ನೀವು ಪ್ರತಿದಿನ ಎನರ್ಜಿ ಡ್ರಿಂಕ್ಸ್ ಕುಡೀತೀರಾ? ನಿಮ್ಮ ನಾಲಿಗೆಯೂ ಹೀಗಾಗಬಹುದು ನೋಡಿ!

ಕ್ಯಾನ್‌ಬೆರಾ: ಪ್ರತಿದಿನ 6 ಕ್ಯಾನ್‌ಗಳಷ್ಟು ಎನರ್ಜಿ ಡ್ರಿಂಕ್ಸ್ ಅನ್ನು ಒಂದು ವರ್ಷಕ್ಕೂ ಹೆಚ್ಚು ಕಾಲ ಕುಡಿಯುತ್ತಿದ್ದ ಆಸ್ಟ್ರೇಲಿಯಾದ ವ್ಯಕ್ತಿಯೊಬ್ಬರ ನಾಲಿಗೆ ತೀವ್ರವಾದ ಹಾನಿಗೊಳಗಾಗಿದೆ. ಅಲ್ಲದೆ, ನಿಧಾನಕ್ಕೆ ನಾಲಿಗೆಯ ಚರ್ಮದ ಸಿಪ್ಪೆ ಸುಲಿದುಹೋಗುತ್ತಿದೆ ಎಂದು ಆ ವ್ಯಕ್ತಿ ಹೇಳಿಕೊಂಡಿದ್ದಾರೆ.

ತನ್ನ ಹಾನಿಗೊಳಗಾಗಿರುವ ನಾಲಿಗೆಯ ಫೋಟೋವನ್ನು ಫೇಸ್‌ಬುಕ್‌ನಲ್ಲಿ ಶೇರ್‌ ಮಾಡಿಕೊಂಡ ಡ್ಯಾನ್‌ ರಾಯಲ್ಸ್ ಎಂಬಾತ ಎನರ್ಜಿ ಡ್ರಿಂಕ್ಸ್ ಸೇವನೆಯಿಂದ ಆಗುವ ಅಪಾಯದ ಬಗ್ಗೆ ಜನರಿಗೆ ಎಚ್ಚರಿಕೆ ನೀಡಿದ್ದಾರೆ.

ರಾಯಲ್ಸ್ ಪ್ರತಿ ದಿನ 5-6 ಕ್ಯಾನ್‌ಗಳಷ್ಟು ಎನರ್ಜಿ ಡ್ರಿಂಕ್ಸ್ ಅನ್ನು ಸೇವಿಸುತ್ತಿದ್ದರಂತೆ. ನಂತರ, ಎನರ್ಜಿ ಡ್ರಿಂಕ್ಸ್‌ನಲ್ಲಿರುವ ಪದಾರ್ಥಗಳಿಂದ ಡ್ಯಾನ್‌ ರಾಯಲ್ಸ್ ಅವರ ನಾಲಿಗೆ ಹಾನಿಗೊಳಗಾಗುತ್ತಿದೆ ಎಂದು ವೈದ್ಯರು ತಿಳಿಸಿದ್ದಾರೆ. ಈ ಹಿನ್ನೆಲೆ ಸದ್ಯ ಅವರು ಎನರ್ಜಿ ಡ್ರಿಂಕ್ಸ್ ಸೇವನೆ ಮಾಡುವುದನ್ನು ಬಿಟ್ಟಿದ್ದಾರೆ ಎಂದು ತಿಳಿದುಬಂದಿದೆ.

ಸಾಮಾನ್ಯ ಎನರ್ಜಿ ಡ್ರಿಂಕ್ಸ್‌ಗಳಲ್ಲಿ ಅಮೈನೋ ಆ್ಯಸಿಡ್‌, ವಿಟಮಿನ್ ಬಿ, ಗಿಡ ಮೂಲಿಕೆ ಪದಾರ್ಥಗಳಿವೆ. ಅಲ್ಲದೆ, ಒಂದು ಕ್ಯಾನ್ ಎನರ್ಜಿ ಡ್ರಿಂಕ್ಸ್‌ನಲ್ಲಿ 58 ಗ್ರಾಮ್‌ನಷ್ಟು ಸಕ್ಕರೆ ಇರುತ್ತದೆ ಎಂದು ತಿಳಿದುಬಂದಿದೆ.

ಫೇಸ್‌ಬುಕ್‌ನಲ್ಲಿ ತನ್ನ ನಾಲಿಗೆಯ ಫೋಟೋ ಹಾಕಿಕೊಂಡಿರುವ ಆಸ್ಟ್ರೇಲಿಯಾದ ವ್ಯಕ್ತಿ, ''ಎನರ್ಜಿ ಡ್ರಿಂಕ್ಸ್‌ಗಳನ್ನು ಕುಡಿಯುತ್ತೀರಾ? ನೀವು ಅದಕ್ಕೆ ವ್ಯಸನಿಯಾಗಿದ್ದೀರಾ? ಹಾಗಾದ್ರೆ ಎರಡನೇ ಫೋಟೋವನ್ನು ನೋಡಿ. ಅದರಿಂದ ನಿಮ್ಮ ನಾಲಿಗೆಯನ್ನು ಹೀಗೆ ಮಾಡುತ್ತದೆ, ಇನ್ನು ನಿಮ್ಮ ದೇಹದ ಅಂಗಾಂಗಗಳಿಗೆ ಯಾವ ರೀತಿಯ ಹಾನಿಯಾಗುತ್ತದೆ ಎಂಬುದನ್ನು ನೀವು ಊಹಿಸಿಕೊಳ್ಳಬಹುದು'' ಎಂದು ಫೇಸ್‌ಬುಕ್‌ ಗ್ರೂಪ್‌ನಲ್ಲಿ ಬರೆದುಕೊಂಡಿದ್ದಾರೆ.

ಜತೆಗೆ, ''ಹೀಗೆ ಆಗುವ ಮುನ್ನ ನಾನು ಪ್ರತಿದಿನ 5-6 ಕ್ಯಾನ್‌ಗಳಷ್ಟು ಎನರ್ಜಿ ಡ್ರಿಂಕ್ಸ್ ಕುಡಿಯುತ್ತಿದ್ದೆ. ಪ್ರತಿದಿನ ಹಲ್ಲುಜ್ಜುತ್ತಿದ್ದೆ. ಬಳಿಕ ವೈದ್ಯರ ಬಳಿ ಹೋದ ಬಳಿಕ ಅದರಲ್ಲಿರುವ ಕೆಮಿಕಲ್‌ಗಳಿಂದ ನಾಲಿಗೆ ಹೀಗೆ ಆಗುತ್ತಿದೆ ಎಂದು ಪತ್ತೆಯಾಗಿದೆ. ಅದು ನಿಮ್ಮ ನಾಲಿಗೆಯನ್ನೇ ತಿನ್ನುತ್ತದೆ'' ಎಂದು ರಾಯಲ್ಸ್ ಹೇಳಿದ್ದಾರೆ.

ವೃತ್ತಿಯಲ್ಲಿ ಶಿಕ್ಷಕರಾಗಿರುವ ರಾಯಲ್ಸ್ ಧೂಮಪಾನ ಮಾಡುತ್ತಾರಂತೆ. ಆದರೆ, ಎನರ್ಜಿ ಡ್ರಿಂಕ್ಸ್ ಸೇವನೆಯಿಂದಲೇ ತನ್ನ ನಾಲಿಗೆ ಈ ಸ್ಥಿತಿಗೆ ಬಂದಿದೆ ಎಂದು ಅವರಿಗೆ ಸ್ಪಷ್ಟನೆ ಇದೆಯಂತೆ.

ಹೆಚ್ಚು ಎನರ್ಜಿ ಡ್ರಿಂಕ್ಸ್ ಸೇವನೆಯಿಂದ ನಿಮ್ಮ ದೇಹದ ಅಂಗಾಂಗಗಳಿಗೆ ತೊಂದರೆ ಉಂಟಾಗುತ್ತದೆ ಎಂದು ವೈದ್ಯರು ಎಚ್ಚರಿಸಿದ್ದಾರೆ. ಆದರೆ, ಪ್ರತಿದಿನ ಎಷ್ಟು ಪ್ರಮಾಣದ ಎನರ್ಜಿ ಡ್ರಿಂಕ್ಸ್ ಸೇವನೆಯಿಂದ ಹೀಗಾಗುತ್ತದೆ ಎಂಬ ಬಗ್ಗೆ ಯಾವುದೇ ಸ್ಪಷ್ಟತೆ ಇಲ್ಲ.