ಕೆಂಪು ಸಮುದ್ರದಲ್ಲಿ ಜೀವರಾಶಿ ಪತ್ತೆ

ಮಾಸ್ಕೊ: ಅಂತಾರಾಷ್ಟ್ರೀಯ ಜೀವಶಾಸ್ತ್ರಜ್ಞರ ತಂಡವೊಂದು ಕೆಂಪು ಸಮುದ್ರದಲ್ಲಿ ಪ್ರಕಾಶಮಾನ ಬೆಳಕುಚೆಲ್ಲುವ ಹೊಸ ಜೀವರಾಶಿಯನ್ನು ಪತ್ತೆ ಹಚ್ಚಿದೆ.

ಒಂದೇ ರೀತಿಯ ಶರೀರ ರಚನೆ ಹೊಂದಿರುವ ಈ ಜೀವಸಮೂಹ ಹಸಿರು ಬೆಳಕಿನಿಂದ ಕಂಗೊಳಿಸುತ್ತಿವೆ ಎಂದು ಸಂಶೋಧಕರು ತಿಳಿಸಿದ್ದಾರೆ.

ಕೆಂಪು ಸಮುದ್ರದ ದಕ್ಷಿಣ ಭಾಗದ ಹವಳ ಬಂಡೆಗಳಲ್ಲಿನ ಜೀವ ವೈವಿಧ್ಯವನ್ನು ಸಂಶೋಧಿಸುತ್ತಿದ್ದ ಸಂಶೋಧಕರ ತಂಡಕ್ಕೆ ಹಸಿರು ಬೆಳಕಿನಿಂದ ಕಂಗೊಳಿಸುತ್ತಿದ್ದ ಬೆಳಕಿನ ಬಡಾವಣೆ ಗೋಚರವಾಯಿತು. ಸಮೀಪ ತೆರಳಿ ಪರಿಶೀಲಿಸಿದಾಗ ಹೊಸ ಬಗೆಯ ಜೀವ ಪ್ರಭೇದವೊಂದು ಪತ್ತೆಯಾಯಿತು.

ಇವುಗಳ ಹತ್ತಿರದ ಸಂಬಂಧದ ಜೀವಿಗಳು ತಿಳಿ ನೀರಿನಲ್ಲಿ ಏಕಾಂಗಿಯಾಗಿ ವಾಸಿಸಿದರೆ ನೂತನವಾಗಿ ಕಂಡುಹಿಡಿಯಲಾಗಿರುವ ಕೆಂಪು ಸಮುದ್ರದ ಜೀವಿಗಳು ವಸಾಹತನ್ನು ನಿರ್ಮಿಸಿ ಹಸಿರು ಬಣ್ಣದಿಂದ ಕಂಗೊಳಿಸುತ್ತವೆ ಎಂದು ಸಂಶೋಧಕರು ತಿಳಿಸಿದ್ದಾರೆ.

’ಪ್ಲಸ್ ಒನ್’ ಜರ್ನಲ್ ನಲ್ಲಿ ಇದಕ್ಕೆ ಸಂಬಂಧಿಸಿದ ವರದಿ ಪ್ರಕಟಿಸಲಾಗಿದೆ.