ಮೋದಿ ನಡೆದಿದ್ದೇ ಗೆಲುವಿನ ಹಾದಿ

20 ರಾಜ್ಯಗಳಲ್ಲಿ ಬಿಜೆಪಿ- ಮಿತ್ರಕೂಟದ ಸರಕಾರಗಳು

ದೇಶದಲ್ಲಿ ನರೇಂದ್ರ ಮೋದಿ ಪ್ರಭಾವ ಎಷ್ಟು ಗಾಢವಾಗಿದೆ ಎಂದರೆ ಒಂದಾದ ಮೇಲೊಂದು ರಾಜ್ಯಗಳು ಬಿಜೆಪಿಗೆ ತೆಕ್ಕೆಗೆ ಬೀಳುತ್ತಿವೆ. ಮೇ 26, 2014ರಂದು ನರೇಂದ್ರ ಮೋದಿ ಪ್ರಧಾನಿಯಾಗಿ ಅಧಿಕಾರ ಸ್ವೀಕರಿಸಿದಾಗ ದೇಶದಲ್ಲಿ ಬಿಜೆಪಿ ಅಧಿಕಾರದಲ್ಲಿದ್ದದ್ದು ಕೇವಲ ಏಳು ರಾಜ್ಯಗಳಲ್ಲಿ . ಗುಜರಾತ್‌, ರಾಜಸ್ಥಾನ, ಮಧ್ಯಪ್ರದೇಶ, ಪಂಜಾಬ್‌, ಛತ್ತೀಸ್‌ಗಢ, ಗೋವಾ ಮತ್ತು ನಾಗಾಲ್ಯಾಂಡ್‌. ನಾಲ್ಕನೇ ವರ್ಷಾಚರಣೆಯ ಹೊತ್ತಿಗೆ 20 ರಾಜ್ಯಗಳು ಬಿಜೆಪಿ ಅಥವಾ ಎನ್‌ಡಿಎ ಕೂಟದ ಆಳ್ವಿಕೆಗೆ ಒಳಪಟ್ಟಿವೆ. ಅದರಲ್ಲೂ 14 ರಾಜ್ಯಗಳಲ್ಲಿ ಬಿಜೆಪಿ ಸ್ವತಂತ್ರವಾಗಿ ಅಧಿಕಾರದಲ್ಲಿದೆ.

ಬಿಜೆಪಿ-ಮಿತ್ರರ ತೆಕ್ಕೆಗೆ ಬೀಳದೆ ಉಳಿದುಕೊಂಡಿರುವುದು ಕೇವಲ 11 ಅಸೆಂಬ್ಲಿಗಳು ಮಾತ್ರ! ಬಿಜೆಪಿಯ ಈ ದಾಂಗುಡಿಯಲ್ಲಿ ಸಂಪೂರ್ಣ ನೆಲಕಚ್ಚಿದ್ದು ಕಾಂಗ್ರೆಸ್‌. 2014ರ ಆರಂಭದಲ್ಲಿ ಕಾಂಗ್ರೆಸ್‌ 13 ರಾಜ್ಯಗಳನ್ನು ಆಳುತ್ತಿತ್ತು. ಕಾಂಗ್ರೆಸ್‌ ತನ್ನ ಆಳ್ವಿಕೆಯ ವೈಭವೋಪೇತ ಕಾಲದಲ್ಲೂ 18ಕ್ಕಿಂತ ಹೆಚ್ಚು ರಾಜ್ಯಗಳಲ್ಲಿ ಆಳ್ವಿಕೆ ಮಾಡುತ್ತಿರಲಿಲ್ಲ. ಅತಿ ಕಡಿಮೆ ಪ್ರಭಾವವಿದ್ದ ಈಶಾನ್ಯದಲ್ಲೂ ಬಿಜೆಪಿ ಮಿಜೋರಾಂ ಬಿಟ್ಟು ಉಳಿದೆಲ್ಲ ರಾಜ್ಯಗಳನ್ನು ವಶಪಡಿಸಿಕೊಂಡಿದೆ. ತ್ರಿಪುರಾದಂಥ ಕಮ್ಯುನಿಸ್ಟ್‌ ಕೋಟೆಯಲ್ಲೇ ಕೇಸರಿ ಧ್ವಜ ಹಾರಾಡಿದ್ದು ಎಲ್ಲರಿಗೂ ಅಚ್ಚರಿ.

ಗೆಲುವಿನ ನಡುವೆ ಸೋಲು

ನಿರಂತರ ಗೆಲುವಿನ ನಡುವೆಯೂ ಕೆಲವೊಂದು ಹಿನ್ನಡೆಗಳೂ ಬಿಜೆಪಿಯನ್ನು ಕಾಡಿವೆ. ಪಂಜಾಬ್‌ನಲ್ಲಿ ಅಕಾಲಿದಳ-ಬಿಜೆಪಿ ಮಿತ್ರಕೂಟದ ಸೋಲು, ದಿಲ್ಲಿಯಲ್ಲಿ ಆಮ್‌ ಆದ್ಮಿಯನ್ನು ಮೀರಿಸಲಾಗದ ಹಿನ್ನಡೆ, ಕರ್ನಾಟಕದಲ್ಲಿ ಅತಿ ದೊಡ್ಡ ಪಕ್ಷವಾದರೂ ಅಧಿಕಾರ ಸ್ಥಾಪಿಸಲಾಗದ ಅಸಹಾಯಕತೆ ಬಿಜೆಪಿಯನ್ನು ಕಾಡಿದೆ. ಆಂಧ್ರದಲ್ಲಿ ತೆಲುಗು ದೇಶಂ ಮಿತೃತ್ವ ಉಳಿಸಿಕೊಳ್ಳಲಾಗಲಿಲ್ಲ.

ಈ ವರ್ಷದಲ್ಲೇ 4 ಸವಾಲು

2018ರ ಕೊನೆಯೊಳಗೆ ಮಧ್ಯಪ್ರದೇಶ, ಛತ್ತೀಸ್‌ಗಢ, ಮಿಜೋರಾಂ ಮತ್ತು ರಾಜಸ್ಥಾನ ಅಸೆಂಬ್ಲಿಗಳಿಗೆ ಚುನಾವಣೆ ನಡೆಯಲಿದ್ದು ಬಿಜೆಪಿ ದೊಡ್ಡ ಸವಾಲು ಎದುರಾಗಿದೆ.

7 ಸಂಸತ್‌ ಕ್ಷೇತ್ರ ಮೈನಸ್‌

4 ವರ್ಷದಲ್ಲಿ ಲೋಕಸಭೆಗೆ ನಡೆದ ಉಪಚುನಾವಣೆಗಳಲ್ಲಿ ಬಿಜೆಪಿ ಏಳು ಸ್ಥಾನಗಳನ್ನು ಕಳೆದುಕೊಂಡಿದೆ. 282 ಸ್ಥಾನಗಳಲ್ಲಿ ಗೆದ್ದಿದ್ದ ಬಿಜೆಪಿ ಬಲ ಈಗ 275ಕ್ಕೆ ಇಳಿದಿದೆ. ಬಿಜೆಪಿ ಗೆದ್ದ 3 ಕ್ಷೇತ್ರಗಳಲ್ಲಿ ಇನ್ನಷ್ಟೇ ಉಪಚುನಾವಣೆ ನಡೆಯಬೇಕಿದೆ. ಉತ್ತರ ಪ್ರದೇಶದ ಗೋರಖ್‌ಪುರ ಮತ್ತು ಫೂಲ್‌ಪುರ, ರಾಜಸ್ಥಾನ ಆಲ್ವಾರ್‌ ಮತ್ತು ಅಜ್ಮೇರ್‌ ಕ್ಷೇತ್ರಗಳ ಸೋಲು ಬಿಜೆಪಿಗೆ ದೊಡ್ಡ ಹಿನ್ನಡೆ. ಉಳಿದಂತೆ ಬಿಹಾರದ ಅರಾರಿಯಾ, ಮಧ್ಯಪ್ರದೇಶದ ರಟ್ಲಂ, ಪಂಜಾಬ್‌ನ ಗುರುದಾಸ್‌ಪುರ ಕ್ಷೇತ್ರವನ್ನೂ ಅದು ಕಳೆದುಕೊಂಡಿದೆ. ಎಸ್‌ಪಿ-ಬಿಎಸ್‌ಪಿ ಮೈತ್ರಿಯಿಂದ ಉತ್ತರ ಪ್ರದೇಶದ 2 ಕ್ಷೇತ್ರಗಳನ್ನು ಕಳೆದುಕೊಂಡಿದ್ದ ಬಿಜೆಪಿ ಈಗ ಕೈರಾನಾದಲ್ಲೂ ಸವಾಲು ಎದುರಿಸುತ್ತಿದೆ.

- 2014ರಲ್ಲಿ ಬಿಜೆಪಿ ಕೂಟದ ಆಡಳಿತದ ರಾಜ್ಯಗಳು

ಗುಜರಾತ್‌, ರಾಜಸ್ಥಾನ್‌, ಮಧ್ಯಪ್ರದೇಶ, ಪಂಜಾಬ್‌, ಛತ್ತೀಸ್‌ಗಢ, ಗೋವಾ, ನಾಗಾಲ್ಯಾಂಡ್‌

- ಈಗ ಬಿಜೆಪಿ ಮತ್ತು ಮಿತ್ರರ ಆಡಳಿತ ಇರುವ ರಾಜ್ಯಗಳು-

ಗುಜರಾತ್‌, ರಾಜಸ್ಥಾನ, ಮಧ್ಯಪ್ರದೇಶ, ಛತ್ತೀಸ್‌ಗಢ, ಗೋವಾ, ನಾಗಾಲ್ಯಾಂಡ್‌, ಮಹಾರಾಷ್ಟ್ರ, ಹರಿಯಾಣ, ಜಮ್ಮು ಮತ್ತು ಕಾಶ್ಮೀರ, ಜಾರ್ಖಂಡ್‌, ಸಿಕ್ಕಿಂ,

ಅಸ್ಸಾಂ, ಉತ್ತರ ಪ್ರದೇಶ, ಮಣಿಪುರ, ಉತ್ತರಾಖಂಡ, ಹಿಮಾಚಲ ಪ್ರದೇಶ, ಬಿಹಾರ, ಅರುಣಾಚಲ ಪ್ರದೇಶ, ತ್ರಿಪುರಾ, ಮೇಘಾಲಯ

ಕಾಂಗ್ರೆಸ್‌-ಮಿತ್ರಕೂಟ ಆಡಳಿತ-

ಪಂಜಾಬ್‌, ಕರ್ನಾಟಕ, ಮಿಝೋರಾಂ, ಪುದುಚೆರಿ

ಏಳು ರಾಜ್ಯಗಳಲ್ಲಿ ಇತರರು

ತಮಿಳುನಾಡು: ಎಐಎಡಿಎಂಕೆ, ಪಶ್ಚಿಮ ಬಂಗಾಳ: ಟಿಎಂಸಿ, ಒಡಿಶಾ: ಬಿಜೆಡಿ, ತೆಲಂಗಾಣ: ಟಿಆರ್‌ಎಸ್‌, 5. ಆಂಧ್ರ ಪ್ರದೇಶ: ಟಿಡಿಪಿ, ಕೇರಳ: ಎಡಪಕ್ಷ, ದಿಲ್ಲಿ: ಆಮ್‌ ಆದ್ಮಿ.