11 ಮಕ್ಕಳ ತಾಯಿ, 20ನೇ ಬಾರಿ ಗರ್ಭಿಣಿ, ವಯಸ್ಸು 38!

ಮುಂಬಯಿ: ಆಧುನಿಕ ಕಾಲದ ಮಹಿಳೆಯರು ಒಂದು ಮಗುವನ್ನು ಹಡೆದು, ಬೆಳೆಸೋದರಲ್ಲೇ ಹೈರಾಣಾಗಿ ಹೋಗುತ್ತಾರೆ. ಇವಳ ಕೂಡ ಈ ಕಾಲದವಳೇ. ಆದರೆ 11 ಮಕ್ಕಳ ತಾಯಿಯಾಗಿರುವ ಆಕೆ ಮತ್ತೀಗ 20ನೇ ಬಾರಿ ಗರ್ಭ ಧರಿಸಿದ್ದಾಳೆ.

ಹೌದು, 38 ವರ್ಷದ ಮುಂಬಯಿ ನಿವಾಸಿ ಮಹಿಳೆ ಈಗ 12ನೇ ಬಾರಿ ಮಗುವಿಗೆ ಜನ್ಮ ನೀಡುತ್ತಿದ್ದು, ತಾಯಿ ಮತ್ತು ಹೊಟ್ಟೆಯಲ್ಲಿರುವ ಮಗು ಆರೋಗ್ಯವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.

ಖಾನಾ ಬರ್ದೋಸ್ ಗೋಪಾಲ ಸಮುದಾಯದ ಮಹಿಳೆ ಲಂಬಾಬಾಯಿ ಖರಾಟ್ ಈಗ 7 ತಿಂಗಳ ಗರ್ಭಣಿಯಾಗಿದ್ದು, ಆಕೆ ಸರಕಾರಿ ಆಸ್ಪತ್ರೆಗೆ ಬಂದಾಗ ನಮಗೆ ಈ ದಂಗು ಬಡಿಸುವ ವಿಚಾರ ತಿಳಿಯಿತು. ಈ ಹಿಂದೆ ಆಕೆ ಮನೆಯಲ್ಲೇ ಮಕ್ಕಳನ್ನು ಹೆತ್ತಿದ್ದಳು. ಇದೇ ಮೊದಲ ಬಾರಿಗೆ ಆಸ್ಪತ್ರೆಗೆ ಆಗಮಿಸಿದ್ದಾಳೆ ಎಂದು ವೈದ್ಯರು ತಿಳಿಸಿದ್ದಾರೆ.

ಗೋಪಾಲ ಸಮುದಾಯಕ್ಕೆ ಸೇರಿರುವ ಈ ಜನಾಂಗದವರು ಭಿಕ್ಷೆ ಎತ್ತುತ್ತ ಅಥವಾ ಕೂಲಿ ಮಾಡಿಕೊಂಡು ಬದುಕು ಸಾಗಿಸುತ್ತಾರೆ. ಕೆಲವರು ಸಣ್ಣಪುಟ್ಟ ಕೆಲಸ ಮಾಡಿಕೊಂಡು ಅಲೆಮಾರಿಯಾಗಿ ಬದುಕುತ್ತಾರೆ ಎಂದು ಸ್ಥಳೀಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಆಕೆಯನ್ನು ಗ್ರೇಟ್ ಎನ್ನುವುದೋ ಅಥವಾ ಯಂತ್ರದಂತೆ ಮಕ್ಕಳನ್ನು ಹೆರುತ್ತಿರುವ ಆಕೆಯ ಬಗ್ಗೆ ಅನುಕಂಪ ವ್ಯಕ್ತಪಡಿಸುವುದೋ ಎಂದು ಈ ಸುದ್ದಿ ಕೇಳಿದವರು ಗೊಂದಲಕ್ಕೊಳಗಾಗುತ್ತಿದ್ದಾರೆ.