ಹಿಮಯುಗ: ಇನ್ನೂ ಹಾಗೆಯೇ ಇರುವ 40,000 ವರ್ಷಗಳ ಹಿಂದಿನ ತೋಳದ ತಲೆ ಪತ್ತೆ

ಮಾಸ್ಕೋ: ಹಿಮಯುಗದ ತೋಳವೊಂದರ ತಲೆ ಸೈಬಿರಿಯಾದಲ್ಲಿ ಪತ್ತೆಯಾಗಿದ್ದು, ಹೆಚ್ಚು ಕೊಳೆಯದ ಸ್ಥಿತಿಯಲ್ಲಿ ಹೇಗಿತ್ತೋ ಹಾಗೆಯೇ ಇದೆ. ಸುಮಾರು 40,000 ವರ್ಷಗಳ ಹಿಂದೆ ಸಾವನ್ನಪ್ಪಿದ ತೋಳದ ತಲೆ ಹಾಗೆಯೇ ಸಂರಕ್ಷಿಸಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದು, ಅಚ್ಚರಿ ಮೂಡಿಸಿದೆ.

ಆರ್ಕ್‌ಟಿಕ್‌ ಪ್ರದೇಶದ ಟಿರೆಖ್‌ಟೈಖ್‌ ನದಿಯ ತೀರದಲ್ಲಿ ಸ್ಥಳೀಯ ನಿವಾಸಿಯೊಬ್ಬರಿಗೆ ಕಳೆದ ಬೇಸಿಗೆಯಲ್ಲಿ ಸಿಕ್ಕಿತ್ತು ಎಂದು ಸೈಬಿರಿಯನ್‌ ಟೈಮ್ಸ್‌ ವರದಿ ಮಾಡಿದೆ.

ಯಕುಟಿಯಾದ ಸೈನ್ಸ್‌ ಅಕಾಡೆಮಿಗೆ ತೋಳದ ತಳೆಯನ್ನು ಹಸ್ತಾಂತರಿಸಲಾಗಿತ್ತು. ವಿಜ್ಞಾನಿಗಳು ತಲೆಯ ಮಾದರಿ ಮತ್ತು ಅಳತೆಯ ವಿವರಗಳನ್ನು ವಿದೇಶಗಳ ಸಂಶೋಧನಾಲಯಗಳಿಗೆ ಕಳುಹಿಸಿದ್ದರು. ಇದೀಗ ಜಪಾನ್‌ ಮತ್ತು ಸ್ವೀಡನ್‌ ವಿಜ್ಞಾನಿಗಳ ಸಹಾಯದಿಂದ ತೋಳದ ತಲೆ ಅಂದಾಜು 40,000 ವರ್ಷಗಳ ಹಳೆಯದು ಎಂದು ವಿಜ್ಞಾನ ಅಕಾಡೆಮಿ ತಿಳಿಸಿದೆ.

ಸಾಮಾನ್ಯ ತೋಳದ ತಲೆಗಿಂತ ದೊಡ್ಡ ತಲೆಯನ್ನು ಹಿಮಯುಗದ ತೋಳಗಳು ಹೊಂದಿದ್ದವು ಎಂಬುದು ಪ್ರಾಥಮಿಕವಾಗಿ ತಿಳಿದು ಬಂದಿದೆ. ತೋಳದ ಹಲ್ಲುಗಳು ಹಾಗೆಯೇ ಇವೆ. ಆದರೆ ಕಣ್ಣುಗಳು ಕಣ್ಮರೆಯಾಗಿವೆ. ಹೆಚ್ಚಿನ ಅಧ್ಯಯನ ನಡೆಸಲಾಗುತ್ತಿದೆ.