ಈ ಫೋಟೋದಲ್ಲಿರುವ ವಸ್ತುಗಳನ್ನು ನೀವು ಗುರುತಿಸುವಿರಾ? ನೆಟ್ಟಿಗರ ತಲೆಗೆ ಹುಳ ಬಿಟ್ಟ ಚಿತ್ರ

ಹೊಸದಿಲ್ಲಿ: ಸಾಮಾಜಿಕ ಜಾಲತಾಣದಲ್ಲಿ ದೃಷ್ಟಿ ಭ್ರಾಂತಿ ಹಾಗೂ ಒಗಟಿನ ಚಿತ್ರಗಳು ಬಹಳ ಜನಪ್ರಿಯತೆಗಳಿಸಿವೆ. ಹದಿಹರೆಯದವರಿಂದ ವಯಸ್ಸಾದವರು ಸಹ ತಮಗೆ ಸವಾಲೆಸಗುವ ಒಗಟುಗಳಿಗೆ ಉತ್ತರಿಸಲು ಇಷ್ಟಪಡುತ್ತಾರೆ.

ಈ ಪೈಕಿ ದೃಷ್ಟಿ ಭ್ರಾಂತಿ ( ಆಪ್ಟಿಕಲ್ ಇಲ್ಯೂಶನ್ ) ಇರುವ ಫೋಟೋಗಳನ್ನು ಹೆಚ್ಚು ಮಂದಿ ಶೇರ್‌ ಮಾಡಿಕೊಳ್ಳುತ್ತಿರುತ್ತಾರೆ. ಕೆಂದಾಲ್‌ ಜೆನ್ನರ್‌ ಕಾಲು ನಾಪತ್ತೆಯಾಗಿರುವುದು, ಕಪ್ಪು ಬಣ್ಣದಂತೆ ಕಾಣಿಸುವ ನೀಲಿ ಡ್ರೆಸ್, ಕೆಂಪು ಬಣ್ಣದಲ್ಲದ ಸ್ಟ್ರಾ ಬೆರ್ರಿಗಳು ಅಥವಾ ನೀರೊಳಗೆ ಮಗು ಆಟವಾಡುತ್ತಿರುವುದು ಮುಂತಾದ ಚಿತ್ರಗಳು ವೈರಲ್‌ ಆಗುತ್ತಲೇ ಇರುತ್ತವೆ.

ಇದೇ ರೀತಿ, ನಿಮ್ಮ ಮೆದುಳಿಗೆ ಸವಾಲೆಸಗುವ ಚಿತ್ರವೊಂದು ಟ್ವಿಟರ್‌ನಲ್ಲಿ ಕಾಣಿಸಿಕೊಂಡಿದ್ದು, ಇದು ನೆಟ್ಟಿಗರನ್ನು ಸಿಕ್ಕಾಪಟ್ಟೆ ಕನ್ಫ್ಯೂಸ್ ಮಾಡಿಸಿದೆ. @melip0ne ಎಂಬ ಟ್ವಿಟರ್ ಬಳಕೆದಾರ ಮೊದಲಿಗೆ ಈ ಫೋಟೋವನ್ನು ಶೇರ್ ಮಾಡಿಕೊಂಡಿದ್ದು, ಈ ಚಿತ್ರದಲ್ಲಿರುವ ವಸ್ತುಗಳಾದರೂ ಏನು ಎಂದು ನೆಟ್ಟಿಗರು ಯೋಚಿಸುವಂತಾಗಿದೆ. ಬಿಳಿಯ ನೆಲದ ಮೇಲೆ ಹಲವು ವಸ್ತುಗಳಿವೆ. ಆದರೆ, ಯಾವ ವಸ್ತುಗಳನ್ನು ಸಹ ಸುಲಭವಾಗಿ ಗುರುತು ಹಿಡಿಯಲು ಯಾವ ನೆಟ್ಟಿಗರ ಕೈಯಲ್ಲೂ ಸಾಧ್ಯವಾಗುತ್ತಿಲ್ಲ.

ಈ ಟ್ವೀಟ್‌ಗೆ ಸದ್ಯ 67 ಸಾವಿರಕ್ಕೂ ಅಧಿಕ ಲೈಕ್ಸ್‌ ಸಿಕ್ಕಿದ್ದು, 27 ಸಾವಿರಕ್ಕೂ ಅಧಿಕ ನೆಟ್ಟಿಗರು ಇದನ್ನು ರೀ ಟ್ವೀಟ್‌ ಮಾಡಿಕೊಂಡಿದ್ದಾರೆ. ಅಲ್ಲದೆ, ಈ ಚಿತ್ರವನ್ನು ನೋಡಿದ ಸಾವಿರಾರು ನೆಟ್ಟಿಗರು ವಿವಿಧ ರೀತಿಯ ಕಾಮೆಂಟ್‌ಗಳನ್ನು ಮಾಡುತ್ತಿದ್ದಾರೆ.