ಡೇಟಿಂಗ್ ಹೋಗಲು ರಜೆ ನೀಡುತ್ತೆ ಚೀನಾದ ಕಂಪನಿ!

ಬೀಜಿಂಗ್: ಆರಾಮವಿಲ್ಲದಿದ್ದರೆ, ಹಬ್ಬವಿದ್ದರೆ ಅಥವಾ ಏನಾದರೂ ವಿಶೇಷ ಸಂಭ್ರಮವಿದ್ದರೆ ಕಂಪನಿಯಲ್ಲಿ ಉದ್ಯೋಗಿಗಳಿಗೆ ರಜೆ ಘೋಷಿಸುತ್ತಾರೆ.

ಆದರೆ ಚೀನಾದ ಕಂಪನಿ ಅಲ್ಲಿ ಕೆಲಸ ಮಾಡುವ ಅವಿವಾಹಿತ ಯುವತಿಯರಿಗೆ ಡೇಟಿಂಗ್ ಹೋಗಲು, ಸಂಗಾತಿ ಹುಡುಕಲು 30 ದಿನಗಳ ಹೆಚ್ಚುವರಿ ವಿಶೇಷ ರಜೆಯನ್ನು ದಯಪಾಲಿಸುತ್ತದೆ!

ಚೀನಾದ ಝೇಜಿಯಾಂಗ್ ಪ್ರಾಂತ್ಯದ ಎರಡು ಕಂಪನಿಗಳು ಮದುವೆಯಾಗದೇ ಉಳಿದ, ಯುವತಿಯರಿಗೆ ಸಂಗಾತಿ ಹುಡುಕಲು, ಪ್ರೀತಿಯಲ್ಲಿ ಬೀಳಲೆಂದೇ ರಜೆ ನೀಡುತ್ತಿದ್ದಾರೆ.

ಚೀನಾದಲ್ಲಿ ಯುವತಿಯರು 30 ವರ್ಷವಾದರೂ ಮದುವೆಯಾಗದೆ ಉಳಿದರೆ ಮತ್ತೆ ಅವರಿಗೆ ಬೇಗನೆ ಗಂಡು ಸಿಗುವುದಿಲ್ಲವಂತೆ. ಅಲ್ಲದೆ ತಡವಾಗಿ ಮದುವೆಯಾದರೆ ಸಂಸಾರಕ್ಕೂ ಕಷ್ಟವಾಗುತ್ತದೆ ಎಂಬ ಭಾವನೆ ಹೊಂದಿದ್ದಾರೆ ಅಲ್ಲಿನ ಜನರು. ಅಲ್ಲದೆ ಮಹಿಳೆಯರು ಬೇಗನೆ ಮದುವೆಯಾಗದಿದ್ದರೆ ಮುಂದೆ ವಯಸ್ಸಾದಂತೆ ಪುರುಷರು ಅವರನ್ನು ಇಷ್ಟಪಡುವುದಿಲ್ಲವಂತೆ.

ಹೀಗಾಗಿ ಯುವತಿಯರು ಬೇಗನೇ ಮದುವೆಯಾಗಲು ಉತ್ತೇಜನ ನೀಡಿ ಕಂಪನಿ ಡೇಟಿಂಗ್ ರಜೆ ನೀಡುತ್ತಿದೆ.