ಗರ್ಲ್‌ಫ್ರೆಂಡ್‌ ಲವ್‌ ಬೈಟ್‌: ಹೋಯ್ತು ಹುಡುಗನ ಪ್ರಾಣ

ಒಂದು ಗಂಡು-ಹೆಣ್ಣು ಏಕಾಂತದಲ್ಲಿದ್ದಾಗ ಒಂದು ತೆರನಾದ ಪ್ರೀತಿ ಹಾಗೂ ಸುಖವನ್ನು ಅನುಭವಿಸೋದು ನಿಜ. ಆದರೆ ಅದೇ ಪ್ರೀತಿ ಅತಿರೇಕಕ್ಕೆ ಹೋದಾಗ ಏನೆಲ್ಲ ಅಪಾಯ ಸಂಭವಿಸುತ್ತದೆ ಅನ್ನೋದು ನೀವು ಊಹಿಸಲೂ ಸಾಧ್ಯವಿಲ್ಲ.

17ರ ಪೋರನೊಬ್ಬ ತನ್ನ ಗರ್ಲ್‌ಫ್ರೆಂಡ್‌ ನೀಡಿದ ಲವ್‌ ಬೈಟ್‌ನಿಂದಾಗಿ ಮೃತಪಟ್ಟ ವಿಚಿತ್ರ ಘಟನೆಯೊಂದು ನಡೆದಿದೆ. ಮೆಕ್ಸಿಕೋ ಮೂಲದ ಜೂಲಿಯೊ ಮೆಸಿಯಸ್‌ ಗೊನ್ಜಾಲೆಜ್ ಎಂಬ ಹುಡುಗ ಗರ್ಲ್‌ಫ್ರೆಂಡ್‌ ಕಡಿತದಿಂದ ಮೃತಪಟ್ಟ ದುರ್ದೈವಿ. ಸಂಜೆಯ ಸಮಯದಲ್ಲಿ ಗರ್ಲ್‌ಫ್ರೆಂಡ್‌ ಜತೆ ಏಕಾಂತದಲ್ಲಿ ಕಾಲ ಕಳೆದಿದ್ದ ಪೋರ, ರಾತ್ರಿ ಕುಟುಂಬ ಸದಸ್ಯರ ಜತೆ ಊಟ ಮಾಡುವ ಸಂದರ್ಭದಲ್ಲಿ ಪ್ರಾಣವನ್ನು ಕಳೆದುಕೊಂಡ.

ಗರ್ಲ್‌ಫ್ರೆಂಡ್‌ ಕಡಿತದಿಂದ ಉಂಟಾದ ಗಾಯ, ರಕ್ತ ಹೆಪ್ಪುಗಟ್ಟುವಿಕೆಗೆ ಕಾರಣವಾಗಿ ಜೀವಕ್ಕೆ ಮಾರಕವಾಗಿ ಪರಿಣಮಿಸಿತು. ಊಟದ ಸಂದರ್ಭದಲ್ಲಿ ಒಂದು ತೆರನಾದ ನೋವಿನ ಅನುಭವ ಜೂಲಿಯೊಗೆ ಆಯಿತು ಎಂದು ತಿಳಿದು ಬಂದಿದೆ.

ಇಂಥ ಮತ್ತಷ್ಟು ಘಟನೆಗಳು : 2011ರಲ್ಲಿ ನ್ಯೂಜಿಲೆಂಡ್‌ ಮೂಲದ 44 ವಯಸ್ಸಿನ ಮಹಿಳೆಯೊಬ್ಬಳು ಲವ್‌ ಬೈಟ್‌ನಿಂದಾಗಿ ಮೃತಪಟ್ಟ ಘಟನೆ ಮೊದಲು ಬೆಳಕಿಗೆ ಬಂದಿತ್ತು. ಮನೆಯಲ್ಲಿ ಟಿವಿ ವೀಕ್ಷಿಸುತ್ತಿದ್ದ ಸಂದರ್ಭದಲ್ಲಿ ಆಕೆಯ ಎಡಗೈಯಲ್ಲಿ ಒಂದು ತೆರನಾದ ನೋವಿನ ಸಂವೇದನೆ ಉಂಟಾಗಿ ಜೀವಕ್ಕೇ ಕುತ್ತು ತಂದಿತು. ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಿದಾಗ, ಅದಕ್ಕೆ ಕಾರಣವಾಗಿದ್ದು ಕುತ್ತಿಗೆಯ ಮೇಲಿದ್ದ ಲವ್‌ ಬೈಟ್‌ ಎಂದು ವೈದ್ಯರು ದೃಢಪಡಿಸಿದರು. ಕಡಿತದಿಂದ ರಕ್ತ ಹೆಪ್ಪುಗಟ್ಟಿ ಆಕೆ ತನ್ನ ಪ್ರಾಣವನ್ನೇ ಕಳೆದುಕೊಂಡಿದ್ದಳು.

ಒಂದು ಗಂಡು-ಹೆಣ್ಣಿನ ನಡುವೆ ಪ್ರೀತಿ ಇರಬೇಕು ನಿಜ, ಆದರೆ ಅದೇ ಪ್ರೀತಿ ಹೆಚ್ಚಾದಾಗ ವಿಷವಾಗಿ ಪರಿಣಮಿಸುತ್ತದೆ ಎಂಬುದಕ್ಕೆ ಈ ಘಟನೆಗಳೇ ಸಾಕ್ಷಿ. ನಿಮ್ಮ ಸಂಗಾತಿ ಪ್ರೀತಿಯಿಂದ ಜೋರಾಗಿ ಕಚ್ಚಿದಾಗ ಹಲವಾರು ಅಪಾಯಗಳು ಸಂಭವಿಸಬಹುದು. ಈ ಸಂದರ್ಭದಲ್ಲಿ ರಕ್ತ ಹೆಪ್ಪುಗಟ್ಟಿ ಅದು ಮೆದುಳು ಮತ್ತು ಹೃದಯದ ಮೇಲೆ ಪರಿಣಾಮ ಬೀರುವುದರಿಂದ ಪ್ರಾಣಕ್ಕೆ ಕುತ್ತು. ಹಾಗಾಗಿ ಕೊಂಚ ಎಚ್ಚರಿಕೆಯಿಂದಿರುವುದು ತುಂಬ ಮುಖ್ಯ.