್‌ಗಳು ಬಂದಿವೆ.

ಬೆಳಿಗ್ಗೆಯಿಂದಲೇ ಶುರು:
ಫೇಸ್‌ಬುಕ್‌ಗಳಲ್ಲಿ ಯುವಕರು, ಯುವತಿಯರು, ಮೊದಲ ಸಲ ಮತದಾರರು, ರಾಜಕೀಯ ಮುಖಂಡರು, ಸಾಮಾಜಿಕ ಕಾರ್ಯಕರ್ತರು, ಸೈನಿಕರು, ಪೊಲೀಸ್‌ ಪೇದೆಗಳು, ಉಪನ್ಯಾಸಕರು, ಗೃಹಿಣಿಯರು, ಶತಾಯುಷಿಗಳು ಹೀಗೆ ಎಲ್ಲ ವಯೋಮಾನದ, ಎಲ್ಲ ವರ್ಗದ ಜನರು ಮತದಾನ ಮಾಡಿದ ಶಾಯಿ ಬೆರಳಿನೊಂದಿಗೆ ಸೆಲ್ಫಿ ತೆಗೆದು ಪೋಸ್ಟ್‌ ಮಾಡಿರುವ ಪೋಟೊಗಳೇ ಫೇಸ್‌ಬುಕ್‌ಲ್ಲಿ ರಾರಾಜೀಸುತ್ತಿವೆ. ಮೊದಲ ಸಲ ಮತದಾನ ಮಾಡಿದವರಂತೂ ಫುಲ್‌ ಖುಷಿಯಿಂದ ನಿಸಿಕೆ ಅನಿಸಿಕೆ ಬರೆದು ಹಾಕಿದ್ದಾರೆ.

ಸಚಿವ ಎಂಬಿ ಟ್ವೀಟ್‌ ಮನವಿ:
ಮತದಾನ ನಮ್ಮ, ನಿಮ್ಮೆಲ್ಲರ ಹಕ್ಕು ಮತ್ತು ಕರ್ತವ್ಯ ಎಂದು ಮಂಗಳವಾರ ಬೆಳಿಗ್ಗೆ ಬಿಎಲ್‌ಡಿಇ ಆಸ್ಪತ್ರೆ ರಸ್ತೆಯ ಶ್ರೀ ಸಿದ್ಧೇಶ್ವರ ಕಲಾ ಶಾಲೆಯಲ್ಲಿ ನಾನು ನನ್ನ ಹಕ್ಕನ್ನು ಚಲಾಯಿಸಿದೆ. ದೇಶದ ಭವಿಷ್ಯದ ದೃಷ್ಟಿಯಿಂದ ನಿಮ್ಮೆಲ್ಲರ ಹಕ್ಕನ್ನು ತಪ್ಪದೇ ಚಲಾಯಿಸಿ ಎಂದು ಗೃಹ ಸಚಿವ ಎಂಬಿ ಪಾಟೀಲ ಮತದಾನ ಮಾಡಿ ಟ್ವೀಟರ್‌ನಲ್ಲಿ ವಿನಂತಿಸಿದ್ದಾರೆ.

ಸಿಕ್ಕಾಪಟ್ಟೆ ಲೈಕ್‌ ಕಮೆಂಟ್‌ಗಳು:
ಬಿರು ಬಿಸಿಲಿನಲ್ಲಿ ಕರೆದುಕೊಂಡು ಹೋಗಿ ಮತಹಾಕಿಸಿದ ಸಂಭ್ರಮಕ್ಕೆ ಪತ್ನಿ, ಸಹೋದರಿಯರಿಗೆ ಆ ಮನೆಯ ಯಜಮಾನರು ಐಸ್‌ಕ್ರೀಮ್‌, ಕುಲ್ಫಿ ಕೊಡಿಸುವ ಮೂಲಕ ಮತದಾನ ಹಬ್ಬವನ್ನು ಸಂಭ್ರಮದಿಂದ ಆಚರಿಸಲಾಯಿತು. ಸಂವಿಧಾನದ ಆಶಯದಂತೆ ಪ್ರಜಾಪ್ರಭುತ್ವ ಗಟ್ಟಿಗೊಳಿಸಲು ಮತದಾನ ಮಾಡಿದೆ.

ನನ್ನ ಮತ, ನನ್ನ ಭಾರತ, ಭದ್ರ ಭಾರತಕ್ಕೆ ನನ್ನ ಮೊದಲ ವೋಟ್‌, ಬೆರಳ ತುದಿಯಿಂದ ದೇಶದ ಭವಿಷ್ಯ ಬರದೆ, ಮತದಾನ ಮಾಡಿ, ಪ್ರಜಾಪ್ರಭುತ್ವದ ಹಬ್ಬ ಆಚರಿಸದೇವು, ಅರ್ಹರಿಗೆ ಹಕ್ಕು ಚಲಾಯಿಸಿದೆ, ಪ್ರಜಾಪ್ರಭುತ್ವಕ್ಕೆ ಮತ ಕಾಣಿಕೆ ಕೊಟ್ಟೆ, ಸಂವಿಧಾನ ನೀಡಿದ ಕರ್ತವ್ಯ ನಾನು ನಿರ್ವಹಿಸಿದೆ, ಅಕ್ಕಾರ, ತಮ್ಮಾರ ವೋಟ್‌ ಹಾಕಿ ಬಂದೇವು, ನೀವು ಹೋಗಿ ಮತಹಾಕಿದ ಪೋಟೊ ಫೇಸ್‌ಬುಕ್‌ಲ್ಲಿ ಹಾಕಿ ಲೈಕ್‌ ಮಾಡುವೆ.. ಹೀಗೆ ನಾನಾ ಬಗೆಯ ಹೇಳಿಕೆಯನ್ನು ಬರೆದು ಮತದಾನದ ಸಂಭ್ರಮವನ್ನು ಹಂಚಿಕೊಂಡಿದ್ದಾರೆ. ಈ ಎಲ್ಲ ಚಿತ್ರಗಳಿಗೆ ಸ್ನೇಹಿತ ಬಳಗದವರು ಸಾವಿರಾರು ಲೈಕ್‌, ಕಮೆಂಟ್‌ಗಳನ್ನು ಮಾಡುವ ಮೂಲಕ ಅವರ ಮತದಾನಕ್ಕೆ ಕೃತಜ್ಞತೆ ಸಲ್ಲಿಸಿದ್ದಾರೆ.