ಪವರ್‌ಫುಲ್‌ ನಮೋ ಆ್ಯಪ್‌

2015ರ ಜೂನ್‌ 17ರಂದು ಬಿಡುಗಡೆಯಾದ ನರೇಂದ್ರ ಮೋದಿ ಆ್ಯಪ್‌, ಪ್ರಧಾನಿಯ ಜತೆ ಸಾರ್ವಜನಿಕರಿಗೆ ನೇರ ಸಂಪರ್ಕ ಸಾಧಿಸುವ ಕಿಟಕಿ. ಮೋದಿ ಅವರ ಎಲ್ಲ ಕಾರ್ಯಕ್ರಮಗಳು, ಖಾಸಗಿ ಬದುಕು, ಭಾಷಣ, ಮನ್‌ ಕಿ ಬಾತ್‌, ಬ್ಲಾಗ್‌ಗಳು, ಆತ್ಮಚರಿತ್ರೆ..ಹೀಗೆ ಎಲ್ಲ ವಿಷಯಗಳನ್ನು ಜನರಿಗೆ ತಲುಪಿಸುತ್ತದೆ. ಮೋದಿ ಅವರ ಕ್ಷಣ ಕ್ಷಣದ ಅಪ್‌ಡೇಟ್‌ ಇಲ್ಲಿ ಲಭ್ಯ. ಈ ಆ್ಯಪ್‌ನ್ನು 8 ಕೋಟಿ ಜನರು ಡೌನ್‌ ಲೋಡ್‌ ಮಾಡಿಕೊಂಡಿದ್ದಾರೆ. 2019ರ ಚುನಾವಣೆ ಪ್ರಚಾರದಲ್ಲಿ ನಮೋ ಆ್ಯಪ್‌ ನಿರ್ಣಾಯಕ ಪಾತ್ರ ವಹಿಸಲಿದೆ.

ಇಂಡಿಯಾ ತುಂಬ ಮೋದಿ ಮೇನಿಯಾ

'ಸಬ್‌ ಕಾ ಸಾಥ್‌, ಸಬ್‌ ಕಾ ವಿಕಾಸ್‌' ಘೋಷಣೆಯೊಂದಿಗೆ ಅಧಿಕಾರಕ್ಕೇರಿದ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಎನ್‌ಡಿಎ ಸರಕಾರಕ್ಕೆ ಈಗ ಭರ್ತಿ ನಾಲ್ಕು ವರ್ಷ. ಸ್ವಚ್ಛಭಾರತ್‌, ಮೇಕ್‌ ಇನ್‌ ಇಂಡಿಯಾ, ಉಜ್ವಲಾ, ಮುದ್ರಾ, ಜನೌಷಧಿ, ಜಿಎಸ್‌ಟಿ ಜಾರಿ, ನೋಟ್‌ ಬ್ಯಾನ್‌ನಂಥ ಯೋಜನೆ ಮತ್ತು ಕ್ರಮಗಳ ಮೂಲಕ ಜನರಿಗೆ ಹತ್ತಿರವಾಗಲು ಯತ್ನಿಸಿದ್ದಾರೆ. ಆರ್ಥಿಕತೆಗೆ ಶಕ್ತಿ ತುಂಬುವ ಜತೆಗೆ ವಿದೇಶಾಂಗ ನೀತಿಯನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದ್ದಾರೆ. ಈ ಅವಧಿಯಲ್ಲಿ ಅನೇಕ ಚುನಾವಣೆಗಳನ್ನು ಗೆದ್ದಿರುವ ಮೋದಿ ಅವರು ಪ್ರತಿಪಕ್ಷ ಗಳಿಂದ ಅಷ್ಟೇ ಟೀಕೆ ಎದುರಿಸಿದ್ದಾರೆ. ಎಲ್ಲದರ ಮಧ್ಯೆಯೂ ತೈಲ ಬೆಲೆ ಏರಿಕೆಯನ್ನು ನಿಯಂತ್ರಿಸಲು ವಿಫಲರಾಗಿರುವುದು ಕಹಿ ಸತ್ಯ. ಈಗಲೂ ಪ್ರಧಾನಿ ಮೋದಿ ಜನಪ್ರಿಯತೆಯಲ್ಲಿ ನಂ.1.