'ಮೊಮೊ ವಾಟ್ಸಾಪ್ ಸುಸೈಡ್ ಚಾಲೆಂಜ್' ಬಗ್ಗೆ ಪೋಷಕರೇ ಎಚ್ಚರ!

ಬ್ಲೂವೇಲ್‌ ನಂತರ ಇದೀಗ 'ಮೊಮೊ ವಾಟ್ಸಾಪ್‌ ಸುಸೈಡ್ ಚಾಲೆಂಜ್' ಪೋಷಕರ ನಿದ್ದೆಗೆಡಿಸಿದೆ. ಈ ಭಯಾನಕ ಗೇಮ್‌ನಿಂದಾಗಿ ಅರ್ಜೆಂಟೀನಾದ 12 ವರ್ಷದ ಹುಡುಗಿ ಪ್ರಾಣ ಕಳೆದುಕೊಂಡಿದ್ದಾಳೆ.

ಬ್ಲೂವೇಲ್‌ನಂತೆ ಇದೊಂದು ಡೆಡ್ಲಿ ಗೇಮ್ ಆಗಿದ್ದು ರಷ್ಯಾದಲ್ಲಿ 130 ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ಮೊಮೊ ಒಂದು ಸೋಷಿಯಲ್‌ ಮೀಡಿಯಾ ಅಕೌಂಟ್‌ ಆಗಿದ್ದು ಇದರ ಜಾಲ ವಾಟ್ಸಾಪ್, ಫೇಸ್‌ಬುಕ್ ಮತ್ತು ಯೂ ಟ್ಯೂಬ್‌ನಲ್ಲಿ ಹರಡಿದೆ.

ಟಬಾಸ್ಕೋದ ಮೆಕ್ಸಿಕನ್‌ ಸ್ಟೇಟ್‌ನ ಸೈಬರ್‌ ಕ್ರೈಂ ತನಿಖೆ ತಂಡ 'ಇದರಲ್ಲಿ ಫೇಸ್‌ಬುಕ್‌ ಬಳಕೆದಾರನಿಗೆ ಅನಾಮಿಕ ವ್ಯಕ್ತಿ ಜತೆ ಸಂವಹನ ನಡೆಸುವ ಸವಾಲು ನೀಡಲಾಗುವುದು' ಎಂದು ಹೇಳಿದೆ.

ಈ ಗೇಮ್‌ನ ಆರ್ಡರ್‌ಗಳನ್ನು ಪಾಲಿಸದಿದ್ದರೆ ಮೆಮೊ ಭಯಾನಕ ಚಿತ್ರಗಳನ್ನು ಕಳುಹಿಸಿ ಆಟಗಾರರನ್ನು ಹೆದರಿಸುತ್ತದೆ ಎಂದು ಈ ಆಟದ ಜಾಲಕ್ಕೆ ಬಿದ್ದವರು ಹೇಳಿದ್ದಾರೆ.

ಮೊಮೊ ಚಾಲೆಂಜ್‌ನಲ್ಲಿ ಕಾಣಿಸುವ ಚಿತ್ರ ಭಯ ಹುಟ್ಟಿಸುವಂತಿದೆ. ಕೂದಲು ಹರಡಿ, ಕಣ್ಣು ಗುಡ್ಡೆಗಳು ಹೊರಬಂದು ದೆವ್ವದ ರೀತಿಯಲ್ಲಿ ಕಾಣಿಸುವ ಫೋಟೊವನ್ನು ಬಳಸಲಾಗುತ್ತದೆ. ಈ ಫೋಟೊವನ್ನು ಜಪಾನಿನ ಕಲಾವಿದ ಮಿಡೊರಿ ಹಯಾಸಿ ಚಿತ್ರಿಸಿದಾದರೂ ಈ ಡೆಡ್ಲಿ ಗೇಮ್‌ಗೂ ಅವರಿಗೂ ಯಾವುದೇ ಸಂಬಂಧವಿಲ್ಲ.

ಈ ಡೆಡ್ಲಿ ಗೇಮ್ ಕುರಿತು ಮೆಕ್ಸಿಕೋ, ಅರ್ಜೆಟೀನಾ, ಅಮೆರಿಕ, ಫ್ರಾನ್ಸ್, ಜರ್ಮನಿಯಲ್ಲಿ ವರದಿಯಾಗಿದೆ ಎಂದು ಬಿಬಿಸಿ ಹೇಳಿದೆ.

ಯಾರಾದರೂ ಈ ಗೇಮ್ ಆಡಲು ಪ್ರಾರಂಭಿಸಿದರೆ ಅದು ಅವರ ಖಾಸಗಿ ಮಾಹಿತಿಯೆಲ್ಲಾ ಪಡೆದುಕೊಳ್ಳುತ್ತದೆ, ಗೇಮ್‌ನಿಂದ ಹಿಂದೆ ಸರಿಯಲು ಯತ್ನಿಸಿದರೆ ಭಯಾನಕ ಇಮೇಜ್ ಕಳುಹಿಸಿ ಭಯಪಡಿಸುತ್ತದೆ.

ಯಾವುದಾದರೂ ಅಪರಿಚಿತ ವ್ಯಕ್ತಿ ಜತೆ ಸಂವಹನ ಮಾಡಿ ಎಂಬ ಚಾಲೆಂಜ್‌ ಬಂದರೆ ಆ ನಂಬರ್‌ ಸೇವ್‌ ಮಾಡಬೇಡಿ ಹಾಗೂ ಅಂಥ ಅಪಾಯಕಾರಿ ಚಾಲೆಂಜ್ ಸ್ವೀಕರಿಸಬೇಡಿ ಎಂದು ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ.