-ವಿಶ್ವ ಭೂ ದಿನ-
ಶತಮಾನಗಳಿಂದ ನಾವು ನಿಷ್ಕರುಣೆಯಿಂದ ಭೂಮಿಯ ಸಂಪನ್ಮೂಲವನ್ನು ಬಳಸುತ್ತಾ(ಹಾಳುಗೆಡವುತ್ತಾ) ಬಂದಿದ್ದೇವೆ. ಮನುಷ್ಯನ ಅಸಡ್ಡೆಯಿಂದಾಗಿ ಇಂದು ಭೂಮಿ ಅನೇಕ ಸಮಸ್ಯೆಗಳನ್ನು ಎದುರಿಸುತ್ತಿದೆ. (ಓಝೋನ್‌ ಪದರಕ್ಕೆ ಹಾನಿ, ನದಿ, ಕೆರೆಗಳ ಒತ್ತುವರಿ, ಅಧಿಕವಾಗುತ್ತಿರುವ ವಾಹನಗಳು ಮತ್ತು ಔದ್ಯಮೀಕರಣದಿಂದ ಜಾಗತಿಕ ತಾಪಮಾನದ ಹೆಚ್ಚಳ ಇತ್ಯಾದಿ.) ತಾನೇ ಸೃಷ್ಟಿಸಿದ ಸಮಸ್ಯೆಯ ಜಾಲದಲ್ಲಿ ಈ ಮನುಷ್ಯ ಈಗ ಸಿಲುಕಿಬಿದ್ದಿದ್ದಾನೆ. ಅಷ್ಟೇ ಅಲ್ಲದೆ, ಸಹಜೀವಿಗಳನ್ನೂ ಇದರಲ್ಲಿ ಸಿಲುಕಿಸಿದ್ದಾನೆ.
ವಿಕೃತಿಗೊಳಿಸುವನವನುಮ… ಆಕೆಯಂಗಗಳ
ಭೂಕೃಷಿಕ ರಸತಂತ್ರಿ ಶಿಲ್ಪಿವಾಹನಯಂತ್ರಿ
ವ್ಯಾಕೃತಿಸರೇನವಳ? - ಮಂಕುತಿಮ್ಮ ''
ಎಂಬ ಗುಂಡಪ್ಪನವರ ಮುಕ್ತಕವೂ ಇದೇ ಮಾತನ್ನು ಪ್ರತಿಧ್ವನಿಸುತ್ತಿದೆ. ಮನುಷ್ಯ ಪ್ರಕೃತಿಗೆ ಬಗೆಯುತ್ತಿರುವ ಹಾನಿಯನ್ನು ಮನಗಂಡೇ 1970 ಏಪ್ರಿಲ್‌ನಲ್ಲಿ ಅಮೆರಿಕದಲ್ಲಿ ಮೊದಲು ಅಸ್ತಿತ್ವಕ್ಕೆ ಬಂತು ''ವಿಶ್ವ ಭೂಮಿ ದಿನ''. ಅಮೆರಿಕದಿಂದ ಆರಂಭವಾಗಿ ಇಂದು ಸುಮಾರು 193 ರಾಷ್ಟ್ರಗಳು ಈ ದಿನವನ್ನಾಚರಿಸುತ್ತವೆ. ಪ್ರತಿ ವರ್ಷವೂ ಒಂದೊಂದು ಧ್ಯೇಯದೊಂದಿಗೆ ಈ ದಿನವನ್ನು ಆಚರಿಸಲಾಗುತ್ತದೆ. ಒಟ್ಟಾರೆಯಾಗಿ ಭೂಮಿ ಸ್ವಸ್ಥವಾಗಿದ್ದರಷ್ಟೇ ನಾವು ಸ್ವಸ್ಥರಾಗಿರುತ್ತೇವೆ ಎಂಬ ಸಂದೇಶ ಇದರ ಹಿಂದೆ. Trees for the Earth! ಎನ್ನುವುದು ಈ ಬಾರಿಯ ವಿಶ್ವ ಭೂಮಿ ದಿನದ ಧ್ಯೇಯ.
ಈಗಂತೂ ಪ್ರಪಂಚದಲ್ಲಿ ಅರಣ್ಯ ನಾಶ, ಭೂ ಅಭಿವೃದ್ಧಿಯಿಂದಾಗಿ ಪ್ರತಿ ವರ್ಷ 15000000000 ಮರಗಳು ನಾಶವಾಗುತ್ತಿವೆ! ಅಲ್ಪ ಮಳೆ, ಹಮಾವಾನ ವೈಪರೀತ್ಯಗಳು, ಅರಣ್ಯ ಜೀವಿಗಳ ಸಂಖ್ಯೆ ಕುಂದುತ್ತಿರುವುದು...ಇವೆಲ್ಲ ಅರಣ್ಯ ನಾಶದ ಪ್ರತಿಫಲವೇ. ನಾವೇ ಸೃಷ್ಟಿಸಿರುವ ಸಮಸ್ಯೆಯನ್ನು ನಾವೇ ಬಗೆಹರಿಸಬಲ್ಲೆವು ಎನ್ನುವ ಜಾಗೃತಿಯನ್ನು ಮೂಡಿಸುವುದೇ ವಿಶ್ವ ಭೂಮಿ ದಿನದ ಉದ್ದೇಶ. ಆದರೆ ಸಾಮಾನ್ಯ ಜನರಿಂದ ಏನು ಮಾಡುವುದಕ್ಕಾಗುತ್ತದೆ? ಈ ಸಮಸ್ಯೆಗೆ ಅವರೂ ತಮ್ಮ ಮಟ್ಟಿಗೆ ಪರಿಹಾರವಾಗಬಲ್ಲರು. ಪ್ರಪಂಚದಲ್ಲಿನ ಪ್ರತಿಯೊಬ್ಬರೂ ಒಂದೊಂದು ಮರಗಳನ್ನು ಬೆಳೆಸುವ ಮೂಲಕ! 2020ರೊಳಗೆ 7.8 ಶತಕೋಟಿ ಮರಗಳನ್ನು ಬೆಳೆಸುವ ಉದ್ದೇಶ ಈ ದಿನದ ಆಯೋಜಕರಲ್ಲಿದೆ. (ವಿಶ್ವ ಭೂಮಿ ದಿನಕ್ಕೆ ನಿಮ್ಮದೂ ಕೊಡುಗೆಯಿರಲಿ.)
ಮನುಷ್ಯ ಜಾತಿಯ ಮಹತ್ವಾಕಾಂಕ್ಷೆ ಹೇಗೆ ಪ್ರಕೃತಿಯನ್ನು ನಾಶ ಮಾಡುತ್ತಿದೆ ಎನ್ನುವುದರ ಬಗ್ಗೆ ಕನ್ಸರ್ವೇಷನ್‌ ಇಂಟರ್ನಾಷನಲ್‌ ಎರಡು ವರ್ಷದ ಹಿಂದೆ ಜಗತ್ತಿನ ಅಳಿವಿನಂಚಿನಲ್ಲಿರುವ ಅರಣ್ಯಗಳ ಕುರಿತು ವರದಿಯೊಂದನ್ನು ಪ್ರಕಟಿಸಿತ್ತು. ಒಂದು ಸಮಯದಲ್ಲಿ ಜಗತ್ತಿನ ಜೀವ ವೈವಿಧ್ಯ ಆಗರಗಳಾಗಿದ್ದ, ಆದರೆ ಈಗ ಅಳಿವಿನಂಚಿನತ್ತ ಸಾಗುತ್ತಿರುವ 10 ಪ್ರಮುಖ ಅರಣ್ಯಗಳ ಪಟ್ಟಿ ಇಲ್ಲಿದೆ.
10) ಆಫ್ರೋಮೊಂಟಾನ್‌- ಆಫ್ರಿಕಾದ ಪೂರ್ವ ಅಂಚಿನಲ್ಲಿರುವ ಕಾಡು
9)ಮಡಗಾಸ್ಕರ್‌ ಮತ್ತು ಇಂಡಿಯನ್‌ ಓಶಿಯನ್‌ ಐಲ್ಯಾಂಡ್ಸ್‌
8) ಪೂರ್ವ ಆಫ್ರಿಕಾದ ಕರಾವಳಿ ಅರಣ್ಯ
7)ಕ್ಯಾಲಿಫೋರ್ನಿಯಾ ಫ್ಲೋರಿಸ್ಟಿಕ್‌ ಪ್ರಾವಿನ್ಸ್‌
6)ನೈಋುತ್ಯ ಚೀನಾದ ಅರಣ್ಯ ಪ್ರದೇಶಗಳು
5)ಅಟ್ಲಾಂಟಿಕ್‌ ಅರಣ್ಯ, ದಕ್ಷಿಣ ಅಮೆರಿಕ
4)ಫಿಲಿಪ್ಪೀನ್ಸ್‌ನ ಅರಣ್ಯ
3)ಸಂದಲ್ಯಾಂಡ್‌, ಏಷ್ಯಾ-ಪೆಸಿಫಿಕ್‌
2)ನ್ಯೂ ಕೆಲಡೋನಿಯಾ, ಏಷ್ಯಾ-ಪೆಸಿಫಿಕ್‌
1)ಭಾರತ-ಬರ್ಮಾದ, ಉಷ್ಣವಲಯ-ಉಪಉಷ್ಣವಲಯದ ಅರಣ್ಯ ಪ್ರದೇಶಗಳು
