ವಿಶ್ವ ಗ್ರಾಹಕ ಹಕ್ಕುಗಳ ದಿನ: ಮಾತೃ ಭಾಷೆಯಲ್ಲೇ ಗ್ರಾಹಕಸೇವೆಗೆ ಒತ್ತಾಯಿಸಿ ಟ್ವಿಟ್ಟರ್ ಅಭಿಯಾನ!

ಬೆಂಗಳೂರು: ಮಾರ್ಚ್‌ 15ರಂದು ಭಾನುವಾರ ವಿಶ್ವ ಗ್ರಾಹಕ ಹಕ್ಕುಗಳ ದಿನವಾಗಿರುವ ಹಿನ್ನೆಲೆಯಲ್ಲಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಜಾಗೃತಿ ಅಭಿಯಾನ ಆರಂಭವಾಗಿದೆ.

ಟ್ವಿಟ್ಟರ್‌ನಲ್ಲಿ '#ಸರ್ವ್‌ ಇನ್‌ ಮೈ ಲಾಂಗ್ವೇಜ್‌' ( ServeInMyLanguage) ಮತ್ತು '#ಕನ್ನಡದಲ್ಲಿ ಗ್ರಾಹಕಸೇವೆ' ಹ್ಯಾಷ್ ಟ್ಯಾಗ್ ಗಳ ಮೂಲಕ ಗ್ರಾಹಕನ ಭಾಷೆಯಲ್ಲೇ ಗ್ರಾಹಕ ಸೇವೆ ಒದಗಿಸುವಂತೆ ಸರಕಾರಕ್ಕೆ ಮತ್ತು ಸೇವಾದಾರ ಕಂಪನಿಗಳಿಗೆ ಬೇಡಿಕೆ ಇಟ್ಟು ಆಂದೋಲನ ಆರಂಭವಾಗಿದೆ.



ಮಾರ್ಚ್ 15 ನ್ನು ವಿಶ್ವ ಗ್ರಾಹಕ ಹಕ್ಕುಗಳ ದಿನವನ್ನಾಗಿ ವಿಶ್ವಾದ್ಯಂತ ಆಚರಿಸಲಾಗುತ್ತದೆ. ಎಲ್ಲ ದೇಶಗಳಲ್ಲೂ ಗ್ರಾಹಕನಿಗೆ ಆಗುವ ಅನ್ಯಾಯವನ್ನು ತಡೆಯುವ ನಿಟ್ಟಿನಲ್ಲಿ ಗ್ರಾಹಕ ಹಕ್ಕುಗಳನ್ನು ರೂಪಿಸಲಾಗಿದೆ. ಭಾರತದಲ್ಲಿ ಗ್ರಾಹಕ ಹಕ್ಕುಗಳಿವೆ ಆದರೆ, ಗ್ರಾಹಕ ಕೊಳ್ಳುವ ವಸ್ತುವಿನ ಗುಣಮಟ್ಟದ ವಿಚಾರವಾಗಿ ಮಾತ್ರ ಒತ್ತು ನೀಡಲಾಗಿದೆ.

ಕೊರೊನಾ ವೈರಸ್‌: ಕಲಬುರಗಿ ವ್ಯಕ್ತಿ ಅಂತ್ಯಕ್ರಿಯೆಯಲ್ಲಿ ಇದ್ದ 71 ಜನರ ಮೇಲೆ ತೀವ್ರ ನಿಗಾ!

ಗ್ರಾಹಕ ಹಕ್ಕುಗಳಲ್ಲಿ'ಮಾಹಿತಿಯ ಹಕ್ಕು'(Right to Information) ಪ್ರಧಾನವಾದುದು. ಈ ಹಕ್ಕಿನ ಪ್ರಕಾರ, ಗ್ರಾಹಕ ಕೊಳ್ಳುವ ವಸ್ತುವಿನ ಬಗ್ಗೆ ಸಂಪೂರ್ಣ ಮಾಹಿತಿ ಗ್ರಾಹಕನಿಗೆ ಸಿಗಬೇಕು. ಗ್ರಾಹಕನ ಮಾಹಿತಿ ಹಕ್ಕಿನ ರಕ್ಷಣೆಗಾಗಿ ಕೆಲವೊಂದಿಷ್ಟು ನಿಯಮಗಳಿದ್ದರೂ, ಭಾಷಾ ವೈವಿಧ್ಯತೆಯಿಂದ ಕೂಡಿದ ಭಾರತ ಒಕ್ಕೂಟಕ್ಕೆ ಒಪ್ಪುವಂತಹ ಗಟ್ಟಿಯಾಗ ನಿಯಮವಿಲ್ಲ. ಕೆಲವೆಡೆ ನಿಯಮವಿದ್ದರೂ, ಹಿಂದಿ/ಇಂಗ್ಲಿಷ್ ತಿಳಿದಿರುವ ಗ್ರಾಹಕರನ್ನು ಮಾತ್ರ ಗಣನೆಗೆ ತೆಗೆದುಕೊಳ್ಳಲಾಗಿದೆ. ಹಿಂದಿ/ಇಂಗ್ಲಿಷ್ ಅರಿಯದ ಕೋಟ್ಯಂತರ ಗ್ರಾಹಕರು ತಮ್ಮ ಗ್ರಾಹಕ ಹಕ್ಕಿನಿಂದ ವಂಚಿತರಾಗುತ್ತಿರುವುದು ಎದ್ದು ಕಾಣಿಸುತ್ತಿದೆ.

ಈ ಹಿನ್ನೆಲೆಯಲ್ಲಿ ಇದೀಗ ಟ್ವಿಟ್ಟರ್‌ನಲ್ಲಿ ಆಂದೋಲನ ಆರಂಭವಾಗಿದೆ. ವಿಶ್ವ ಗ್ರಾಹಕ ಹಕ್ಕುಗಳ ದಿನ ಗ್ರಾಹಕ ಭಾಷಾ ಹಕ್ಕಿನ ಬಗ್ಗೆ ಸರಕಾರಕ್ಕೆ ಮತ್ತು ಕಂಪನಿಗಳಿಗೆ #ServeInMyLanguage ಮತ್ತು ಕನ್ನಡದಲ್ಲಿ '#ಗ್ರಾಹಕಸೇವೆ' ಹ್ಯಾಷ್ ಟ್ಯಾಗ್ ಗಳ ಮೂಲಕ ಗ್ರಾಹಕನ ಮಾತೃಭಾಷೆಯಲ್ಲಿಯೇ ಸರಕು ಮತ್ತು ಸೇವೆಗಳ ಕುರಿತು ಮಾಹಿತಿ ಹಾಗೂ ಗ್ರಾಹಕ ಸೇವೆ ನೀಡುವಂತೆ ಒತ್ತಾಯಿಸಲಾಗುತ್ತಿದೆ.

ಈ ಬಾರಿ 'ಸುಸ್ಥಿರ ಗ್ರಾಹಕ' ಎಂಬ ಧ್ಯೇಯವಾಕ್ಯದೊಂದಿಗೆ ವಿಶ್ವ ಗ್ರಾಹಕ ಹಕ್ಕುಗಳ ದಿನ ಆಚರಿಸಲಾಗುತ್ತಿದೆ.