ಗುರುಗಳ ಬಗ್ಗೆ ಜಯಂತ ಕಾಯ್ಕಿಣಿ ಬರೆದ ಕವಿತೆ

'ಆಚಾರ್ಯ ದೇವೋಭವ' ಎಂದು ಶಿಕ್ಷಕರನ್ನು ನಮಿಸಿದ ಪರಂಪರೆ ನಮ್ಮದು. ಒಂದು ಅಕ್ಷರವನ್ನು ಕಲಿಸಿದವನೂ ಗುರುಸಮಾನ ಎಂದು ನಂಬಿದವರು ನಾವು. ನಮ್ಮ ಜೀವನ, ಗುಣನಡತೆ, ಮೌಲ್ಯಗಳು, ಚಾರಿತ್ರ್ಯ ಎಲ್ಲವೂ ರೂಪುಗೊಳ್ಳುವುದು ಶಿಕ್ಷಕರು ಹಾಕಿಕೊಡುವ ಅಸ್ತಿವಾರದ ಮೇಲೆ. ಯಶಸ್ಸಿನ ಹಾದಿ ತುಳಿದ ಎಲ್ಲರ ಹಿಂದೆಯೂ ಒಬ್ಬರಲ್ಲ ಒಬ್ಬರು ಶಿಕ್ಷಕರ ಪ್ರಭಾವ ಇದ್ದೇ ಇರುತ್ತದೆ. ಕತೆಗಾರ, ಕವಿ ಜಯಂತ ಕಾಯ್ಕಿಣಿ ಅವರು ಬರೆದ ಗುರುಗಳ ಬಗೆಗಿನ ಕವಿತೆ ಇಲ್ಲಿದೆ.

ಪ್ರತ್ಯಕ್ಷ ಪರೋಕ್ಷ ಗುರುಗಳಿಗೆ ವಂದನೆ

ಗುರುವೆ ನಿಮಗೆ ಶರಣು ನಾವು
ಭಾವಪೂರ್ಣ ವಂದನೆ
ಕರುಣೆಯಿಂದ ಸಹನೆಯಿಂದ
ಸಲಹುತೀರಿ ನಮ್ಮನೆ

ಬೆಳಕು ನಡೆದು ಬಂದ ಹಾಗೆ
ನೀವು ನಮ್ಮ ಶಾಲೆಗೆ
ನೀವೆ ತಾಯಿ ನೀವೆ ತಂದೆ
ನಂಬಿದವರ ಪಾಲಿಗೆ

ತಿಳಿವಿನಿಂದ ತೆರೆದು ನೀವು
ನಮ್ಮ ಮನದ ಬಾಗಿಲು

ಸಿಕ್ಕಿತೀಗ ನಮಗೆ ಬಾನು
ರೆಕ್ಕೆ ಬಿಚ್ಚಿ ಹಾರಲು
ಕಲಿತ ಹಾಗೆ ವಿನಯಶೀಲ
-ರಾದರೇನೆ ಧನ್ಯತೆ
ನೀವು ಕಟ್ಟಿಕೊಟ್ಟ ಬುತ್ತಿ
ಸರಳ ಮಾನವೀಯತೆ

ಮಮತೆ ಮತ್ತು ಸಮತೆಗಿಂತ
ಉಂಟೆ ಬೇರೆ ಪ್ರಾರ್ಥನೆ
ಮಾನವಂತರಾಗಿ ನಡೆದು
ನೆನೆಯುತೇವೆ ನಿಮ್ಮನೆ