ರಷ್ಯಾದ ಲೂನಾ-25ರ ವೈಫಲ್ಯದಿಂದ ಕಲಿತ ಪಾಠಗಳು : ಶಶಿಯ ಅಂಗಳಕ್ಕೆ ಚಂದ್ರಯಾನ-3ರ ಜಾಗರೂಕ ನಡೆ

ಲ್ಯಾಂಡರ್ ಹಜಾರ್ಡ್ ಡಿಟೆಕ್ಷನ್ ಆ್ಯಂಡ್ ಅವಾಯ್ಡೆನ್ಸ್ ಕ್ಯಾಮೆರಾ (ಎಲ್ಎಚ್‌ಡಿಎಸಿ) ಚಂದ್ರನ ದೂರ ಪ್ರದೇಶದ ಛಾಯಾಚಿತ್ರಗಳನ್ನು ತೆಗೆದಿದ್ದು, ಇಸ್ರೋ ಅದನ್ನು ಸೋಮವಾರ ಬಿಡುಗಡೆಗೊಳಿಸಿದೆ. ಶನಿವಾರ ತೆಗೆದ ಛಾಯಾಚಿತ್ರಗಳು ಹೇಯ್ನ್, ಬಾಸ್ ಎಲ್, ಮೇರ್ ಹಂಬೋಲ್ಡ್‌ಟಿಯಾನಮ್ ಹಾಗೂ ಬೆಲ್‌ಕೋವಿಚ್ ನಂತಹ ಕುಳಿಗಳನ್ನು ಬಿಡುಗಡೆಗೊಳಿಸಿವೆ. ಚಂದ್ರನ ದೂರದ ಬದಿಯೆಂದರೆ, ಚಂದ್ರನ ಸಿಂಕ್ರೊನಸ್ ತಿರುಗುವಿಕೆಯ ಕಾರಣದಿಂದ ಸದಾ ಭೂಮಿಯಿಂದ ದೂರಕ್ಕೆ ತಿರುಗಿರುವ ಬದಿಯಾಗಿದೆ.

ಲ್ಯಾಂಡರ್ ಹಜಾರ್ಡ್ ಡಿಟೆಕ್ಷನ್ ಆ್ಯಂಡ್ ಅವಾಯ್ಡೆನ್ಸ್ ಕ್ಯಾಮರಾ (ಎಲ್ಎಚ್‌ಡಿಎಸಿ) ಅನ್ನು ಅಹ್ಮದಾಬಾದ್ ಮೂಲದ ಸ್ಪೇಸ್ ಅಪ್ಲಿಕೇಶನ್ ಸೆಂಟರ್ (ಎಸ್ಎಸಿ) ಅಭಿವೃದ್ಧಿ ಪಡಿಸಿದೆ. ಎಸ್ಎಸಿ ಇಸ್ರೋದ ಪ್ರಮುಖ ಸಂಶೋಧನಾ ಮತ್ತು ಅಭಿವೃದ್ಧಿ ಸಂಸ್ಥೆಯಾಗಿದ್ದು, ಈ ಕ್ಯಾಮರಾ ಚಂದ್ರನ ಮೇಲಿರುವ ಬಂಡೆಗಳು, ಹಳ್ಳಗಳನ್ನು ತಪ್ಪಿಸಿ, ಸುರಕ್ಷಿತವಾದ ಸ್ಥಳವನ್ನು ಹುಡುಕಿ ಲ್ಯಾಂಡಿಂಗ್ ನಡೆಸಲು ನೆರವಾಗುತ್ತದೆ.

ಇಲ್ಲಿ 'ಸಿಂಕ್ರೊನಸ್ ಪರಿಭ್ರಮಣೆ' ಎಂದರೆ ಚಂದ್ರನ ರೀತಿಯ ಒಂದು ಕಾಯ ತಾನು ತನ್ನ ಅಕ್ಷದಲ್ಲಿ ಸುತ್ತುತ್ತಾ, ಇನ್ನೊಂದು ಕಾಯದ ವೇಗಕ್ಕೆ ಸಮನಾಗಿ ಅದರ ಸುತ್ತಲೂ ಪರಿಭ್ರಮಣೆ ನಡೆಸುವ ಪ್ರಕ್ರಿಯೆಯಾಗಿದೆ. ನಮ್ಮ ಉದಾಹರಣೆಯಲ್ಲಿ, ಚಂದ್ರ ಭೂಮಿಯ ಸುತ್ತಲೂ ಪರಿಭ್ರಮಣೆ ನಡೆಸುತ್ತದೆ. ಈ ಕಾರಣದಿಂದಾಗಿ ಚಂದ್ರ ಯಾವಾಗಲೂ ಭೂಮಿಯೆಡೆಗೆ ಒಂದೇ ಬದಿಯನ್ನು ತೋರಿಸುತ್ತದೆ. ಚಂದ್ರನ ಇನ್ನೊಂದು ಬದಿ, ಅಂದರೆ ದೂರದ ಬದಿ ನಮ್ಮ ಕಣ್ಣಿಗೆ ಕಾಣಿಸುವುದಿಲ್ಲ. ಈ ಕಾರಣದಿಂದ ನಮಗೆ ಭೂಮಿಯ ಮೇಲೆ ಯಾವಾಗಲೂ ಚಂದ್ರನ ಒಂದೇ ಬದಿ ಕಾಣುತ್ತದೆ.

ಚಂದ್ರಯಾನ-3ರ ಸಾಫ್ಟ್ ಲ್ಯಾಂಡಿಂಗ್ ಅನ್ನು ಎದುರು ನೋಡುತ್ತಾ, ಚಂದ್ರಯಾನ-3 ಯೋಜನೆಯ ಭಾಗವಾಗಿದ್ದ ಸ್ಪೇಸ್ ಫಿಸಿಕ್ಸ್ ಲ್ಯಾಬೋರೇಟರಿಯ ನಿರ್ದೇಶಕರು ಚಂದ್ರಯಾನ-3ರ ಮಹತ್ವದ ಹಂತಗಳನ್ನು ವಿವರಿಸಿದ್ದಾರೆ. ಇನ್ನುಳಿದ ಹಂತಗಳ ಮಹತ್ವದ ಕುರಿತು ಮಾತನಾಡುತ್ತಾ, ಅವರು "ಇನ್ನು ಮುಂದಿರುವ ಚಂದ್ರಯಾನ-3ರ ಅವಧಿ ಅತ್ಯಂತ ಮಹತ್ವದ್ದಾಗಿದೆ. ಈ ಸಂದರ್ಭದಲ್ಲಿ ನಾವು ಪವರ್ ಡಿಸೆಂಟ್, ನ್ಯಾವಿಗೇಶನ್ (ಸಂಚರಣೆ), ಹಾಗೂ ಚಂದ್ರನ ಮೇಲ್ಮೈಗೆ ನಿಧಾನಗತಿಯ ಇಳಿಯುವಿಕೆಯನ್ನು ಗಮನಿಸಲಿದ್ದೇವೆ" ಎಂದಿದ್ದಾರೆ.

ಭಾನುವಾರ, ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಚಂದ್ರಯಾನ-3ರ ಲ್ಯಾಂಡರ್ ಮಾಡ್ಯುಲ್‌ನ ಕಕ್ಷೀಯ ಹೊಂದಾಣಿಕೆ ಯಶಸ್ವಿಯಾಗಿರುವುದಾಗಿ ಘೋಷಿಸಿದೆ. ಈ ಬೆಳವಣಿಗೆಯ ಬಳಿಕ, ಭಾರತದ ಬಾಹ್ಯಾಕಾಶ ನೌಕೆ ಚಂದ್ರನ ಮೇಲ್ಮೈಯನ್ನು ಆಗಸ್ಟ್ 23ರಂದು ಸಂಜೆ 6:04ಕ್ಕೆ ಸ್ಪರ್ಶಿಸಲಿದೆ.

ಬಾಹ್ಯಾಕಾಶ ತಂತ್ರಜ್ಞ ಪಿಕೆ ಘೋಷ್ ಅವರ ಪ್ರಕಾರ, ಸಮತಲ ಸ್ಥಿತಿಯಲ್ಲಿರುವ ಬಾಹ್ಯಾಕಾಶ ನೌಕೆಯನ್ನು ಚಂದ್ರ ಸ್ಪರ್ಶಕ್ಕೆ ಮುನ್ನ ಲಂಬವಾಗಿಸುವುದು ಒಂದು ಗುರುತರ ಸವಾಲಾಗಿದೆ. ಪ್ರಸ್ತುತ ಚಂದ್ರಯಾನ-3ರ ಕುರಿತು ಮಾಹಿತಿ ನೀಡಿರುವ ಇಸ್ರೋ, ಭಾರತೀಯ ಬಾಹ್ಯಾಕಾಶ ನೌಕೆ ಚಂದ್ರನ ಮೇಲಿಳಿಯಲು ಕೇವಲ ಒಂದು ಹೆಜ್ಜೆ ಮಾತ್ರವೇ ದೂರವಿದೆ ಎಂದಿದೆ.


ಆಗಸ್ಟ್ 20, ಭಾನುವಾರ ಬೆಳಗಿನ ಜಾವದಲ್ಲಿ ಭಾರತದ ಮೂರನೇ ಚಂದ್ರ ಅನ್ವೇಷಣಾ ಯೋಜನೆಯಾದ ಚಂದ್ರಯಾನ-3ರ ಎರಡನೆಯ ಡಿಬೂಸ್ಟಿಂಗ್ ಪ್ರಕ್ರಿಯೆ ನಡೆಸಲಾಯಿತು. ಟ್ವೀಟ್ ಮೂಲಕ ಮಾಹಿತಿ ನೀಡಿದ ಇಸ್ರೋ, ಈ ಕಾರ್ಯಾಚರಣೆ ಬಾಹ್ಯಾಕಾಶ ನೌಕೆಯ ಕಕ್ಷೆಯನ್ನು 25 ಕಿಲೋಮೀಟರ್ × 134 ಕಿಲೋಮೀಟರ್ ಕಕ್ಷೆಗೆ ಯಶಸ್ವಿಯಾಗಿ ಇಳಿಸಿದೆ. ಅದರೊಡನೆ, ಇಸ್ರೋ ಚಂದ್ರನ ಮೇಲಿನ ಲ್ಯಾಂಡಿಂಗ್ ಪ್ರಕ್ರಿಯೆಯ ನೇರ ಪ್ರಸಾರ ಮತ್ತು ಭಾರತದಲ್ಲಿ ಅದನ್ನು ನೋಡುವ ಕುರಿತು ಮಾಹಿತಿ ನೀಡಿದೆ.

ಇನ್ನು ರಷ್ಯಾ ಬಹುತೇಕ ಐದು ದಶಕಗಳ ಬಳಿಕ ಕೈಗೊಂಡ ಚಂದ್ರ ಅನ್ವೇಷಣಾ ಯೋಜನೆಯಾದ ಲೂನಾ-25 ಲ್ಯಾಂಡಿಂಗ್ ಪೂರ್ವ ಹಂತದಲ್ಲಿ ಸಮಸ್ಯೆ ಎದುರಿಸಿ, ಚಂದ್ರನ ಮೇಲ್ಮೈಗೆ ಅಪ್ಪಳಿಸಿತು. ಇದನ್ನು ರಷ್ಯಾದ ಬಾಹ್ಯಾಕಾಶ ಸಂಸ್ಥೆಯಾದ ರಾಸ್‌ಕಾಸ್ಮೋಸ್ ಭಾನುವಾರ ಸ್ಪಷ್ಟಪಡಿಸಿದೆ. ರಷ್ಯಾ ಉಕ್ರೇನ್ ಮೇಲೆ ಆಕ್ರಮಣ ನಡೆಸಿ ಬಹುತೇಕ 18 ತಿಂಗಳುಗಳ ಬಳಿಕ ರಷ್ಯಾದ ಲೂನಾ-25 ಪತನಗೊಂಡಿದೆ. ಇದು ಮಾಸ್ಕೋ ಜಾಗತಿಕವಾಗಿ ಏಕಾಂಗಿಯಾಗಿರುವುದು ಮತ್ತು ಅದರ ಮೇಲೆ ನಿರ್ಬಂಧಗಳನ್ನು ಹೇರಿರುವುದು ರಷ್ಯಾದ ಬಾಹ್ಯಾಕಾಶ ವಲಯದ ಮೇಲೆ ಪರಿಣಾಮ ಬೀರಿರುವುದನ್ನು ಸ್ಪಷ್ಟಪಡಿಸಿದೆ.

• ಜುಲೈ 6: ಇಸ್ರೋ ಚಂದ್ರಯಾನ-3 ಆಂಧ್ರಪ್ರದೇಶದ ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ ಜುಲೈ 14ರಂದು ಉಡಾವಣೆಗೊಳಿಸುವುದಾಗಿ ಘೋಷಿಸಿತು.
• ಜುಲೈ 7: ಬಾಹ್ಯಾಕಾಶ ನೌಕೆಯ ಎಲ್ಲ ಇಲೆಕ್ಟ್ರಿಕಲ್ ಪರೀಕ್ಷೆಗಳನ್ನು ಯಶಸ್ವಿಯಾಗಿ ಪೂರೈಸಲಾಯಿತು.
• ಜುಲೈ 11: 24 ಗಂಟೆಗಳ ಉಡಾವಣಾ ಅಭ್ಯಾಸವನ್ನು ನೆರವೇರಿಸಲಾಯಿತು.
• ಜುಲೈ 14: ಇಸ್ರೋದ ಎಲ್ಎಂವಿ3 ಎಂ4 ರಾಕೆಟ್ ಚಂದ್ರಯಾನ-3 ಬಾಹ್ಯಾಕಾಶ ನೌಕೆಯನ್ನು ಹೊತ್ತು ಗಗನಕ್ಕೇರಿತು.
• ಜುಲೈ 15: ಬೆಂಗಳೂರಿನಿಂದ ಚಂದ್ರಯಾನ-3ರ ಮೊದಲ ಕಕ್ಷೆ ಎತ್ತರಿಸುವಿಕೆ ಕಾರ್ಯವನ್ನು ಯಶಸ್ವಿಯಾಗಿ ನೆರವೇರಿಸಿ, ಅದನ್ನು 41762 ಕಿಲೋಮೀಟರ್ × 173 ಕಿಲೋಮೀಟರ್ ಕಕ್ಷೆಗೆ ಜೋಡಿಸಲಾಯಿತು.
• ಜುಲೈ 17: ಚಂದ್ರಯಾನ-3ನ್ನು 41603 ಕಿಲೋಮೀಟರ್ × 226 ಕಿಲೋಮೀಟರ್ ಕಕ್ಷೆಗೆ ಏರಿಸಲು ಎರಡನೆಯ ಕಕ್ಷೆ ಎತ್ತರಿಸುವಿಕೆ ನಡೆಸಲಾಯಿತು.
• ಜುಲೈ 22: ನಾಲ್ಕನೆಯ ಕಕ್ಷೆ ಎತ್ತರಿಸುವ ಪ್ರಕ್ರಿಯೆ ಮತ್ತು ಅರ್ತ್ ಬೌಂಡ್ ಪೆರಿಜೀ ಫೈರಿಂಗ್ ಅನ್ನು ಯಶಸ್ವಿಯಾಗಿ ನಡೆಸಿ, ಚಂದ್ರಯಾನ-3ನ್ನು 71351 ಕಿಲೋಮೀಟರ್ × 233 ಕಿಲೋಮೀಟರ್ ಕಕ್ಷೆಗೆ ಅಳವಡಿಸಲಾಯಿತು.
• ಜುಲೈ 25: ಇನ್ನೊಂದು ಯಶಸ್ವಿ ಕಕ್ಷೆ ಎತ್ತರಿಸುವಿಕೆ ಪ್ರಕ್ರಿಯೆ ನೆರವೇರಿಸಲಾಯಿತು.
• ಆಗಸ್ಟ್ 1: ಚಂದ್ರಯಾನ-3 ಅಂದು 288 ಕಿಲೋಮೀಟರ್ × 369328 ಕಿಲೋಮೀಟರ್ ಟ್ರಾನ್ಸ್ ಲೂನಾರ್ ಕಕ್ಷೆಗೆ ಪ್ರವೇಶಿಸಿತು.
• ಆಗಸ್ಟ್ 5: ಚಂದ್ರನ ಕಕ್ಷೆಗೆ ಪ್ರವೇಶಿಸಿ, 164 ಕಿಲೋಮೀಟರ್ × 18074 ಕಿಲೋಮೀಟರ್ ವ್ಯಾಪ್ತಿಯ ಕಕ್ಷೆಗೆ ಜೋಡಿಸಲ್ಪಟ್ಟಿತು.
• ಆಗಸ್ಟ್ 6: ಚಂದ್ರನ ಸುತ್ತಲೂ ಇರುವ ಕಕ್ಷೆಯನ್ನು 170 ಕಿಲೋಮೀಟರ್ × 4,313 ಕಿಲೋಮೀಟರ್ ಪಥಕ್ಕೆ ಹೊಂದಿಸಲಾಯಿತು.
• ಆಗಸ್ಟ್ 9: ಮುಂದಿನ ಹಂತದ ಬದಲಾವಣೆಗಳು ಬಾಹ್ಯಾಕಾಶ ನೌಕೆಯ ಕಕ್ಷೆಯನ್ನು ಕೆಳಗಿಳಿಸಿ, 174 ಕಿಲೋಮೀಟರ್ × 1437 ಕಿಲೋಮೀಟರ್ ಕಕ್ಷೆಗೆ ಇಳಿಸಲಾಯಿತು.
• ಆಗಸ್ಟ್ 14: ಚಂದ್ರಯಾನ-3 ಯೋಜನೆ ಕಕ್ಷೆ ವೃತ್ತಾಕಾರವಾಗಿಸುವ ಪ್ರಕ್ರಿಯೆಗೆ ಒಳಗಾಗಿ, 151 ಕಿಲೋಮೀಟರ್ × 179 ಕಿಲೋಮೀಟರ್ ಕಕ್ಷೆಗೆ ತಲುಪಿತು.
• ಆಗಸ್ಟ್ 16: ಚಂದ್ರಯಾನ-3 ಯಶಸ್ವಿಯಾಗಿ 153 × 163 ಕಿಲೋಮೀಟರ್ ಕಕ್ಷೆಗೆ ಸೇರ್ಪಡೆಯಾಯಿತು.
• ಆಗಸ್ಟ್ 17: ವಿಕ್ರಮ್ ಲ್ಯಾಂಡರ್ ಮತ್ತು ಪ್ರಗ್ಯಾನ್ ರೋವರ್‌ಗಳನ್ನು ಒಳಗೊಂಡ ಲ್ಯಾಂಡಿಂಗ್ ಮಾಡ್ಯುಲ್ ತನ್ನ ಪ್ರೊಪಲ್ಷನ್ ಮಾಡ್ಯುಲ್‌ನಿಂದ ಯಶಸ್ವಿಯಾಗಿ ಬೇರ್ಪಟ್ಟಿತು.
• ಆಗಸ್ಟ್ 18: ಡಿಬೂಸ್ಟಿಂಗ್ ಕಾರ್ಯಾಚರಣೆ ಪೂರ್ಣಗೊಂಡು, ಬಾಹ್ಯಾಕಾಶ ನೌಕೆಯನ್ನು 113 ಕಿಲೋಮೀಟರ್ × 157 ಕಿಲೋಮೀಟರ್ ಪಥಕ್ಕೆ ಹೊಂದಿಸಲಾಯಿತು.
• ಆಗಸ್ಟ್ 20: ಚಂದ್ರಯಾನ-3ರ ಎರಡನೆಯ ಮತ್ತು ಅಂತಿಮ ಡಿಬೂಸ್ಟಿಂಗ್ ಪ್ರಕ್ರಿಯೆ ನಡೆಸಿ, ಲ್ಯಾಂಡರ್ ಮಾಡ್ಯುಲ್ ಪಥವನ್ನು 25 ಕಿಲೋಮೀಟರ್ × 134 ಕಿಲೋಮೀಟರ್ ಕಕ್ಷೆಗೆ ಇಳಿಸಲಾಯಿತು.
• ಆಗಸ್ಟ್ 23: ಎಲ್ಲವೂ ಅಂದುಕೊಂಡಂತೆಯೇ ನೆರವೇರಿದರೆ, ವಿಕ್ರಮ್ ಲ್ಯಾಂಡರ್ ಭಾರತೀಯ ಕಾಲಮಾನದ ಸಂಜೆ 5:30 ಮತ್ತು 6:30ರ ನಡುವೆ ಚಂದ್ರನ ಮೇಲ್ಮೈಯಲ್ಲಿ ಇಳಿಯಲಿದೆ.

• ಹವಾಮಾನ ಪರಿಸ್ಥಿತಿಯ ಜಾಗರೂಕ ಅವಲೋಕನ:ಇಸ್ರೋ ಜಾಗರೂಕವಾಗಿ ಚಂದ್ರಯಾನ-3 ಚಂದ್ರನ ಮೇಲೆ ಇಳಿಯುವ ಪ್ರದೇಶದ ಹವಾಮಾನ ಪರಿಸ್ಥಿತಿಯನ್ನು ಅವಲೋಕಿಸಿ, ಲ್ಯಾಂಡಿಂಗ್‌ಗೆ ಬೇಕಾದ ಹೊಂದಾಣಿಕೆಗಳನ್ನು ಕೈಗೊಳ್ಳಬೇಕಾಗುತ್ತದೆ. ಇದರಲ್ಲಿ ಗಾಳಿಯ ವೇಗ, ತಾಪಮಾನ, ಹಾಗೂ ಧೂಳಿನ ಮಟ್ಟಗಳ ಅವಲೋಕನವೂ ಸೇರಿವೆ.
• ಲ್ಯಾಂಡಿಂಗ್ ಸಂಬಂಧಿತ ಎಲ್ಲ ಆಯಾಮಗಳೆಡೆಗೆ ಗಮನ:ಇಸ್ರೋ ಈಗ ಚಂದ್ರಯಾನ-3ರ ಲ್ಯಾಂಡಿಂಗಿಗೆ ಸಂಬಂಧಿಸಿದಂತೆ ಎಲ್ಲ ವಿಚಾರಗಳನ್ನೂ ಜಾಗರೂಕವಾಗಿ ಗಮನಿಸಿ, ವೈಫಲ್ಯದ ಅಪಾಯಗಳನ್ನು ಕಡಿಮೆಗೊಳಿಸಬೇಕು. ಇದರಲ್ಲಿ ಬಾಹ್ಯಾಕಾಶ ನೌಕೆಯ ಪಥ, ಲ್ಯಾಂಡಿಂಗ್ ಸಮಯ, ಹಾಗೂ ರೆಟ್ರೋ ರಾಕೆಟ್‌ಗಳ ಬಳಕೆಗಳು ಸೇರಿವೆ.
• ಅನಿರೀಕ್ಷಿತ ಘಟನೆಗಳಿಗೆ ಸಿದ್ಧತೆ:ಎಲ್ಲ ರೀತಿಯ ಸಿದ್ಧತೆಗಳ ಹೊರತಾಗಿಯೂ, ಪತನಕ್ಕೆ ಕಾರಣವಾಗಬಲ್ಲ ಏನಾದರೂ ಅನಿರೀಕ್ಷಿತ ಘಟನೆಗಳು ಸಂಭವಿಸುವ ಸಾಧ್ಯತೆಗಳಿವೆ. ಇಸ್ರೋ ಇದಕ್ಕೆ ತಯಾರಾಗಿದ್ದು, ಬದಲಿ ಉಪಾಯಗಳನ್ನು ಆಲೋಚಿಸಿರಬೇಕಾಗುತ್ತದೆ.
• ತಾಳ್ಮೆ ಮತ್ತು ಪ್ರಯತ್ನ: ಚಂದ್ರನ ಮೇಲೆ ಲ್ಯಾಂಡಿಂಗ್ ನಡೆಸುವುದು ಒಂದು ಸವಾಲಿನ ಕಾರ್ಯವಾಗಿದೆ. ಇಂತಹ ಯೋಜನೆಗಳಲ್ಲಿ ಯಾವತ್ತೂ ವೈಫಲ್ಯ ಎದುರಾಗುವ ಸಾಧ್ಯತೆ ಇದ್ದೇ ಇರುತ್ತದೆ. ಚಂದ್ರಯಾನ-3ರ ಲ್ಯಾಂಡಿಂಗ್ ನಡೆಸುವ ನಿಟ್ಟಿನಲ್ಲಿ ಇಸ್ರೋ ತಾಳ್ಮೆಯಿಂದ ಪ್ರಯತ್ನ ನಡೆಸಬೇಕು.