30 ವರ್ಷಗಳ ಬಳಿಕ ಗೊತ್ತಾಯ್ತು, ತನ್ನ ಬಳಿಯಿದ್ದ ಉಂಗುರ 68 ಕೋಟಿ ರೂ. ಮೌಲ್ಯದ ವಜ್ರವೆಂದು!

30 ವರ್ಷಗಳ ಹಿಂದೆ ಪಶ್ಚಿಮ ಲಂಡನ್‌ ಟ್ವಿಂಕನ್‌ಹ್ಯಾಮ್‌ನ ನಿವಾಸಿ ಡೆಬ್ರಾ ಗೊಡ್ಡಾರ್ಡ್‌ ಹರಾಜಿನಲ್ಲಿ ಸುಮಾರು 925 ರೂ. ಕೊಟ್ಟು ಹೊಳೆಯುವ ಕಲ್ಲಿದ್ದ ಗಾಜಿನ ಉಂಗುರವನ್ನು ಖರೀದಿಸಿದ್ದರು.

ಸ್ವಲ್ಪ ವರ್ಷಗಳ ವರೆಗೆ ಉಂಗುರವನ್ನು ಧರಿಸಿದ್ದ ಗೊಡ್ಡಾರ್ಡ್‌ ನಂತರದ ಆಭಾರಣದ ಪೆಟ್ಟಿಯಲ್ಲಿ ತೆಗೆದಿರಿಸಿದ್ದರು. ಸುಮಾರು 15 ವರ್ಷಗಳ ನಂತರ ಆಭರಣದ ಪೆಟ್ಟಿಗೆಯಲ್ಲಿದ್ದ ಗಾಜಿನ ಉಂಗುರವನ್ನು ಮಾರಾಟ ಮಾಡಲು ನಿರ್ಧರಿಸಿದ್ದರು. ಗೊಡ್ಡಾರ್ಡ್‌ ತಾಯಿ ಮೋಸಗಾರರಿಂದ ಸಂಪೂರ್ಣ ಹಣವನ್ನು ಕಳೆದುಕೊಂಡಿದ್ದರು. ಹಣದ ಅವಶ್ಯಕತೆ ತೀರ ಇದ್ದುದರಿಂದ ಗಾಜಿನ ಉಂಗುರವನ್ನು ಆಭರಣದ ಅಂಗಡಿ ತಂದು ತೋರಿಸಿದ್ದರು.

ಆಭರಣದ ಅಂಗಡಿಯಾತ 'ಇದೇನು ಗೊತ್ತೆ? ಇದರ ಬೆಲೆಯೆಷ್ಟು ಗೊತ್ತೆ? ಇದು ವಜ್ರ! ಎಂದಾಗಲೇ ಗೊಡ್ಡಾರ್ಡ್‌ಗೆ ಅರಿವಾಗಿದ್ದು ತನ್ನ ಬಳಿಯಿದ್ದ ಗಾಜಿನ ಉಂಗುರ ಬೆಲೆ ಬಾಳುವ ವಜ್ರವೆಂದು.

ಈ ವಿಚಾರ ತಿಳಿದು ಶಾಕ್‌ ಆಗಿತ್ತು. ಅಚ್ಚರಿಯಾದ ನಾನು ರಾತ್ರಿಯೆಲ್ಲ ವಜ್ರದ ಉಂಗುರವನ್ನು ನೋಡುತ್ತ ಕಳೆದು ಬಿಟ್ಟಿದ್ದೆ ಎಂದು ದಿ ಸನ್‌ಗೆ ಗೊಡ್ಡಾರ್ಡ್‌ ತಿಳಿಸಿದ್ದಾರೆ.


26.27 ಕ್ಯಾರೆಟ್‌ ಇದ್ದ ವಜ್ರ ಹರಾಜಿನಲ್ಲಿ ಸುಮಾರು 68 ಕೋಟಿ ರೂ.ಗಳಿಗೆ ಮಾರಾಟವಾಗಿದೆ. ಗೊಡ್ಡಾರ್ಡ್‌ 20 ಮಕ್ಕಳ ವಿದ್ಯಾಭ್ಯಾಸ, ಚಿಕಿತ್ಸೆ ನೋಡಿಕೊಳ್ಳುತ್ತಿರುವ ಚಾರಿಟಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ದೇವರೇ ನಮಗೆ ತೋರಿಸಿದ ದಾರಿಯಿದು. ಮೋಸಗಾರರಿಂದ ಅಮ್ಮ ಎಲ್ಲ ಹಣವನ್ನು ಕಳೆದುಕೊಂಡಿದ್ದರು. ಆದರೆ ಇದೀಗ ಸಾಕಷ್ಟು ಮೊತ್ತ ಕೈಸೇರಿದೆ. ಹಣವನ್ನು ಮಕ್ಕಳ ಭವಿಷ್ಯಕ್ಕಾಗಿ ಮತ್ತು ಉತ್ತಮ ಕೆಲಸಗಳಿಗಾಗಿ ವಿನಿಯೋಗಿಸುತ್ತೇನೆ ಎಂದು ಗೊಡ್ಡಾರ್ಡ್‌ ತಿಳಿಸಿದ್ದಾರೆ.