ಚೀನಾದಲ್ಲಿ 2,500 ವರ್ಷಗಳ ಪುರಾತನ ಮೊಟ್ಟೆಗಳು ಪತ್ತೆ

ಪುರಾತತ್ವ ಶಾಸ್ತ್ರಜ್ಞರ ತಂಡವೊಂದು ಚೀನಾದಲ್ಲಿ ಸುಮಾರು 2,500 ವರ್ಷಗಳ ಹಿಂದಿನ ಮೊಟ್ಟೆಗಳನ್ನು ಪತ್ತೆ ಹಚ್ಚಿದೆ. ಮಣ್ಣಿನ ಮಡಿಕೆಯೊಳಗೆ ಇರಿಸಿದ ಸುಮಾರು 20 ಮೊಟ್ಟೆಗಳನ್ನು ಪತ್ತೆ ಮಾಡಿದ್ದಾರೆ. ಮೊಟ್ಟೆಗಳ ಮೇಲಿನ ಪದರ ಹಸಿರಿ ಮತ್ತು ನೀಲಿ ಬಣ್ಣಗಳನ್ನು ಹೊಂದಿವೆ.

ತಜ್ಞರ ಪ್ರಕಾರ ಸುಮಾರು 2,500 ವರ್ಷಗಳ ಹಿಂದೆ ಮೊಟ್ಟೆಗಳನ್ನು ಇರಿಸಿದ್ದ ಮಡಿಕೆಯನ್ನು ಮಣ್ಣಿನೊಳಗೆ ಹೂಳಲಾಗಿದೆ. ಪೂರ್ವ ಚೀನಾದ ಶಾಂಗ್‌ಕ್ಸಿಂಗ್‌ ನಗರದಲ್ಲಿ ಈ ಪುರಾತನ ಮೊಟ್ಟೆಗಳಿರುವ ಮಡಿಕೆ ಪತ್ತೆಯಾಗಿದೆ. ಮಡಿಕೆಯಲ್ಲಿ ಕ್ಯಾಲ್ಶಿಯಮ್‌ ಅಂಶ ಅಧಿಕವಾಗಿದೆ.

ಮೊಟ್ಟೆಗಳು ಪತ್ತೆಯಾದ ಸ್ಥಳದ ಮಾಲೀಕ ಸತ್ತ ನಂತರ ಆತ ಮತ್ತೆ ಕಾಡಬಾರದು ಎಂಬ ಉದ್ದೇಶದಿಂದ ಆತ ಬಳಕೆ ಮಾಡುತ್ತಿದ್ದ ಸಾಮಾನುಗಳ ಸಮೇತ ಆತನನ್ನು ಹೂಳಿರಬಹುದು ಎಂದು ಉತ್ಖನನ ನಡೆಸಿದ ತಜ್ಞರು ತಿಳಿಸಿದ್ದಾರೆ. ಹೆಚ್ಚಿನ ಅಧ್ಯಯನಕ್ಕಾಗಿ ಲ್ಯಾಬ್‌ಗೆ ಪುರಾತನ ಮೊಟ್ಟೆಗಳು ಮತ್ತಿತರ ಅಡುಗೆ ಮನೆ ಪರಿಕರಗಳನ್ನು ಕಳುಹಿಸಲಾಗಿದೆ.