ಬೈಕ್‌ ಮೇಲೆ ಕರು ಕೂರಿಸಿಕೊಂಡು ರೈಡ್‌ ಮಾಡಿ ಪಾಕಿ! ವೀಡಿಯೋ ವೈರಲ್‌

ಇಸ್ಲಮಾಬಾದ್‌: ಬೈಕ್‌ ಮೇಲೆ ನಾಯಿಯನ್ನು ಕೂರಿಸಿಕೊಂಡು ಹೋಗುವುದನ್ನು ನೋಡಿರುತ್ತೀರಿ. ಆದರೆ ಇಲ್ಲೊಬ್ಬ ದನವನ್ನೇ ಬೈಕ್‌ ಮೇಲೆ ಕೂರಿಸಿಕೊಂಡು ಹೋಗುತ್ತಿದ್ದಾನೆ. ಮುದ್ದಾದ ಕರು ಬೈಕ್‌ ರೈಡ್‌ ಇಷ್ಟ ಪಟ್ಟಿರುವಂತೆ ಒಂಚೂರು ಕೊಸರಾಡದೆ ಗಟ್ಟಿಯಾಗಿ ಕುಳಿತಿದ್ದು ನೆಟ್ಟಿಗರಿಂದ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ.

ಪಾಕಿಸ್ತಾನದ ಪ್ರಜೆಯೊಬ್ಬ ಈ ಸಾಹಸವನ್ನು ಮಾಡಿದ್ದು, ಬೈಕ್‌ ಮೇಲೆ ದನವನ್ನು ಕೂರಿಸಿಕೊಂಡು ರೈಡ್‌ ಮಾಡುತ್ತಿರುವ ವೀಡಿಯೋ ತುಣುಕು ಸಾಮಾಜಿಕ ತಾಣಗಳಲ್ಲಿ ವೈರಲ್‌ ಆಗಿದೆ.

ಡೈಲಿ ಮೇಲ್‌ ವರದಿ ಪ್ರಕಾರ ಪಾಕಿಸ್ತಾನದಲ್ಲಿ ಈ ವೀಡಿಯೋವನ್ನು ಶೂಟ್‌ ಮಾಡಲಾಗಿದ್ದು, ಬೈಕ್‌ನಲ್ಲಿ ದನವನ್ನು ಮುಂಬದಿಯಲ್ಲಿ ಕೂರಿಸಿಕೊಂಡು ಸಂಚರಿಸುವ ದೃಶ್ಯವನ್ನು ಸೆರೆ ಹಿಡಿಯಲಾಗಿದೆ. ವೀಡಿಯೋದಲ್ಲಿ ಮತ್ತಿಬ್ಬರು ಬೈಕ್‌ ಸವಾರರು ಮೊಬೈಲ್‌ನಲ್ಲಿ ವೀಡಿಯೋ ಸೆರೆ ಹಿಡಿಯುತ್ತಿರುವ ದೃಶ್ಯವು ಸೆರೆಯಾಗಿದೆ.

ಒಂದು ಬೈಕ್‌ನಲ್ಲಿ ದನವನ್ನು ಮುಂದೆ ಕೂರಿಸಿಕೊಂಡು ರೈಡ್‌ ಮಾಡುತ್ತಿದ್ದಾಗ ಮತ್ತೊಂದು ಬೈಕ್‌ನಲ್ಲಿದ್ದ ಇಬ್ಬರು ಯುವಕರು ಈ ವೀಡಿಯೋ ಚಿತ್ರೀಕರಿಸಿದ್ದಾರೆ.

ವೀಡಿಯೋ ಚಿತ್ರೀಕರಣದ ವೇಳೆ 'ಕಮಾಲ್‌, ಯೇ ಪಾಕಿಸ್ತಾನಿ ಜುಗಾಡ್‌ ಹೇ' ಎಂದು ಹೇಳುತ್ತಿರುವುದು ವೀಡಿಯೋದಲ್ಲಿ ಕೇಳಿಸುತ್ತಿದೆ. ಸಾಮಾಜಿಕ ತಾಣಗಳಲ್ಲಿ ಹರಿದಾಡುತ್ತಿರುವ ವೀಡಿಯೋಗೆ ಅನೇಕ ರೀತಿಯ ಪ್ರತಿಕ್ರಿಯೆಗಳು ವ್ಯಕ್ತವಾಗಿದ್ದು, ಕೆಲವರು ಪ್ರಾಣಿ ಹಿಂಸೆ ಎಂದಿದ್ದಾರೆ.