ಚಟ್ನಿಯೊಂದಿಗೆ ಹಾವನ್ನೂ ಅರೆದ ಮಹಿಳೆ, ಗೊತ್ತಾಗಿದ್ದು ಹೇಗೆ?

ಹೈದರಾಬಾದ್: ಅದ್ಯಾವ ಧ್ಯಾನದಲ್ಲಿ ಈ ತಾಯಿ ಟೊಮ್ಯಾಟೋ ಚಟ್ನಿ ಅರೆದಳೋ ಗೊತ್ತಿಲ್ಲ. ಹಾವನ್ನೂ ಸೇರಿಸಿ ಚಟ್ನಿ ಮಾಡಿದ್ದಾಳೆ. ಮಕ್ಕಳಿಗೂ ಬಡಿಸಿ, ತಾನೂ ತಿಂದಿದ್ದಾಳೆ. ಆದರೆ, ಚಚ್ನಿಯೊಂದಿಗೆ ಹಾವು ಅರೆದಿದ್ದು ಗೊತ್ತಾಗಿದ್ದು ಹೇಗೆ ಗೊತ್ತಾ?

ತೆಲಂಗಾಣದ ವನಪರ್ತಿಯ ಖಿಲ್ಲ ಘಾನ್ಪುರದ ಗೊಲ್ಲ ರಾಜಮ್ಮ ಟೊಮ್ಯಾಟೋ ಚಟ್ನಿಗೆ ಬೇಕಾಗುವ ಸಾಮಾನುಗಳನ್ನು ರೆಡಿ ಮಾಡಿಕೊಂಡಿದ್ದಾಳೆ. ಚಟ್ನಿಯನ್ನುಅರೆಯೋ ಮುಂಚೆ ಕಲ್ಲನ್ನು ಕ್ಲೀನ್ ಮಾಡಿಕೊಂಡಿಲ್ಲ. ಅಲ್ಲೊಂದು ಹಾವು ಇರುವುದು ಆಕೆ ಗಮನಕ್ಕೇ ಬಂದಿಲ್ಲ. ಟೊಮ್ಯಾಟೋ ಮತ್ತಿತರೆ ಸಾಮಾಗ್ರಿಗಳೊಂದಿಗೆ ಹಾವನ್ನೂ ಚೆನ್ನಾಗಿ ಅರೆದು ಬಿಟ್ಟಿದ್ದಾಳೆ.

ರಾಜಮ್ಮ ಮಗಳು ಕೃಷ್ಣವೇಣಿ ಹಾಗೂ ಕೊನೇ ಮಗನೊಂದಿಗೆ ಚಟ್ನಿ ಸೇರಿಸಿಕೊಂಡು ತಿಂಡಿ ತಿಂದಿದ್ದಾಳೆ. ನಂತರ ಚಟ್ನಿ ಮತ್ತು ತಿಂಡಿಯನ್ನು ಹೊಲದಲ್ಲಿ ಕೆಲಸ ಮಾಡುತ್ತಿದ್ದ ಹಿರಿಯ ಮಗನಿಗೆಂದು ತೆಗೆದುಕೊಂಡು ಹೋಗಿದ್ದಾಳೆ. ಆಗ ಆ ಮಗನಿಗೆ ಚಟ್ನಿಯಲ್ಲಿ ಹಾವಿನ ಬಾಲ ಸಿಕ್ಕಿದ್ದು, ಮತ್ತಷ್ಟು ಪರಿಶೀಲಿಸಿದಾಗ ಹಾವಿನ ತುಣುಕುಗಳೂ ಕಂಡಿವೆ.

ತಕ್ಷಣವೇ ಆಸ್ಪತ್ರೆಗೆ ಧಾವಿಸಿದ ರಾಜಮ್ಮ ಮತ್ತು ಮಕ್ಕಳು ಆರೋಗ್ಯ ತಪಾಸಣೆಗೆ ಒಳಪಟ್ಟಿದ್ದು, ಎಲ್ಲರೂ ಆರೋಗ್ಯವಾಗಿದ್ದಾರೆಂದು ವೈದ್ಯರು ಹೇಳಿದ್ದಾರೆ.