ಬಾಹ್ಯಾಕಾಶ ಜ್ಞಾನದ ಹಸಿವು ನೀಗಿಸಿದ ಹಬಲ್: ವಿಶ್ವ ದರ್ಶನದ ರೋಚಕ ಇತಿಹಾಸ!
ದಿಗಂತ ಸೀಳುವ ಮಾನವನ ಕನಸು ಇಂದು ನಿನ್ನೆಯದಲ್ಲ. ಆಧುನಿಕ ಮಾನವ ಆಕಾಶದತ್ತ ದೃಷ್ಟಿ ನೆಟ್ಟ ದಿನವೇ ಅಲ್ಲಿರುವುದೇನು ಎಂಬ ಪ್ರಶ್ನೆಗೆ ಉತ್ತರ ಹುಡುಕಲು ಪ್ರಯತ್ನಿಸುತ್ತಲೇ ಇದ್ದಾನೆ. ಖಗೋಳ ವಿಜ್ಞಾನ ಕ್ಷೇತ್ರ ಬೆಳೆದಂತೆಲ್ಲಾ ಮಾನವನ ಈ ಪ್ರಶ್ನೆಗಳಿಗೆ ಉತ್ತರವೂ ದೊರೆಯುತ್ತಿದೆ. ಅದರಲ್ಲೂ ತಂತ್ರಜ್ಞಾನ ಆಧಾರಿತ ಖಗೋಳ ವಿಜ್ಞಾನ ವಿಶ್ವದ ರೋಚಕ ಮಾಹಿತಿಗಳನ್ನು ಹೊರಗೆಡವುತ್ತಿದೆ. ಈ ಪೈಕಿ ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾದ ಹಬಲ್ ಬಾಹ್ಯಾಕಾಶ ದೂರದರ್ಶಕ ಯಂತ್ರ ಕೂಡ ಒಂದು.
ಏನಿದು ಹಬಲ್ ಸ್ಪೇಸ್ ಟೆಲಿಸ್ಕೋಪ್?
ವಿಶ್ವದ ರೋಚಕತೆ ಅರಿಯಲು ಬಾಹ್ಯಾಕಾಶದಲ್ಲೇ ಒಂದು ದೂರದರ್ಶಕ ಯಂತ್ರ ಸ್ಥಾಪಿಸುವ ಉದ್ದೇಶದೊಂದಿಗೆ ನಾಸಾ ಮುಂದಡಿ ಇಟ್ಟಿತ್ತು. ಇದರ ಫಲವಾಗಿ ಏಪ್ರಿಲ್ 24, 1990 ರಂದು ಹಬಲ್ ಬಾಹ್ಯಾಕಾಶ ದೂರದರ್ಶಕ ಯಂತ್ರವನ್ನು ಭೂಕಕ್ಷೆಗೆ ಸೇರಿಸಾಯಿತು. ಈ ಟೆಲಿಸ್ಕೋಪ್ಗೆ ವಿಶ್ವಕಂಡ ಶ್ರೇಷ್ಠ ಖಗೋಳ ವಿಜ್ಞಾನಿ ಸರ್ ಎಡ್ವಿನ್ ಹಬಲ್ ಅವರ ಹೆಸರನ್ನಿಟ್ಟು ಗೌರವಿಸಲಾಯಿತು.
ಆಧುನಿಕ ತಂತ್ರಜ್ಞಾನವನ್ನು ಒಳಗೊಂಡಿರುವ ಹಬಲ್ ಸ್ಪೇಸ್ ಟೆಲಿಸ್ಕೋಪ್, ಜಗತ್ತಿನ ಅತ್ಯಂತ ಬೃಹತ್ ಬಾಹ್ಯಾಕಾಶ ದೂರದರ್ಶಕ ಯಂತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಕಳೆದ ಮೂರು ದಶಕಗಳಿಂದ ಹಬಲ್ ಟೆಲಿಸ್ಕೋಪ್ ಬಾಹ್ಯಾಕಾಶವನ್ನು ಅಧ್ಯಯನ ಮಾಡುವಲ್ಲಿ ನಿರತವಾಗಿದ್ದು, ವಿಶ್ವದ ಅಗಾಧತೆ ಅರಿಯುವಲ್ಲಿ ಸಹಾಯ ಮಾಡಿದೆ.
ಹಬಲ್ @31: 'ಮಹಾ ವಿನಾಶ'ದ ಅಂಚಿನಲ್ಲಿರುವ ನಕ್ಷತ್ರ ಸೆರೆ!
ಅಸಂಖ್ಯ ನಕ್ಷತ್ರಪುಂಜಗಳು(ಗ್ಯಾಲಕ್ಸಿ), ನಿಹಾರಿಕೆಗಳು(ನೆಬ್ಯುಲಾ), ದೂರದ ನಕ್ಷತ್ರಗಳು, ನಮ್ಮದೇ ಸೌಮಂಡಲದ ಕುರಿತು ಹಬಲ್ ಹತ್ತು ಹಲವು ಮಹತ್ವದ ಮಾಹಿತಿಗಳನ್ನು ಮಾನವ ಜನಾಂಗಕ್ಕೆ ನೀಡಿದೆ.
ವಿಶ್ವದ ಅನಂತತೆ ತಿಳಿಸಿದ ಹಬಲ್!
ಹೌದು, ವಿಶ್ವದ ಅಗಾಧತೆ ಎಷ್ಟಿದೆ ಎಂಬುದು ಮಾನವ ಜನಾಂಗಕ್ಕೆ ತಿಳಿದಿದ್ದೇ ಹಬಲ್ ದೂರದರ್ಶಕ ಯಂತ್ರದಿಂದ ಎನ್ನಬಹುದು. ಮೂರು ದಶಕಗಳ ಕಾಲ ವಿಶ್ವದ ಮೂಲೆ ಮೂಲೆಯನ್ನು ತಲುಪುತ್ತಿರುವ ಹಬಲ್, ಬ್ರಹ್ಮಾಂಡವನ್ನು ಸೀಳಿ ಮಾಹಿತಿಯನ್ನು ಹೆಕ್ಕಿ ತೆಗೆಯುತ್ತಿದೆ.
ಈ ಮೊದಲೇ ಹೇಳಿದಂತೆ ದೂರದ ಗ್ಯಾಲಕ್ಸಿಗಳು, ಅವುಗಳ ರಚನೆ, ನಕ್ಷತ್ರಗಳ ಉಗಮ, ಅಂತ್ಯ ಹಾಗೂ ನಮ್ಮ ಸೌರ ಮಂಡಲ ಹೊರತಾದ ಗ್ರಹಕಾಯ ವ್ಯವಸ್ಥೆಗಳನ್ನು ಸಂಶೋಧಿಸುವಲ್ಲಿ ಹಬಲ್ ಟೆಲಿಸ್ಕೋಪ್ನದ್ದು ಎತ್ತಿದ ಕೈ. ಹಬಲ್ ಗುರುತಿಸಿದ ಗ್ಯಾಲಕ್ಸಿಗಳ ಸಂಖ್ಯೆಗೆ ಲೆಕ್ಕವೇ ಇಲ್ಲ.
ದೂರದ ಗ್ಯಾಲಕ್ಸಿಯಲ್ಲಿ ನಕ್ಷತ್ರ ರಚನೆಯ ವಿದ್ಯಮಾನ ಸೆರೆಹಿಡಿದ ನಾಸಾದ ಹಬಲ್ ಟೆಲಿಸ್ಕೋಪ್!
31 ವರ್ಷಗಳಿಂದ ಬಾಹ್ಯಾಕಾಶದಲ್ಲಿ ಕರ್ತವ್ಯನಿರತವಾಗಿರುವ ಹಬಲ್, ತನ್ನ ಕಾರ್ಯವನ್ನು ಸ್ಥಗಿತಗೊಳಿಸುವ ಕಾಲ ಸನ್ನಿಹಿತವಾಗಿದೆ. ಆದರೂ ಇನ್ನೂ ಕನಿಷ್ಟ ಒಂದು ದಶಕಗಳ ಕಾಲ ಹಬಲ್ ಕಾರ್ಯನಿರ್ವಹಿಸಬಲ್ಲದು ಎಂಬುದು ನಾಸಾದ ಲೆಕ್ಕಾಚಾರ.
ಹಬಲ್ ಒಳಗೊಂದು ಸುತ್ತು!
ಬ್ರಹ್ಮಾಂಡದ ಅಧ್ಯಯನದಲ್ಲಿ ನಿರತವಾಗಿರುವ ಹಬಲ್ ಟೆಲಿಸ್ಕೋಪ್, ಅತ್ಯಂತ ಸುದೀರ್ಘ ಕಾರ್ಯಕ್ಷಮತೆಯನ್ನು ಹೊಂದಿರುವ ಉಪಕರಣಗಳನ್ನು ಒಳಗೊಂಡಿದೆ. ಇದು ಪ್ರಮುಖವಾಗಿ 2.4 ಮೀ (7 ಅಡಿ 10 ಇಂಚು) ವ್ಯಾಸದ ಕನ್ನಡಿಯನ್ನು ಹೊಂದಿದೆ. ಇದರ ಐದು ಮುಖ್ಯ ಉಪಕರಣಗಳು ವಿದ್ಯುತ್ಕಾಂತೀಯ ಸ್ಪೆಕ್ಟ್ರಮ್ನ ನೇರಳಾತೀತ, ಗೋಚರ ಮತ್ತು ಹತ್ತಿರದ ಅತಿಗೆಂಪು ಬೆಳಕನ್ನು ಗ್ರಹಿಸುವ ಶಕ್ತಿ ಹೊಂದಿದೆ.
1.25 MHz DF-224 ಸಿಸ್ಟಮ್ ಒಳಗೊಂಡಿರುವ ಎರಡು ಪ್ರಾಥಮಿಕ ಕಂಪ್ಯೂಟರ್ಗಳನ್ನು ಹಬಲ್ನಲ್ಲಿ ಸೇರಿಸಲಾಗಿದೆ. ಮುಂದೆ 1993 ರಲ್ಲಿ ನಡೆದ ದುರಸ್ತಿ ಕಾರ್ಯದಲ್ಲಿ DF-224 ಪ್ರೊಸೆಸರ್ನ್ನು ಸೇರಿಸಲಾಯಿತು. ಮುಂದೆ 1999ರಲ್ಲಿ ಇಂಟೆಲ್ ಆಧಾರಿತ 80486 ಪ್ರೊಸೆಸರ್ ಸಿಸ್ಟಮ್ನ್ನು ಅಳವಡಿಸಲಾಯಿತು.
20 ಸಾವಿರ ವರ್ಷಗಳ ಹಿಂದೆ ಸ್ಫೋಟಗೊಂಡ ನಕ್ಷತ್ರದ ಬೆಳಕು ಸೆರೆಹಿಡಿದ ಹಬಲ್!
ಇಷ್ಟೇ ಅಲ್ಲದೇ ಹಲವು ಬಾರಿ ನಡೆದ ದುರಸ್ತಿ ಕಾರ್ಯಾಚರಣೆಯಲ್ಲಿ ಹಬಲ್ ಟೆಲಿಸ್ಕೋಪ್ಗೆ ಆಯಾ ಕಾಲದ ಅತ್ಯಾಧುನಿಕ ಉಪಕರಣಗಳನ್ನು ಜೋಡಿಸಲಾಗಿದೆ.
ಹಬಲ್ ಉತ್ತರಾಧಿಕಾರಿ ಯಾರು?
ಈ ಮೊದಲೇ ಹೇಳಿದಂತೆ ಹಬಲ್ ತನ್ನ ಕಾರ್ಯಾಚರಣೆಯನ್ನು ನಿಲ್ಲಿಸಲಿದ್ದು, ಬ್ರಹ್ಮಾಂಡದ ಅಧ್ಯಯನಕ್ಕೆ ಮತ್ತೊಂದು ದೂರದರ್ಶಕ ಯಂತ್ರವನ್ನು ಭೂಕಕ್ಷೆಗೆ ಸೇರಿಸುವುದು ಮಾನವನ ಜ್ಞಾನಾರ್ಜನೆ ದೃಷ್ಟಿಯಿಂದ ಅತ್ಯವಶ್ಯ. ಇದೇ ಕಾರಣಕ್ಕೆ ನಾಸಾ, ಇಎಸ್ಎ ಹಾಗೂ ಸಿಎಸ್ಎ ಸಂಸ್ಥೆಗಳ ಜಂಟಿ ಯೋಜನೆ ಭಾಗವಾಗಿ ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್ನ್ನು ಬಾಹ್ಯಾಕಾಶಕ್ಕೆ ಕಳುಹಿಸುವ ಸಿದ್ಧತೆ ಆರಂಭವಾಗಿದೆ.
ಹಬಲ್ನ ಉತ್ತರಾಧಿಕಾರಿ ಎಂದೇ ಹೇಳಲಾಗುತ್ತಿರುವ ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್ ಎಲ್ಲವೂ ಅಂದುಕೊಂಡತೆ ನಡೆದರೆ 18 ಡಿಸೆಂಬರ್ 2021 ರಂದು ಭೂಕಕ್ಷೆಯ ಮಡಿಲು ಸೇರಲಿದೆ. 6.5 ಮೀಟರ್ ವ್ಯಾಸದ ಚಿನ್ನದ ಲೇಪಿತ ಬೆರಿಲಿಯಮ್ ಪ್ರತಿಫಲಕ ಹೊಂದಿರುವ ಈ ಟೆಲಿಸ್ಕೋಪ್, ಹಬಲ್ಗಿಂತಲೂ ಹೆಚ್ಚು ಕಾರ್ಯಕ್ಷಮತೆಯನ್ನು ಹೊಂದಿದೆ.
ಸೂರ್ಯನಿಗಿಂತ 5 ಬಿಲಿಯನ್ ಪಟ್ಟು ಪ್ರಕಾಶಮಾನವಾದ ನಾಕ್ಷತ್ರಿಕ ಸ್ಫೋಟ ಸೆರೆಹಿಡಿದ ಹಬಲ್!
ಅದೆನೆ ಇರಲಿ ಕಳೆದ ಮೂರು ದಶಕಗಳಿಂದ ಬ್ರಹ್ಮಾಂಡದ ಅಧ್ಯಯನ ನಡೆಸುತ್ತಿರುವ ಹಬಲ್, ವಿಶ್ವವನ್ನು ಅರಿಯುವ ಮಾನವನ ತುಡಿತಕ್ಕೆ ತಕ್ಕಂತೆ ಕರ್ತವ್ಯ ನಿರ್ವಹಿಸಿದೆ. ಅಸಂಖ್ಯ ಛಾಯಾಚಿತ್ರಗಳ ಮೂಲಕ ಬ್ರಹ್ಮಾಂಡದ ಅದ್ಭುತಗಳ ರಸದೌತಣ ಉಣಬಡಿಸಿರುವ ಹಬಲ್ಗೆ ನಮ್ಮದೊಂದು ಸಲಾಂ ಇರಲಿ.