Pulwama Terror Attack: ಹುತಾತ್ಮ ಯೋಧರ ಕುಟುಂಬದ ನೆರವಿಗೆ 5 ಕೋಟಿಗೂ ಅಧಿಕ ಹಣ ಸಂಗ್ರಹಿಸಿದ ಯುವಕ

[This story originally published in Indiatimes on Feb 20, 2019]

Vijaya Karnataka Web

ವಾಷಿಂಗ್ಟನ್: ಪುಲ್ವಾಮಾ ಉಗ್ರರ ದಾಳಿ ಬಳಿಕ ಯೋಧರ ಸಾವಿಗೆ ಇಡೀ ದೇಶವೇ ಕಂಬನಿ ಮಿಡಿದಿದ್ದು, ಪಾಕ್‌ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ರು. ಅಲ್ಲದೆ, ಹುತಾತ್ಮರ ಕುಟುಂಬಕ್ಕೆ ನೆರವು, ಅವರ ಮಕ್ಕಳ ಶಿಕ್ಷಣ ವೆಚ್ಚ ಭರಿಸುವುದಾಗಿ ಖ್ಯಾತನಾಮರು ಅವರ ಬೆಂಬಲಕ್ಕೆ ನಿಂತಿದ್ದಾರೆ. ಸಾಮಾನ್ಯ ಜನರು ಸಹ ತಮ್ಮ ಕೈಲಾದ ಸಹಾಯ ಮಾಡಿದ್ದಾರೆ.

ಇನ್ನು, ಇದು ಭಾರತದಲ್ಲಾದರೆ, ಇಲ್ಲಿಂದ 8 ಸಾವಿರ ಮೈಲುಗಳಷ್ಟು ದೂರದಲ್ಲಿ ಅಂದರೆ ಅಮೆರಿಕದಲ್ಲಿ ವಾಸ ಮಾಡುತ್ತಿರುವ ಗುಜರಾತ್ ಮೂಲದ 26 ವರ್ಷದ ಯುವಕ ವಿವೇಕ್ ಪಟೇಲ್ ಎಂಬಾತ ಘಟನೆಯ ವಿವರ ಕೇಳಿ ಬೇಸರ ವ್ಯಕ್ತಪಡಿಸಿದ್ದ. ಅಲ್ಲದೆ, ಹುತಾತ್ಮ ಯೋಧರ ಕುಟುಂಬಗಳಿಗೆ ನೆರವಾಗಲು ಮುಂದೆ ಬಂದಿದ್ದ. ಆದರೆ, ಭಾರತ್‌ ಕೆ ವೀರ್ ವೆಬ್‌ಸೈಟ್‌ನಲ್ಲಿ ಅಮೆರಿಕದ ಡೆಬಿಟ್ ಕಾರ್ಡ್, ಕ್ರೆಡಿಟ್ ಕಾರ್ಡ್‌ಗಳನ್ನು ಪಡೆಯದ ಕಾರಣ ಅಲ್ಲಿ ಸಹಾಯ ಮಾಡಲು ಸಾಧ್ಯವಾಗಲಿಲ್ಲ ಎಂದು ವಿಜಯ ಕರ್ನಾಟಕ ಸೋದರ ಮಾಧ್ಯಮ ಇಂಡಿಯಾಟೈಮ್ಸ್‌ಗೆ ದೂರವಾಣಿಯಲ್ಲಿ ತಿಳಿಸಿದ್ದಾರೆ.
ಬಳಿಕ ಫೇಸ್‌ಬುಕ್‌ ಮೂಲಕ ಹಣ ಸಂಗ್ರಹಿಸಲು ಪಟೇಲ್ ಮುಂದಾದ. ಆತ 5 ಲಕ್ಷ ಅಮೆರಿಕನ್ ಡಾಲರ್‌ನಷ್ಟು ಹಣ ಸಂಗ್ರಹ ಮಾಡುವ ಗುರಿಯನ್ನೂ ಹೊಂದಿದ್ದ. ವರ್ಜಿನಿಯಾದಲ್ಲಿ ಹಿರಿಯ ಉದ್ಯಮ ವಿಶ್ಲೇಷಕನಾಗಿ ಕೆಲಸ ಮಾಡುತ್ತಿರುವ ಪಟೇಲ್, ಕೇವಲ 12 ಗಂಟೆಗಳಲ್ಲಿ 2 ಲಕ್ಷ 52 ಸಾವಿರ ಅಮೆರಿಕನ್ ಡಾಲರ್ ಹಣ ಸಂಗ್ರಹವನ್ನೂ ಮಾಡಿದ. ಜತೆಗೆ ನಾಲ್ಕೇ ದಿನಗಳಲ್ಲಿ 5 ಲಕ್ಷ ಅಮೆರಿಕನ್ ಡಾಲರ್‌ ಹಣ ಸಂಗ್ರಹ ಗುರಿ ದಾಟಿದ ಆತ 8 ಲಕ್ಷ04 ಸಾವಿರ 747 ಅಮೆರಿಕನ್ ಡಾಲರ್ ಅಂದರೆ ಸುಮಾರು 5.75 ಕೋಟಿ ರೂ. ಹಣ ಸಂಗ್ರಹ ಮಾಡಿದ್ದ. ಅಲ್ಲದೆ, ಆಸ್ಟ್ರೇಲಿಯಾ, ಜರ್ಮನಿ, ಕೆನಡಾದಂತಹ ರಾಷ್ಟ್ರಗಳ ನಾಗರಿಕರು ಸಹ ತಾವು ಸಹಾಯ ಮಾಡುವುದಾಗಿ ಆತನಿಗೆ ಕರೆ ಮಾಡಿರುವ ಬಗ್ಗೆಯೂ ವಿವೇಕ್ ಇಂಡಿಯಾ ಟೈಮ್ಸ್‌ಗೆ ಮಾಹಿತಿ ನೀಡಿದ್ದಾರೆ.

''ಎಷ್ಟೇ ಆದರೂ ನಾವು ಭಾರತೀಯರು. ನೀವು ಎಲ್ಲೇ ವಾಸಮಾಡಿ, ಏನೇ ಮಾಡಿ, ಭಾರತೀಯರಾಗೇ ಇರಿ. ಯೋಧರು ಜನತೆಗೆ ಮಾಡಿರುವ ತ್ಯಾಗದ ಮುಂದೆ ಹಣವನ್ನು ಹೋಲಿಸಲು ಸಾಧ್ಯವಿಲ್ಲ. ಆದರೆ, ಅವರ ಕುಟುಂಬಗಳಿಗೆ ನಾವು ಸಹಾಯ ಮಾಡಬಹುದು'' ಎಂದೂ 26 ವರ್ಷದ ಯುವಕ ಹೇಳಿಕೊಂಡಿದ್ದಾನೆ.


ಇನ್ನು, ಭಾರತ್ ಕೆ ವೀರ್‌ ವೆಬ್‌ಸೈಟ್‌ನಲ್ಲಿ ಅಂತಾರಾಷ್ಟ್ರೀಯ ಡೆಬಿಟ್‌, ಕ್ರೆಡಿಟ್ ಕಾರ್ಡ್‌ಗಳನ್ನು ಪಡೆಯದ ಕಾರಣ ಆ ಕೋಟ್ಯಂತರ ರೂ. ಹಣವನ್ನು ಹೇಗೆ ಸೈನಿಕರ ಕುಟುಂಬಕ್ಕೆ ಸೇರಿಸಬಹುದು ಎಂದು ಆತ ಅಧಿಕಾರಿಗಳನ್ನು ಸಂಪರ್ಕಿಸಿದ್ದು, ಸಿಆರ್‌ಪಿಎಫ್ ಅಧಿಕಾರಿಗಳು ಹಾಗೂ ಇತರೆ ಅಧಿಕಾರಿಗಳು ಆತನೊಂದಿಗೆ ಸಂಪರ್ಕದಲ್ಲಿದ್ದಾರೆ.


ಫೇಸ್‌ಬುಕ್ ಮೂಲಕ ಹಣ ಸಂಗ್ರಹಿಸಲು ಅಮೆರಿಕದಲ್ಲಿ ಅವಕಾಶವಿದ್ದರೂ, ಭಾರತದಲ್ಲಿ ಇದಕ್ಕೆ ಅವಕಾಶವಿಲ್ಲ.